Category Archives: 22 Angka Ende

Angka Ende 1

1:1 Ende ni angka ende sian si Salomo.
1:2 Aut ni olo ibana mangumma ahu marhite sian ummaumma ni pamanganna, ai dumenggan do holong ni roham sian anggur.
1:3 Angur do uap ni angka miakmu, songon miak na hushus na marusean do goarmu, ala ni do umbahen hasoloan ni angka namarbaju i ho.
1:4 Togu ma ahu, asa marlojong be hami mangihuthon ho! Nunga ditogu rajai ahu tu bagasan angka bilutna. Marolopolop ma hami jala marlas ni roha mida ho! Papujipujionnami ma holong ni roham gumodang sian anggur. Luhut jolma angka na daulat roha mangkaholongi ho.
1:5 Marbirong do ahu nian, alai marmulia do, hamu ale angka boru ni Jerusalem! Songon undungundung ni halak Kedar tahe, songon rimberimbe ni podoman ni si Salomo.
1:6 Unang marhu ni roha hamu mamereng ahu, ala marbirong ahu, mata ni ari na mamilngas mambahensa; nunga marronirimas angka anak ni dainang mida ahu, didokkon nasida ahu gabe pamuro di angka porlak anggur; hape ia porlak anggurhu sandiri ndang huburoi.
1:7 Sai pabotohon ma tu ahu, ho ale hasudungan ni rohangku, manang didia ho marmahan? Manang didia mangulon punguan i dibahen ho di hos ni ari? Boasa tagonan ahu madoado rap dohot punguan ni angka donganmu?
1:8 Tung so diboto roham do i, ho ale na mauliutus di tongatonga ni angka parompuan! Antong ruar ma ho, ihutihut ma bogas ni punguan birubiru i, jala parmahan i angka hambingmu boruboru mardonokkon angka undungundung ni angka parmahan.
1:9 Tu hodangku na manait hureta ni Firaun hupatudos ho, ale hasoloan ni rohangku.
1:10 Uli do hurummu duansa binahen ni mata intan, jala rungkungmu binahen ni horunghorung marjojor.
1:11 Bahenonnami dope tu ho horunghorung sere, mardongan perak marturpukturpuk.
1:12 Saleleng hundul rajai di adopan ni mejana, angur ma uap ni miakku.
1:13 Sarahutan mir na marborngin di holangholang ni bagothu do ho di ahu; ale hasudungan ni rohangku.
1:14 Saraungan parbue ni anggur di bagasan angka porlak anggur Engedi do ho di ahu, ale hasudungan ni rohangku.
1:15 Tung na uliutus do ho, ale hasoloan ni rohangku! Tung na uliutus do ho, jala matam songon mata ni darapati.
1:16 Tung na uliutus do ho, ale hasudungan ni rohangku, tung na uliutus do ho tongon! Lagenta pe marbungabunga na rata do.
1:17 Angka tiang ni bagasta sian hau ares do, jala emperna sian hau pinasa.

Advertisements

Leave a comment

Filed under 1 Padan Na Robi, 22 Angka Ende

Angka Ende 2

2:1 Ianggo ahu nian, bunga ladang sian Saron do ahu, bunga pansur sian angka rura.
2:2 Songon bunga pansur di tongatonga ni angka duriduri, songon i ma tutu ho, ale hasoloan ni rohangku di tongatonga ni angka boruboru namarbaju.
2:3 Songon hau unte manis di tongatonga ni hau tombak, songon i ma tutu ho, ale hasudungan ni rohangku, di tongatonga ni angka dolidoli. Dihalungunhon rohangku do hundulhundul di parlinggomanmu, jala tabo parbuena didai tolonanku.
2:4 Nunga ditogu ibana ahu tu bilut parpeopan tuak anggur, jala holongna i gabe partonggol di ahu.
2:5 Dipargogoi do ahu marhite sian parbue ni anggur, jala dipatogar rohangku marhite sian unte manis, ai marsahit do ahu, dibahen sihol ni rohangku.
2:6 Tanganna hambirang mangkaol ulungku, jala tanganna siamun mangkaol dagingku.
2:7 Hupatolon ma hamu, ale boru Jerusalem tu angka hije dohot ursa tini, angka na di ladang, asa unang disunggul, jala unang dipahehe hamu hasoloan ni rohangku, nda ingkon sombu ni rohana do.
2:8 Ndi, rupa suara ni hasudungan ni rohangku do i! Ida ma, nunga ro ibana maringkat sian angka dolok, marhajingjang di atas ni angka robean.
2:9 Tudos do hasudungan ni rohangku tu sada hije, manang tu anak ni ursa. Ida ma, jongjong do ibana di balik ni dorpi, mandulo sian jandela, marlinanglinang ibana mandulo sian tarali.
2:10 Dung i mangkuling ma hasudungan ni rohangku, didok ma mandok ahu: Hehe ma ho, ale hasoloan ni rohangku, na mauliutus, jala ruar ma ho!
2:11 Ai ida ma, nunga salpu partaonan ngali ni ari, nunga mansohot dohot ari udan.
2:12 Nunga pola mullop angka bungabunga di ladang, nunga jumpang tingki parendeon, nunga pola tarbege suara ni anduhur titi di tanonta i.
2:13 Parbue ni hau ara pe nunga mamungka matoras, jala marbunga ia hau anggur, jala maruap na angur. Hehe ma ho, ale hasoloan ni rohangku, na mauliutus, jala ruar ma ho!
2:14 Ho ale darapatingku na maringan di bagasan rigatrigat ni dolok batu angka na timbo, loas ma ahu marnida rupam, loas ma ahu umbege suaram! Ai na lambok do suaram, jala na uli rupam.
2:15 Tangkup ma di hita angka antuasu, angka na metmet i, angka na mangago porlak anggur! Ai nunga marbunga hau anggurta i.
2:16 Ahu nampuna hasudungan ni rohangku, jala ibana nampuna ahu, marmahan do ibana di tongatonga ni angka bunga pansur.
2:17 Paima lamo ari, jala mago angka halinu; mulak ma ho, ale hasudungan ni rohangku, na tudos tu hije manang tu anak ni ursa di atas ni dolok batu parsirangan.

Leave a comment

Filed under 1 Padan Na Robi, 22 Angka Ende

Angka Ende 3

3:1 Di atas podomanku bornginna i ahu mangalului hasudungan ni rohangku; hulului nian ibana, hape ndang jumpang ahu ibana.
3:2 Antong hehe na ma ahu mangaliati huta i, ro di angka onan dohot alaman mangalului hasudungan ni rohangku. Hulului do nian ibana, hape ndang jumpang ahu ibana.
3:3 Pajumpang ahu dohot parjaga angka na mangaliati huta i: Atehe ndang diida hamu hasudungan ni rohangku, ningku?
3:4 Hape tongkinnari dung sirang ahu siang nasida, jumpang ahu ma hasudungan ni rohangku. Jadi hutangkup ma ibana, jala ndang be hupalua ibana, nda jolo sahat ibana huboan tu bagasan jabu ni dainang, tu bagasan bilut ni na manubuhon ahu.
3:5 Hupatolon ma hamu, ale angka boru Jerusalem, tu angka hije dohot tu ursa tini angka na di ladang, asa unang disunggul, jala unang dipahehe hamu hasoloan ni rohangku, nda ingkon sombu ni rohana do.
3:6 Ise ulaning ibana na nangkok sian halongonan, songon timus na marsijongjong, songon daupa na humushus sian saluhut ragam ni daupa, angka na hushus?
3:7 Ida ma, podoman ni si Salomo sandiri do i, pola onompulu halak ulubalang sian angka ulubalang ni Israel mangkaliangisa.
3:8 Saluhut nasida sialo musu, na somal marporang, ganup marpodang gampit di gontingna be ala songgotsonggot bornginna i.
3:9 Nunga dibahen raja Salomo hian sada podoman hasampuron di ibana sian hau ares di Libanon.
3:10 Angka tiangna sian perak dibahen, radeanna sian sere, tutupna sian abit hasumba; na niangit do parbagasanna marhite sian roha haholongon ni angka boru Jerusalem.
3:11 Ruar ma hamu ale boru Sion, ida hamu ma raja Salomo martumpal, na tinumpalhon ni inana tu ibana di ari hasampuranna, di ari halasan ni rohana i.

Leave a comment

Filed under 1 Padan Na Robi, 22 Angka Ende

Angka Ende 4

4:1 Ida ma, tung na uliutus do ho, ale hasoloan ni rohangku, na uliutus do ho tutu! Songon mata ni darapati do matam, tarida sian pudi ni pangkuphupi ni ulum; siporhotmu pe tudoshon sada punguan hambing angka na mangulon di bona ni dolok Gilead.
4:2 Angka ngingim hira sada punguan birubiru nambura ginustingan dope imbuluna, angka na manaek sian pangarembean, angka na marlinduat be, jala ndang dung tumbasan.
4:3 Songon bonang na tinubar do bibirmu duansa, lambok situtu do pangkuling ni pamanganmu; songon parbue ni dalimo na sineat do hurummu, tarida sian pudi ni pangkuphupi ni ulum.
4:4 Songon tungkup pinauli ni si Daud ia rungkungmu, na pinauli bahen sangkotan ni sinjata, pola saribu parinse sangkot tusi, luhutna i sinjata ni angka ulubalang do.
4:5 Adopmu na dua i, songon anak ni hije na linduat, angka na manjampal di tongatonga ni bunga pansur.
4:6 Paima lamo ari, jala maporus angka halinu, naeng ahu mardalan tu dolok hatubuan ni mir dohot tu robean hatubuan ni haminjon.
4:7 Tung na uliutus sahali do ho, ale hasoloan ni rohangku, jala ndang adong lindangmu.
4:8 Rap ma hita sian Libanon, ale oroan, rap tuat ma hita tutu sian Libanon; manatapnatap ma ho sian punsu ni dolok Amana, sian punsu ni Senir dohot Hermon, sian pangulonan ni angka singa, sian angka dolok haroroan ni babiat.
4:9 Nunga tung tunduk rohangku dibahen ho, ale pariban oroanku! Nunga tung dibuat ho rohangku marhite sian pangkidop ni matam sahali, marhite sian sanjure horunghorung na di rungkungmi.
4:10 Tung na arga situtu do angka tanda ni holong ni roham, ho ale pariban oroanki, andul do dumenggan holong ni roham sian anggur, jala dumenggan do uap ni miakmu, sian nasa miak na hushus.
4:11 Situak ni loba manetehi sian pamanganmu, ale oroan, situak ni loba dohot susu tutu di toru ni sialap ingkaum, jala uap ni pangkeanmu, songon uap ni Libanon.
4:12 Songon porlak na tipak marparik humaliang do ho, ale pariban oroanki, songon pansur na nirunggaan, songon sumur na sinahap.
4:13 Angka tumburmu do songon porlak Eden na gok hau dalimo, marparbue angka na arga situtu, tole hau hapur na angur situtu.
4:14 Tole hau tusam dohot hau ingul, tole hau haminjon dohot ulumamis, tole hau mir dohot aloe ro di saluhut hau pamurpuri, angka na denggan situtu.
4:15 Songon pansur do ho di bagasan porlak, jala songon mual aek hangoluan, songon sunge na mabaor sian Libanon.
4:16 Hehe ma ho, ale alogo sian utara, jala ro ma ho, ale alogo sian dangsina, mangombus ma ho sian porlakku, asa muap uapna na angur i! Sai ro ma ho ale hasudungan ni rohangku tu bagasan porlakna, jala mangan sian parbuena angka na arga i!

Leave a comment

Filed under 1 Padan Na Robi, 22 Angka Ende

Angka Ende 5

5:1 Nunga ro ahu tu bagasan porlakku, ho ale pariban, oroanki! Nunga hutapu mirhu ro di sandok miakku na hushus, nunga hupangan sarangan ni lobangku ro di situakna, nunga huinum anggurhu ro di susu. Mangan minum ma, hamu ale angka kedanhu, maradu mabuk, hamu ale angka haholonganku.
5:2 Modom do ahu nian, alai dungo dope anggo rohangku, ndi! Rupa suara ni hasudungan ni rohangku do na manuktuhi pintu i mandok: Ungkap di ahu, ale ito, hasoloan ni rohangku darapatingku, ho ale na sun daulat! Ai gok nambur do ulungku, jala gok udan borngin do timpushu.
5:3 Jadi ninna oroan i ma: Nunga pola huosari salendangku, beha pambahenku manolukkon muse? Nunga pola huburi pathu, tung pahodaronku ma muse?
5:4 Hape dung disurdukkon hasudungan ni rohangku tanganna sian panduloan, jadi marsigorgor ma rohangku di bagasan mida ibana.
5:5 Jadi hehe ma ahu mangungkap di hasudungan ni rohangku, gabe manetehi mir sian tanganku, jala mabaor mir sian jarijaringku laho mangodothon ungkitungkit ni pintu.
5:6 Laos huungkap ma di hasudungan ni rohangku, hape marhalindo ma hasudungan ni rohangku laho. Jadi mago ma rohangku marningot hatana nangkin: Laos hulului ma ibana, hape ndang jumpang ahu be ibana, sai hupajoujou ibana, hape ndang be dialusi ahu.
5:7 Pajumpang ma ahu dohot parjaga, angka na mangaliati huta i, dipungkul jala dibugangi nasida ahu, tung dohot do pangkuphupi ni bohingku dirampas angka parjaga di atas parik.
5:8 Hupatolon ma hamu, ale boru Jerusalem, molo tung pajumpang hamu dohot hasudungan ni rohangku, aha do dohononmuna tu ibana? Dapotan sahit ahu dibahen sihol ni rohangku!
5:9 Dia do huroha hasurungan ni hasudungan ni roham, sian hasudungan angka na asing, ho ale na ummuli sian nasa parompuan? Dia do huroha hasurungan ni hasudungan ni roham sian hasudungan angka na asing, umbahen tung pola patolononmu hami songon on?
5:10 Na bontar, jala na rara do hasudungan ni rohangku, sondangna pe mangalompoi halak na marloksaloksa.
5:11 Uluna hira sere palangki do, obukna songon bulung ni harambir na marngeat, birong songon pidong sigak.
5:12 Matana songon darapati di topi ni angka batang aek, hira na maridi di bagasan susu, mansusuari marlobilobi di eme tudukonna.
5:13 Hurumna hira sada baruran hatubuan ni sanggul, hira dolok hatubuan ni hau na angur, bibirna hira bunga pansur angka na manetekkon mir.
5:14 Tanganna hira tintin sere idaon na nilampis dohot mataintan; dagingna hira jadijadian sian gading na nilampis dohot humala.
5:15 Haehaena hira tiang batu na martulis, angka na marojahan pat sere, rupana hira Libanon, na pinillit songon hau ares.
5:16 Tolonanna manis do, jala sandok pangalahona tau hasoloan. I ma pangalaho ni hasudungan ni rohangku, songon i ma alealengku, hamu ale boru Jerusalem.

Leave a comment

Filed under 1 Padan Na Robi, 22 Angka Ende

Angka Ende 6

6:1 Tudia ulaning laho hasudungan ni roham, ho ale na ummuli sian sude parompuan? Dompak dia ulaning ditondong hasudungan ni roham, asa dohot hami mangalului ibana rap dohot ho?
6:2 Nunga tuat hasudungan ni rohangku tu porlakna, tu baruran hatubuan ni sanggul, naeng mardalandalan ibana di bagasan angka porlakna, huhut papungupungu angka bunga pansur.
6:3 Ahu nampuna hasudungan ni rohangku, jala ibana nampuna ahu, marmahan do ibana di tongatonga ni angka bunga pansur.
6:4 Tung na uliutus do ho, ale hasoloan ni rohangku! Songon Tirza tahe, jagar songon Jerusalem, jala songkal songon parangan na marhoronhoron.
6:5 Padao ma matam sian ahu, ai tarsingot do ahu dibahen; siporhotmu pe tudoshon sada punguan hambing, angka na mangulon di bona ni dolok Gilead.
6:6 Angka ngingim hira sada punguan birubiru, nambura ginustingan dope imbuluna, angka na manaek sian pangarembean, angka na marlinduat be, jala ndang dung tumbasan.
6:7 Hira janggaleman do hurummu, dapot idaon sian pudi ni pangkuphupi ni ulum.
6:8 Onompulu do bilangan ni tuanlaenna, jala ualupulu angka radingna, jala ndang habilangan anggo angka namarbaju.
6:9 Alai sasada ho do anggo darapatingku, jala na sun daulat, boru sasada ni inana, hasoloan ni roha ni na manubuhon. Diida angka namarbaju i ibana, jala diparhatua, angka jolma ni raja pe dohot radingna papujipuji ibana:
6:10 Ise do i na marsinondang songon sibalik hunik manogotnogot, uli ibana songon bulan, sondangna songon mata ni ari, songkal songon parangan marhoronhoron?
6:11 Nunga tuat ahu nian tu porlak hatubuan ni buapala, naeng maningkir angka na ratarata di rura, naeng mandulo manang naung martumbur hau anggur, manang naung marbunga hau dalimo.
6:12 Ndada panagaman ni rohangku dope, nunga pinaunsat ahu tu hureta ni bangsongku na sangap i.

Leave a comment

Filed under 1 Padan Na Robi, 22 Angka Ende

Angka Ende 7

7:1 Mulak ma ho, ale Sulam, mulak ma, mulak ma, mulak ma ho tutu, asa huida hami ho! Tung aha ma idaonmuna di Sulam. Tudos do ibana tu parsaroan Mahanaim.
7:2 Denggan ni pangealmi mangalangka di bagasan sipatum, ho ale boru ni raja na sangap! Pangibul ni gontingmu, songon simata godang, hira jadijadian ni tangan ni halak na pande.
7:3 Ampuanmu hira panginuman na hibul do, ndang jadi hurangan di siinumon na pang. Butuham hira eme di bolagan na hinaliangan ni bunga pansur.
7:4 Ia adopmu na dua i, hira anak ni ursa dua, hira anak ni hije na linduat.
7:5 Rungkungmu hira tungkup sian gading; matam hira tobat angka na di Hesbon, mardonokkon harbangan ni huta na rame, igungmu hira tungkup panatapan ni Libanon, manatap dingkan Damaskus.
7:6 Ia ulum di atasmu hira Karmel do, jala obukmu na janggejangge hira paspasan baliga hodong do, pola tarpulut roha ni rajai dibahen pandandanan ni obukmu.
7:7 Tung na uliutus do ho, jala na lambok do, ho ale boru hasian binahen ni hinaulim!
7:8 Partubum on hira harambir do, jala adopmu hira saraungan parbue ni anggur.
7:9 Jadi ninna rohangku ma: Hupanaek na ma harambir on, asa huhaol dangkadangkana; jala adopmu na dua i, ingkon hira saraungan parbue ni anggur di ahu, jala parhosa ni igungmu, hira uap ni unte manis.
7:10 Ia tolonanmu hira anggur na denggan, lambok tahe mabaor diinum hasudungan ni rohangku, jala pagirgir mangkatai bibir ni halak na mondokondok.
7:11 Ahu do nampuna hasudungan ni rohangku, jala tu ahu do laho sihol ni rohana.
7:12 Antong ho ale hasudungan ni rohangku, beta hita ruar tu ladang, asa marborngin hita di angka sosor.
7:13 Sogot pe hita hehe manogot laho manogot angka porlak anggur, maningkir manang naung martumbur hau anggur i, jala mangerbang angka bungana, marbunga dohot hau dalimo; disi do patuduhononku tu ho holong ni rohangku!
7:14 Disi ma maruap angka parbue dudaim, jala di atas pintu ni jabunta parbue marragamragam, angka na arga, angka nambura dope, dohot naung leleng, angka na hupajop di ho, ale hasudungan ni rohangku.

Leave a comment

Filed under 1 Padan Na Robi, 22 Angka Ende