Category Archives: 28 Hosea

Hosea 1

1:1 On ma hata ni Jahowa na ro tu si Hosea, anak ni si Beeri di angka ari ni si Usia, si Jotam, si Ahas dohot si Hiskia, angka raja di Juda; dohot di angka ari ni si Jerobeam, anak ni si Joas, raja di Israel.
1:2 Mula ni hata ni Jahowa marhitehite si Hosea: ninna Jahowa ma tu si Hosea: Laho ma ho, buat ma sada boruboru sibabijalang dohot angka tubu ni sibabijalang! Ai sai didatdati isi ni tano i do marmainan, marbalik sian Jahowa.
1:3 Jadi laho ma ibana, jala dibuat ma si Gomer, boru ni si Diblaim, gabegabean ma nasida jala ditubuhon di ibana sada anak.
1:4 Dung i didok Jahowa ma tu ibana: Jou ma goarna si Jesreel; ai otik nari marlulu ma ahu di angka utang mudar ni si Jesreel tu pinompar ni si Jehu, jala ahu pasiaphon harajaon ni pinompar ni Israel.
1:5 Jadi di ari na sasada i ponggolhononku ma sior ni Israel di rura Jesreel.
1:6 Dung i gabegabean muse ma boruboru i, jala ditubuhon sada boru. Dung i didok Jahowa ma tu ibana: Jou ma goarna Nai Sohinasian; ai ndang be marpangulahi rohangku tu pinompar ni Israel, manang marpamuati rohangku tu nasida.
1:7 Alai marpangulahi ma rohangku anggo tu pinompar ni Juda jala paluaonku nasida marhitehite Jahowa, Debatanasida i; alai ndang paluaonku marhitehite sior manang podang manang hamusuon, manang hoda manang jolma parsihundul pe.
1:8 Jadi dung sirang susu Nai Sohinasian, gabegabean muse ma boruboru i, jala ditubuhon sada anak.
1:9 Jadi ninna Jahowa ma: Jou ma goarna Lo Ami, ai ndang bangsongku hamu, jala ndang hamu nampuna ahu.

Leave a comment

Filed under 1 Padan Na Robi, 28 Hosea

Hosea 2

2:1 Alai anggo bilangan ni halak Israel sogot sobokkon horsik ni laut do godangna na so hasuhatan jala na so habilangan, jala di hajongjongan pandohonan tu nasida: Ndang bangsongku hamu, dohonon ma sogot tu nasida: Angka anak ni Debata na mangolu i do hamu.
2:2 Dung i marpungu ma sogot halak Juda rap dohot halak Israel, jala pabangkitonnasida ma sahalak bahen ihutannasida, jala borhat nasida sian tano i; ai timbul do ari ni si Jesreel sogot.
2:3 Paboa hamu ma tu hahaanggimuna: Bangsongku! Dohot tu ibotomuna: Hinasianan.
2:4 Sai badai hamu ma inamuna! Ai ndang ibana jolmangku, ahu pe ndang harajaanna, asa diuras bohina, paholang parmainanonna dohot pangalangkuponna sian holangkolang ni bagotna.
2:5 Asa unang hupasalang ibana, gabe marsaemara jala hupatindang ibana, songon di ari hatutubuna, jala hubahen ibana sobokkon halongonan jala hubahen ibana songon tano hasang jala hubunu ibana sogot binahen ni uas.
2:6 Jala ndang asianku angka anakna i, ala anak ni sibabijalang nasida.
2:7 Ai boruboru sibabijalang do inanasida i, jala mambahen haurahon do na tumubuhon nasida, ai tung didok do: Laho ma ahu mangihuthon puangku, angka na mangalehon tu ahu roti dohot aek dohot hapas dohot hori dohot miak dohot tuak na tonggi siinumonku.
2:8 Dibahen i ida ma runggaonku ma dalanmu dohot suga, jala bahenonku sada parik, asa unang be jumpangsa angka dalanna i.
2:9 Eahanna pe angka puangna, hape ndang dapotsa nasida, jala luluanna nasida hape ndang jumpangsa. Jadi dohononna ma: Antong mulak nama ahu tu sinondukku parjolo i, ai sumonang do ahu uju i sian nuaeng.
2:10 Alai ndang ditanda rohana, ahu hian do nasailaon mangalehon tu ibana eme dohot tuak dohot miak; jala ahu do pagodang di ibana perak dohot sere, pinaulinasida jumadihon Baal.
2:11 Dibahen i ulahanku ma mambuat emengku di tingkina dohot tuakku di tingkina jala rampasonku ma hapashu dohot horingku bahen pangkuphupi ni parsaemaraonna hian nian.
2:12 On pe, pasalangonku ma hailaanna di adopan ni angka puangna, jala ndang adong manang ise baoa na tuk palua ibana sian tanganku.
2:13 Dung i pasadionku ma sandok las ni rohana, ari rayana, poltak ni bulanna ro di ari Sabbat dohot saluhut arina marulaon godang.
2:14 Jala tarulang bahenonku hau anggurna dohot antajauna, ala na nidokna i taringot tusi: I do upangku, na nilehon ni angka puangku tu ahu; jala bahenonku do i gabe tombak, jadi suda ma angka i gagaton ni binatang di ladang.
2:15 Jala luluhononku ma tu nasida ariari ni Baal, uju manutung daupa nasida tusi, jala dipajagar angka tintinna dohot horungkorungna laho mangihuthon tu angka puangna, alai lupa do nasida anggo di ahu, ninna Jahowa.
2:16 Dibahen i, ida ma, elaonku ma nasida jala togihononku tu halongonan, jala dohononku ma hata apulapul tu rohana.
2:17 Lehononku ma olat ni tu ibana porlak anggurna dohot rura Akor bahen bohal ni pangkirimon; jadi marende taripar ma nasida disi, songon uju di angka ari ni haposoonna, songon uju di ari haruruarna sian tano Misir.
2:18 Di ari na sasada i, ninna Jahowa; goaronmu ma ahu: Tuanlaengku! Jala ndang be goaronmu ahu: Baal-hu!
2:19 Ai paholangonku ma goargoar ni angka Baal i sian pamanganna, jala ndang be taringotan ni halak angka goarnasida.
2:20 Jala bahenonku ma di ari na sasada i padan pardengganan di nasida tu binatang di ladang dohot tu pidong angka na martongatonga langit dohot tu gulokgulok di tano on; ponggolhononku ma sior dohot podang ro di hamusuon sian tano on, asa marsonangsonang nasida maringanan hubahen.
2:21 Jadi oliongku ma ho bahen jolmangku salelenglelengna; oliongku ma ho marhitehite hatigoran dohot uhum dohot asi ni roha dohot angka habasaon ni roha.
2:22 Jala oliongku ma ho di ahu marhitehite haporseaon, gabe tandaonmu ma Jahowa.
2:23 Di ari na sasada i maralus ma ahu, ninna Jahowa alusanku ma langit, jala alusan ni langit i tano on.
2:24 Jala alusan ni tano i ma eme dohot tuak dohot miak jala alusannasida ma si Jesreel.
2:25 Dung i saburhononku ma nasida di ahu di tano i jala asianku ma Nai Sohinasian, jala dohononku ma tu Lo Ami: Bangsongku do ho! Jala dohononna ma: Ale Debatangku!

Leave a comment

Filed under 1 Padan Na Robi, 28 Hosea

Hosea 3

3:1 Dung i ninna Jahowa ma tu ahu; ulahi ma laho, haholongi ma sada parompuan na hinaholongan ni puangna nian, hape marmainan do; songon pangkaholongi ni Jahowa di halak Israel, hape marbalik do nasida tu angka debata sileban, jala mangapian di gaburgabur angka na tinanggulean.
3:2 Jadi hutobus parompuan i di ahu arga sampululima rupia dohot tonga dua tuhukan eme.
3:3 Dung i ningku ma tu ibana: Tung nania leleng do ho di ahu; unang ho marmainan jala unang ho masiamangamang, ahu pe songon i tu ho.
3:4 Ai tung na leleng do halak Israel hundulhundul sogot ndang marraja, jala ndang marinduk, jala ndang marpelean, jala ndang marlanggatan jala ndang marsampesampe epod manang marganaganaan terapim.
3:5 Dung i di laonlaon ni ari mulak ma halak Israel, jala luluannasida ma Jahowa, Debatanasida i dohot si Daud, rajanasida i jala angka hitir nasida mandapothon Jahowa dohot hatuaonna di ujung ni angka ari.

Leave a comment

Filed under 1 Padan Na Robi, 28 Hosea

Hosea 4

4:1 Tangihon ma hata ni Jahowa, hamu ale pinompar ni Israel! Ai adong do parbadaan ni Jahowa dompak pangisi ni tano i ala soada hasintongan jala soada haholongon, jala soada parbinotoan di Debata di tano i.
4:2 Holan tolontolon do dohot gabus dohot bunubunu dohot tangkotangko dohot langkuplangkup; mangarut do nasida jala mardapotdapot do angka utang mudar.
4:3 Dibahen i marsak do tano i jala mandate sude isina di bagasan ro di binatang di ladang dohot pidong angka na martongatonga langit, marragean dohot angka dengke di laut.
4:4 Hape na so tupa adong manang ise na mambadai, jala na so tupa adong manang ise na maminsang! Jala sobokkon halak na mambadai malim do bangsomi.
4:5 Dibahen i ompas ma ho arianna i, ompas dohot panurirang rap dohot ho bornginna i, jala ripur bahenonku inam.
4:6 Ripur ma sogot bangsongki ala so marparbinotoan nasida, ala naung ditoishon ho parbinotoan, bolongkononku ma ho unang be ho mangaradoti ulaon hamalimon di ahu, ala naung dihalupahon ho patik ni Debatam, halupahononku ma huhut angka anakmi.
4:7 Lam sopar nasida lam dituntun nasida mardosa dompak ahu; hamuliaonnasida gabe haurahon pasuharonku.
4:8 Dosa ni bangsongki do dihangoluhonnasida, jala mangapian rohanasida, be di hajahatonnasida.
4:9 Jadi dos be uhum i tu halak situanna torop dohot tu malim, marlulu ma ahu tu nasida be hombar tu dalannasida i, jala pasudolonku tu nasida hombar tu pambahenanna be.
4:10 Mangan pe nasida alai ndang butong, marmainan pe nasida alai ndang sopar nasida, ala dipasohot nasida marulaon tu Jahowa.
4:11 Parmainanon dohot anggur dohot tuak na pang, i ma na mangago roha.
4:12 Hape anggo bangsongku marpanungkunan tu hauna do i, jala tungkotna marboaboa tu ibana; ai nunga dililuhon tondi parmainanon nasida, gabe marmainan nasida marbalik sian Debatanasida.
4:13 Mamele do nasida di atas punsu ni angka dolok, jala manutung daupa di atas ni angka buntulbuntul, ditoru ni hau hariara, jabijabi dohot baringin ala denggan parlinggomanna. Dibahen i laho marmainan do borumuna, jala tardege pinggol ni dalan angka parumaenmuna.
4:14 Alai ndang marlulu ahu dompak borumuna ala marmainannasida, manang dompak parumaenmuna ala tardege pinggol ni dalan. Ai gari hamu sandiri mangalambung do rap dohot angka parompuan parmainan mamele rap dohot angka parompuan sibabijalang, hape lam tu hamagoan do bangso na so marroha i.
4:15 Molo naeng marmainan ho, ale Israel, unang nian dohot Juda marsala! Unang nian laho hamu tu Gilgal, jala unang nian nangkok tu Bethapen! Jala unang nian marmangmang hamu songon on: Songon sintongna mangolu Jahowa.
4:16 Ai tung na riar do Israel, songon lombu jalang, aduon ni Jahowa ma nasida nuaeng, songon anak ni birubiru di adaran na lambas.
4:17 Nunga tung tarrante Epraim tu angka ganaganaan; pasombu ibana tusi antong!
4:18 Torbang do tahe pargadombusonnasida, sai didatdati nasida do marmainan, sai mangapian di haurahon do angka partoginasida i.
4:19 Dilualua alogo do nasida marhitehite habongna, gabe tarurak nasida binahen ni peleannasida i.

Leave a comment

Filed under 1 Padan Na Robi, 28 Hosea

Hosea 5

5:1 Tangihon ma hata on, hamu ale angka malim, jala parateatehon ma i, hamu ale pinompar ni Israel, jala tarehon pinggolmu ho ale pinompar ni raja! Ai dompak hamu do uhum i, ala gabe jorgong hamu di Mispa, huhut gabe aring na tinaon di atas ni Tabor.
5:2 Sai diulasulas angka panimbil do pamotongon pelean, alai gabe paminsang do anggo ahu tu nasida saluhut.
5:3 Tangkas do hutanda Epraim jala ndang buni ia Israel maradophon ahu, ai apala ipe marmainan Epraim, ramun ia Israel.
5:4 Ndang diloas angka pambahenannasida mulak tu Debatanasida, ai tondi parmainanon di bagasan rohanasida, jala ndang ditanda nasida Jahowa.
5:5 Alai hajungkaton ni Israel manindangi sogot dompak bohina, jala ompas be do Israel dohot Epraim binahen ni hajahatonnasida; ompas nang Juda rap dohot nasida.
5:6 Ro do nasida marhitehite birubirunasida dohot lombunasida naeng mangalului Jahowa nian, alai ndang tagamon jumpangnasida ibana, ai nunga manginsurut ibana sian nasida.
5:7 Nunga mahilolong nasida mida Jahowa ai angka anak sileban ditubuhon nasida; dibahen i suda ma nasida panganon ni poltak ni bulan ro di partaliannasida i.
5:8 Palu hamu ma sarune di Gibea dohot sangka di Rama! Marsurak hamusuon ma hamu di Bethapen: Di pudim do ale Benjamin!
5:9 Epraim gabe holongonan di ari paminsangon; jala hasintongan do hupabotohon tu angka marga ni Israel.
5:10 Angka induk ni Juda nunga gabe tudoshon halak na paorot parbalohan, ala ni usehononku ma tu nasida rimashu, songon aek.
5:11 Nunga hona pangarupaon Epraim, tarjepol do i hona uhum; ai girgir do ibana mangihuthon patik binahen ni jolma.
5:12 Dibahen i tudoshon ngitngit do ianggo ahu di Epraim, jala tudoshon burbur na mangago di pinompar ni Juda.
5:13 Jadi dung diida Epraim sahitna jala Juda bugangna, gabe laho ma Epraim tu Assur, jala disuru suruanna tu raja Jarib; alai ndang tarbahen anggo ibana pamalumhon hamu, jala ndang hataoaran ibana bugangmu.
5:14 Ai sobokkon babiat do ahu di Epraim, jala sobokkon anak ni babiat di pinompar ni Juda. Ianggo ahu, dung huparsisiga laho ma ahu, huboan nasida, jala ndang adong na tuk paluahon.
5:15 Laho ma ahu mulak tu ingananku, paima diundukhonnasida dosanasida i, jala dilului nasida bohingku; di bagasan hagogotannasida i pasogotonna ma mangalului ahu sian nasa rohana.

Leave a comment

Filed under 1 Padan Na Robi, 28 Hosea

Hosea 6

6:1 Beta hita, asa mulak hita tu Jahowa! Ai nunga ibana mangaribahi, laos ibana pamalum hita! Nunga ibana mambugangi, laos ibana manaoari hita!
6:2 Sai pangoluonna do hita dung salpu dua ari, tole patoluarihon paheheonna hita, asa mangolu hita maradophon ibana.
6:3 Sai mananda ma hita, sai ringgas ma hita mangeahi parbinotoan di Jahowa, tudoshon buhasiang ari do sintong ni habibinsarna, jala sai na ro do ibana songon udan tu hita songon udan nene na mamornohi tano i.
6:4 Tung aha ma bahenonku tu ho, ale Epraim? Tung aha ma bahenonku tu ho, ale Juda? Ai tudoshon ombun manogot do hadaulatonmuna, jala tudoshon nambur manogot, na tibu manaek.
6:5 Dibahen i hubarbar nasida marhitehite angka panurirang, hubunu nasida marhitehite hata angka na sian pamanganku, gabe binsar angka uhumhu, songon panondang.
6:6 Ai lomoan do rohangku mida asi ni roha, asa mida pelean; jala lomoan mida parbinotoan di Debata, asa mida pelean situtungon.
6:7 Alai anggo nasida dilaosi nasida do padan na hubahen, songon si Adam nunga marbalik nasida sian ahu disi.
6:8 Huta ni angka siulahon hajahaton do Gilead, gok bogas sian mudar.
6:9 Jala songon jolma panamun do marmonggopan luhutan ni angka malim; di dalan laho tu Sikem manodosi nasida, ai harorangon diula nasida.
6:10 Angka hasogiron do huida di bagasan bagas ni Israel; disi do masa parmainanon ni Epraim, ramun ia Israel.
6:11 Nang di ho, ale Juda, nunga dipatindang sada gotilon, molo dung mulak sogot huboan bangsongku sian habuangan.

Leave a comment

Filed under 1 Padan Na Robi, 28 Hosea

Hosea 7

7:1 Laho pamalum Israel nian ahu, patar ma dohot hajahaton ni Epraim dohot angka hasalaan ni Samaria. Ai mangulahon sipaotooto do nasida, jala mangarut panangko i, jala mangemur halak pangemur di alaman.
7:2 Jala ndang didok nasida di bagasan rohanasida ahu marningot saluhut hajahatonnasida. Dibahen i dihaliangi angka pambahenannasida ma nasida anggo nuaeng, angka na di jolongku do i.
7:3 Marhitehite hajahatonnasida marlas ni roha rajai dibahennasida, jala marhitehite gabusnasida angka induk.
7:4 Tung saluhut do nasida angka pangalangkup, doshon sada pamurunan nasida, na pinatuba ni tukang roti, na mansadi patubatubahon olat ni dung diluntak na niudi paima torus igarigarna.
7:5 Tole ari raya ni rajanta i, marsahit be ma induk dibahen raru ni anggur; satahi ibana dohot angka pangarehei.
7:6 Ai lam masipasolhotan nasida, songon pamurunan do rohanasida masionggopan: Manipat sabornginna i modom rimasnasida, manogotna i marsigorgor ibana muse, songon jilam ni api.
7:7 Saluhut do nasida marsigorgor be songon pamurunan jala suda panguhumnasida dipangan; saluhut rajanasida marragean, ndang adong manang ise sian nasida na joujou tu ahu.
7:8 Saor tu angka bangso parbegu do Epraim, songon sagusagu na so hinosing do Epraim.
7:9 Halak ruar umpangan gogona, hape ndang mamoto anggo ibana; nunga pola pistik uban ibana, laos so mamoto do.
7:10 Alai hajungkaton ni Israel maralus dompak bohina, hape laos so mulak nasida tu Jahowa, Debatanasida i, laos so di lulu i nasida ibana di saluhutna i.
7:11 Jadi tudoshon darapati na oto nama Epraim, ndang marroha: Tongkin tu Misir nasida joujou, tongkin tu Assur nasida laho.
7:12 Alai disi laho nasida lingkuphononku ma rambangku tu nasida, jala taitonku nasida tu toru songon pidong na martongatonga langit; pinsangonku ma nasida hombar tu barita di luhutannasida i.
7:13 Marjea ma nasida, ala maporus nasida maradophon ahu! Marhinamago ma nasida, ala marbalik nasida sian ahu! Ianggo ahu nian naeng paluaonku nasida, hape anggo nasida hata gabus do didok nasida tu ahu.
7:14 Ndang dung nasida mangangguhi tu ahu di bagasan rohanasida, tagonan nasida mangandungi di atas podomannasida i; ala eme dohot anggur nasida marpungupungu, marbalik sian ahu.
7:15 Ianggo ahu hupodai do nian, hupargogoi tangannasida i; hape anggo nasida na jat do dipingkiri rohanasida dompak ahu.
7:16 Mulak pe nasida, alai ndang dompak ginjang, gabe tudoshon sior sipaotooto; marragean ma angka induknasida marhitehite podang, ala ni panengaon ni dilanasida: I ma gabe haurahonnasida di tano Misir.

Leave a comment

Filed under 1 Padan Na Robi, 28 Hosea