Category Archives: 35 Habakuk

Habakuk 1

1:1 On ma pangungkapon na pinapatar tu panurirang Habakuk.
1:2 Sadia leleng on, ale Jahowa, joujou ahu, matua so ditangihon ho? Sai hualualuhon tu ho hadoboon, matua so manumpak ho?
1:3 Boasa tung pataridahononmu tu ahu hageduhon, jala marsombusombu ho paidaida hangaluton? Pangarupaon dohot hadoboon di jolongku; masa parsalisian, jala tubu parbadaan.
1:4 Ala ni lumlam do patik jala ndang dung ruar uhum na sintong; ai dirohai halak parjahat i do halak partigor, dibahen i peol do uhumi ruar.
1:5 Bereng hamu humaliang di tongatonga ni angka bangso parbegu, jala pamanat hamu asa marseto situtu rohamuna! Ai patulutonku do sada ulaon di angka arimuna, ndang parhatopotonmuna, tung sura adong halak na pajojorhon i tu hamu.
1:6 Ai ida ma, paheheonku ma halak Kasdim, sada bangso na garang jala na hijang, na maotaot dompak desa na opat i di tano on laho manoluk inganan angka na so ibana hian nampunasa.
1:7 Jorbut, jala na songkal do bangso i; marharoroan sian ibana do uhumna dohot hatimbulonna.
1:8 Jala umbontis angka hodana sian babiat, jala rumahat mangkarat sian gompul bodarina i; jala marinjak angka jolma parsihundulna, ro do tahe jolma parsihundulna sian na dao, habang do nasida songon lali, na manilu sisoroonna.
1:9 Ro be do nasida sude mangulahon hadoboon, hisaphisap ni bohinasida i manuju dompak habinsaran, jala dipapungu halak na tarbuang, songon horsik toropna.
1:10 Pola ibana mangelesi angka raja, jala siparengkelon dibahen angka partogi, mengkel do ibana mida nasa huta na gonting jala di pagukguk do orbuk asa martaban huta i.
1:11 Dung i humosing ma alogo, gabe purpur ibana; alai sai na tarjimput do manang ise na mambahen gogona gabe debatana.
1:12 Nda ho do ale Jahowa Debatangku sian na robi dope na sun badia di ahu? Ndang tagamon mate hami loasonmu. Ale Jahowa bahen uhum do ibana, umbahen dipatindang ho jala bahen panjoraan do ibana, umbahen ojak ibana dibahen ho, ale dolok batu.
1:13 Pita situtu do matam umbahen so tarpaidaida ho na roa, jala ndang tarbahen ho marsombusombu mida pangarupaon; boasa ma tung paidaonmu pamupusi? Tung siap ho, molo dibondut halak parjahat na tumigor sian ibana.
1:14 Jala tudoshon angka dengke laut jolma i dibahen ho, tudoshon gulokgulok tahe na so marraja.
1:15 Tung saluhut do disintak nasida tu ginjang marhitehite hail, jala dipapungu di bagasan jalana, jala dionjat tu bagasan hadangkadanganna. Alani marlas ni roha ibana, jala marolopolop.
1:16 Dibahen i umbahen mamele ibana tu jalana, jala manutung daupa tu hadangkadanganna, ai binahen ni do napu partalianna, jala talmis sipanganonna.
1:17 Alai dung songon i, tung parumaronna ma jalana, jala datdatanna mambunu i angka bangso parbegu, so marpansadian?

Advertisements

Leave a comment

Filed under 1 Padan Na Robi, 35 Habakuk

Habakuk 2

2:1 Di atas panatapanku do ahu jongjong, jala tindang ahu tu partanobatoan, jala manatapnatap ahu marnida manang aha sidohononna tu ahu, jala manang aha alusna taringot tu alualungku.
2:2 Jadi ninna Jahowa mangalusi ahu: Surathon ma pangungkapon i, jala uhirhon tu angka batu panuratan, asa tangkas tarjaha nang pamolus.
2:3 Ai taringot tu tingki sogot dope pangungkapon i, jala hapogan mareahi ujung, jala ndang margabus. Tung sura pe lumemba, sai paimaima ma i, ai sai na ro do sogot ndang tagamon tartading.
2:4 Ida ma na teal do ibana, ndang tigor rohana di bagasan; alai anggo halak partigor i mangolu do binahen ni parsihohotna marhaporseaon.
2:5 Tongon tahe, pangoseose do ianggo anggur, jungkat do baoa i, dibahen ndang marparadianan; diparuak do butuhana songon parbeguan, jala songon hamatean do ibana, na so olo mahap, dipapungupungu tu ibana saluhut angka bangso, jala dipaluhut tu ibana sude angka marga.
2:6 Nda saluhut nasida an marumpama taringot tu ibana, marende aling jala marhulingkulingan taringot tu ibana? Dohononna do: Marjea ma manang ise na pagukguk manang aha, so ibana nampunasa; sadia leleng on tagamon? Tung na padokdok utang tu ibana do ibana disi.
2:7 Nda sompong ma hehe tagamon angka na pasipalsipal ho, jala tarsunggul halak angka na mangarupa ho? Gabe tabannasida ma ho.
2:8 Ala nunga ditaban ho torop angka bangso parbegu: Jadi tabanon ni nasa pasipasi ni angka bangso i ma ho, ala ni sapata ni mudar ni jolma na durus dohot ala hadoboon di tano i, dohot di huta ro di pangisina i sudena.
2:9 Marjea ma manang ise na marpangomoan hajahaton tu jabuna, naeng mambahen asarna di ginjang, laho maporus maradophon tangan ni halak parjahat.
2:10 Nunga ditahi ho haurahon tu jabum, maniaphon torop angka bangso, hape nunga dapotan dosa anggo tondim.
2:11 Ai joujou do nang batu sian dorpi, jala urur sian tarup ni jabum mangalusi ibana.
2:12 Marjea ma manang ise na pauli huta marhitehite mudar, jala diojakkon huta i marhitehite hageduhon.
2:13 Ida ma, nda sian Jahowa Zebaot haroroanna, marngalutan pe angka marga, laho papanganhon tu api do, mandate pe angka bangso, humongkop na soada do?
2:14 Ai gok parbinotoan di hamuliaon ni Jahowa do sogot tano on, songon pangkuphupi ni aek di tondolan ni laut.
2:15 Marjea ma manang ise na painum donganna, mangusehon parpiar ni rimasmu, huhut pamabukkon ibana naeng marnida parsaemaraonna.
2:16 Ho pe ingkon hamahaphononmu ma haurahon gumodang sian hasangapon. Minum ma dohot ho, jala pasalang ma ho, tu ho ma sumuang marliat panginuman sian tangan siamun ni Jahowa jala utauta haleaon ali ni hasangaponmu.
2:17 Ai hadoboon binahenmu tu Libanon lingkup tu ho dohot hasisiap binahen ni binatang na nilelena, ala sapata ni mudar tu jolma dohot hadoboon tu tano i dohot tu huta ro di pangisina i sudena.
2:18 Tung aha ma guna ni ganaganaan na niuhir ni pandena? Ganaganaan na tinuang pe ro di guru pargapgap, umbahen tung marhaposan pande i tu jadijadianna sandiri, laho mambahen ganaganaan angka na mangungu.
2:19 Marjea ma manang ise na mandok tu hau: Ngot ma ho! Hehe ma ho, ale batu na mangungu! Tung tarbahen ibana ma mangajari? Ida ma, na nilampis do ibana dohot sere dohot perak, apus pe hosa, so adong di bagasan ibana.
2:20 Alai di bagasan joro habadiaonna do anggo Jahowa: Ingkon hohom ma maradophon ibana sandok tano on.

Leave a comment

Filed under 1 Padan Na Robi, 35 Habakuk

Habakuk 3

3:1 On ma tangiang ni panurirang Habakuk, marlogu andung.
3:2 Ale Jahowa, nunga hubege baritam, gabe mabiar ahu. Ale Jahowa, sai ulahi ma pangolu ulaonmu di parsitongaan ni angka taon, di parsitongaan ni angka taon ma i tutu pabotohon! Sai marningot ma ho di asi ni roha, nang di bagasan rimas.
3:3 Na ro sian Teman do Debata, jala na sun badia i sian dolok Elaparan Sela. Hamuliaonna mangkuphupi angka langit, jala gok pujipujianna do tano on.
3:4 Ia sondangna songon tiur ni mata ni ari do, pansar sian tanganna do angka sondangna, parhitean ni hagogoonna.
3:5 Di jolona mardalan begu siherut, jala mangihut tu ibana do begu na rahat.
3:6 Jongjong do ibana manatap manonggor tu tano on gabe marserak angka bangso parbegu, gabe marigat angka dolok sian na robi, jala marongrong angka dolokdolok sian mulana sahali. Angka lapang sian na galia ibana nampunasa.
3:7 Tinipa ni hinamago huida angka undungundung sian Kusan, angka hitir do hirehire ni undungundung ni luat Midian.
3:8 Tung tarrimas mida angka batang aek ma tagamon Jahowa? Tung tu angka batang aek ma rimasmu, manang tung tu laut murukmu? Umbahen marsihundul ho di atas ni angka hodam, di atas ni angka hureta hamonanganmu?
3:9 Tarsunggul ma Sior naung sinintakmi, linsinglinsing angka naung minangmangkon ni hata, Sela; angka batang aek mambola tano on dibahen ho.
3:10 Diida angka dolok i ma ho, gabe raion mangalantap ma aek na sumar, dipangiar lung suarana, dompak ginjang dipaherbang tanganna.
3:11 Mata ni ari dohot bulan togang di hajongjonganna dibahen sondang ni sumbiam, angka na pasebut, dibahen parsiksak ni angka hujurmu.
3:12 Dilangkai ho do tano i di bagasan rimasmu, di bagasan parpiar ni murukmu diluntak ho angka bangso parbegu.
3:13 Nunga borhat ho mambahen hatuaon ni bangsom, mambahen hatuaon ni na miniahanmi. Dirosahi ho do ulu sian jabu ni parjahat, dipatedek ho do ojahan sahat ro di rungkung. Sela.
3:14 Ditullang ho do marhitehite guringanna sandiri ulu ni partogina, angka na dorongdorong, songon habahaba, paserak ahu; angka na marolopolop, songon na laho manganhon halak na dangol disihabunian.
3:15 Dibolus ho do laut i marhite sian angka hodam, ditondong ho do galumbang ni torop angka aek magodang na gunsang.
3:16 Nunga hubege baritana, jadi dibaling do butuhangku, angka hitir bibirhu dibahen suara i; ro do tahe habusukon tu bagasan holiholingku, jala mardugu ulu ni tothu; asa hupahohom ahu di ari hagogotan, molo martahop dompak bangso i na mangarupa nasida.
3:17 Ai ndang martumbur disi hau antajau, jala ndang marparbue angka hau anggur, lambang do bunga ni hau jetun, jala ndang dapot sipanganon sian angka hauma; rasip do angka birubiru sian balian, jala ndang adong be jonggi di bagasan bara.
3:18 Alai anggo ahu, marolopolop ma ahu di bagasan Jahowa, jala mariaia ahu mida Debata ni hatuaonku.
3:19 Jahowa, Tuhan i do hagogoonku, jala dibahen ibana do pathu tudoshon ursa tini, jala toguonna do ahu dumege angka dolokdolokku. I ma di pande ende mardongan parhinaloan.

Leave a comment

Filed under 1 Padan Na Robi, 35 Habakuk