Category Archives: 66 Pangungkapon

Pangungkapon 1

1:1 On ma pangungkapon ni Jesus Kristus, na nilehon ni Debata tu Ibana, asa tu angka naposona patuduhononna na naeng masa tibu, gabe saut dipatuduhon, ai ditongos do marhite sian surusuruanna tu naposona, Johannes.
1:2 Dihatindangkon ibana do hata ni Debata dohot panindangion taringot tu Jesus Kristus: Nasa na niidana.
1:3 Martua ma na manjaha ro di angka na umbege hata panurirangon on, angka siradoti na tarsurat dison; ai jonok do ari i!
1:4 Ahu surat ni si Johannes mandapothon na pitu huria na di Asia: Asi ni roha ma di hamu dohot dame sian Ibana na mangolu i, naung mangolu hian jala na naeng ro, nang sian na pitu Tondi na di adopan ni habangsana,
1:5 nang sian Jesus Kristus, Sitindangi haposan i, na parjolo tubu sian angka naung mate, Sigomgom angka raja ni tano on! Ibana do mangkaholongi hita jala dipalua hita sian dosanta marhitehite mudarna.
1:6 Dijadihon do hita gabe harajaon hamalimon di Debata, Amana i: Di Ibana ma hasangapon dohot hagogoon ro di salelenglelengna! Amen.
1:7 Ida ma, na ro ma Ibana di bagasan ombun! Idaon ni nasa mata do Ibana, nang angka naung manullang Ibana, gabe mangangguhi be ma saluhut bangso ni tano on mida Ibana. I ma tutu. Amen.
1:8 Ahu do Bonana jala Ujungna, ninna Tuhan Debata, Debata nuaeng, Debata naung adong hian, na naeng ro i, Sigomgom saluhutna!
1:9 Ahu Johannes, donganmuna jala rap dohot hamu partohap di haporsuhon dohot di harajaon nang di habengeton na di bagasan Jesus; di pulo na margoar Patmos do ahu uju i, ala ni hata ni Debata dohot ala ni pangkatindangkon di Jesus.
1:10 Naung di bagasan ari ni Tuhan i do ahu di bagasan tondi, gabe hubege di pudingku soara na gogo, suman tu soara ni sarune.
1:11 On do didok: Surathon ma na niidam tu sada buku jala tongos ma i tu na pitu huria, i ma Epesus, Smirna, Pergamos, Tiatira, Sardes, Piladelpia dohot Laodikea!
1:12 Gabe humusor ma ahu marnida Parsoara, naung mangkatai i dohot ahu. Jadi dung humusor ahu, huida ma pitu parpalitoan sere.
1:13 Jadi di tongatonga ni angka parpalitoan i huida ma na suman tu Anak ni jolma, na marsampesampe jala marhohos sere di pamatangna.
1:14 Mamontar do simanjujungna ro di obukna, bontar songon hapas, saksak songon hapur; jala songon nala ni api do ia matana.
1:15 Ianggo patna songon haksa na nilala di bagasan pamurunan, ia soarana songon parhasak ni aek godang.
1:16 Ditiop do pitu bintang di tanganna siamun, jadi ruar do sian pamanganna podang siduababa na tajom; songon mata ni ari na maringaringar do ia sondang ni bohina.
1:17 Disi huida Ibana, tinggang do ahu tujolo ni totna, songon naung mate; gabe diampehon Ibana ma tanganna siamun tu ahu, huhut ma didok: Unang ho mabiar, ai Ahu do Parjolo jala Parpudi!
1:18 Ahu do Siparngolu; naung mate do Ahu najolo, gabe mangolu antong ro di salelenglelengna; di Ahu do anak hinsu ni hamatean dohot banua toru!
1:19 Onpe, surathon ma na niida ni matami, i ma na masa nuaeng ro di na naeng masa, dung salpu on:
1:20 Hahomion ni bintang na pitu, angka na niidam di siamunhu, dohot parpalitoan sere na pitu i: Ia bintang na pitu i, angka suruan ni na pitu huria do i, ia parpalitoan na pitu i, i ma na pitu huria i.

Advertisements

Leave a comment

Filed under 2 Padan Na Imbaru, 66 Pangungkapon

Pangungkapon 2

2:1 Surathon ma tu suruan ni huria Epesus: On do hata ni na maniop bintang na pitu i di siamunna, na mardalan di holangholang ni parpalitoan na pitu i:
2:2 Huboto do angka ulaonmu dohot parungkilonmu ro di habengetonmu; na so tarpataontaon ho angka parjahat. Diunjuni ho do angka na mandok, apostel nasida, hape ndang na tutu; pargapgap do nasida jumpang ho.
2:3 Na marbenget ni roha do ho, na marsitaonon do ho ala ni Goarhu; ndang marnaloja ho.
2:4 Alai adong do pangkurangi ni rohangku di ho, i ma naung tinadingkonmu holong ni roham na di mulana i!
2:5 Onpe, parateatehon ma hatinggalanmi; pauba ma roham, ulahon ma angka ulaonmu na parjolo i! Ia so i, ro ma Ahu mandapothon ho, manunggalingkon parpalitoanmi sian ingananna, anggo so dipauba ho roham.
2:6 Alai on do tutu hasurunganmu: Dihasogohon ho do ulaon ni halak Nikolaus; Ahu pe, huhasogohon do i.
2:7 Ditangihon na marpinggol ma na nidok ni Tondi i tu angka huria: Na monang i ma bahenonku manganhon parbue ni hau hangoluan, na di Paradaiso ni Debata!
2:8 Surathon ma tu suruan ni huria Smirna: On do hata ni Parjolo huhut Parpudi, naung mate najolo gabe mangolu:
2:9 Huboto do haporsuhonmu dohot hapogosonmu, alai na mora do ho; huboto nang panginsahion ni angka na mandok: Jahudi nasida; hape ndang na tutu, punguan ni sibolis do nasida.
2:10 Unang habiarhon angka haporsuhon na naeng ro! Dabuon ni sibolis ma deba sian hamu tubagasan hurungan, asa tarunjun hamu, gabe tarsosak ma hamu sampulu ari lelengna. Sai burju ma ho rasirasa mate; dung i lehononku ma tu ho tumpal hangoluan i!
2:11 Ditangihon na marpinggol ma na nidok ni Tondi i tu angka huria: Ndang mahua na monang i bahenon ni hamatean na paduahon i!
2:12 Surathon ma tu suruan ni huria Pergamos: On do hata ni na maniop podang siduababa na tajom i:
2:13 Huboto do ingananmu mardonokkon habangsa ni sibolis i, jadi na marsihohot do ho di Goarhu, ndang disoadahon ho haporseaon di Ahu, nang uju di angka ari ni Antipas, sitindangingku haposan i, gabe dipusa do ibana di tongatongamuna, di inganan ni sibolis i.
2:14 Alai adong do saotik pangkurangi ni rohangku di ho: Na adong do di tongatongamuna angka na mangoloi poda ni Bileam, na mangajari si Balas mambahen gasip di jolo ni halak Israel, i ma na manganhon na pinelehon tu begu dohot na marmainan.
2:15 Suang songon i adong di tongatongamu angka na marsitiopan tu poda ni halak Nikolaus.
2:16 Pauba ma roham! Ia so i, magira ma Ahu ro marmusu dompak nasida marhitehite podang ni pamanganku.
2:17 Ditangihon na marpinggol ma na nidok ni Tondi i tu angka huria: Tu na monang i ma lehononku sipanganon manna na buni i, jala lehononku tu ibana batu na saksak dohot goar na imbaru na sinurat tu atas batu i, na so binoto ni manang ise, ia so holan na manjalosa.
2:18 Surathon ma tu suruan ni huria Tiatira: On do hata ni Anak ni Debata, na marmata songon nala ni api, jala patna tudos tu haksa:
2:19 Huboto do angka ulaonmu dohot holong ni roham dohot haporseaonmu ro di pangkobasionmu, nang benget ni roham; huboto, gumodang do ulaonku parpudi sian angka na parjolo i.
2:20 Alai on do pangkurangi ni rohangku di ho: Dipasombu ho do boru Izebel, na mandok, panurirang ibana, gabe diajari jala dililuhon do angka naposongku, asa marmainan nasida jala manganhon na pinelehon tu begu.
2:21 Nunga hupaganjang nian arina, asa paubaonna rohana; alai ndang olo ibana paubahon rohana tumadingkon parmainanonna i.
2:22 Dabuonku ma ibana tubagasan parsahiton, songon i angka donganna pangalangkup tubagasan haporsuhon godang, ia so dipauba rohana tumadingkon niulana i.
2:23 Laos ragehononku ma angka anakkonna asa mate, asa diboto saluhut huria; Ahu do sidodo ateate dohot roha; jala lehononku tu ganup hamu hombar tu na niulana be.
2:24 Alai tu hamu, angka na tading di Tiatira, tu nasa na so umpeop poda ondeng, angka na so umboto hahomion ni sibolis i, songon na nidoknasida, tu hamu do hudok: Ndang be ampehononku pandokdohi na asing tu hamu:
2:25 Asal ma ditiop hamu na di hamu i, paima ro Ahu!
2:26 Di na monang i, anggo diradoti ulaonku sahat ro di ujung, lehononku ma huaso manggomgomi angka parbegu:
2:27 Parmahanonna ma nasida marhitehite tungkot bosi, mangarosak nasida hira hudon tano, songon naung hujalo sian Damang.
2:28 Lehononku ma tu ibana bintang sipaias.
2:29 Ditangihon na marpinggol ma na nidok ni Tondi i tu angka huria!

Leave a comment

Filed under 2 Padan Na Imbaru, 66 Pangungkapon

Pangungkapon 3

3:1 Surathon ma tu suruan ni huria Sardes: On do hata ni Partondi na pitu na sian Debata jala Parbintang na pitu: Huboto do angka ulaonmu; na targoar do ho mangolu, hape na mate do!
3:2 Tarsunggul ma ho jala patogu ma donganmu na tading i, angka na naeng mate. Ai ndang jumpang Ahu di angka ulaonmu, naung gok di jolo ni Debatangku.
3:3 Antong, ingot ma, manang songon dia na jinalom dohot na binegem; i ma radoti jala pauba roham! Dibahen i, molo so tarsunggul ho, ro ma Ahu songon panangko; na so jadi botoonmu sadiharina Ahu ro manopot ho.
3:4 Alai adong do di Sardes otik goar ni halak, angka na so mangaramuni abitna; nasida ma mardalan sogot rap dohot Ahu marabit na saksak, ai na tau do nasida.
3:5 Songon i ma uloshononhon abit na saksak tu na monang i; na so tupa be sesaonku goarna sian buku hangoluan i, hatindangkononku ma goarna di jolo ni Damang nang angka surusuruanna.
3:6 Ditangihon na marpinggol ma na nidok ni Tondi i tu angka huria!
3:7 Surathon ma tu suruan ni huria Piladelpia: On do hata ni Nabadia jala Nasintong, na umpeop anak hinsu ni Daud, na mangungkap so adong na mangkinsu, jala na mangkinsu so adong na mangungkap:
3:8 Huboto do angka ulaonmu. Antong, nunga hupadiri di jolom pintu naung mungkap, na so bolas hinsuon ni manang ise. Ai otik pe gogom, diradoti ho do hatangku; ndang disoadahon ho Goarhu.
3:9 Huboan ma halak sian punguan ni sibolis, angka na mandok, Jahudi nasida, hape ndang na tutu, pargabus do nasida: Bahenonku ma nasida ro marsomba tujolo ni patmu, botoonnasida do, naung huhaholongi ho!
3:10 Ai diradoti ho do hata habengeton na sian Ahu; Ahu pe, ramotanku ma ho di ari pangunjunan na naeng ro tu liat portibi on, mangunjuni angka na mangingani tano on.
3:11 Magira ma Ahu ro. Tiop ma na di ho, unang adong na mambuat tumpalmi!
3:12 Bahenonku ma na monang i gabe tiang di joro ni Debatangku; na so tupa be ibana ruar sian i, jala surathononku ma tu ibana Goar ni Debatangku dohot goar ni huta ni Debatangku, i ma Jerusalem na imbaru i, na tuat sian banua ginjang sian Debatangku, nang Goarhu na imbaru i.
3:13 Ditangihon na marpinggol ma na nidok ni Tondi i tu angka huria!
3:14 Surathon ma tu suruan ni huria Laodikea: On do hata ni si Amen, Sitindangi haposan jala na sintong, mula ni na tinompa ni Debata:
3:15 Huboto do angka ulaonmu: Na so haru ngali, na so haru las ho; aut ni haru ngali ma ho manang las nian!
3:16 Alai dibahen na danggoldanggol sisilon ho, so haru ngali, so haru las, utahononku ma ho sian pamanganku.
3:17 Ai didok ho: Na mora do ahu jala paradongan, ndang hurangan ahu. Ndang diboto ho, na parir do ho hape jala na dangol, na pogos, na mapitung jala na marsaemara.
3:18 Huapoi ma ho, manuhor sian Ahu sere naung pinapita ni api, anggiat tutu mamora ho, nang abit na saksak siuloshononmu, unang patar hailaonmu di parsaemaraonmi, nang miak mamiahi matami, asa marnida ho!
3:19 Ai nasa na huhaholongi, angka i do hupinsang jala huajar. Antong, haringkothon ma na paubahon roha!
3:20 Ida ma, na jongjong do Ahu di jolo pintu i manuktuhi; ia adong na tumangihon soarangku dohot mangungkap pintu i, bongot ma Ahu tu ibana, mangan ma Ahu rap dohot ibana, jala ibana rap dohot Ahu.
3:21 Padirionku ma tu na monang i hundulan di habangsangku rap dohot Ahu; songon Ahu, dung monang, hundul rap dohot Damang di habangsana i.
3:22 Ditangihon na marpinggol ma na nidok ni Tondi i tu angka huria!

Leave a comment

Filed under 2 Padan Na Imbaru, 66 Pangungkapon

Pangungkapon 4

4:1 Dung salpu i, hubereng ma, jadi ida ma, ungkap do sada pintu di banua ginjang, jadi mangkuling ma soara, naung hubege mangkatai dohot ahu di mulana i, songon soara ni sarune, didok ma: Nangkok ma ho tuson, asa hupatuduhon tu ho na naeng masa, dung salpu angka ari on.
4:2 Jadi mamintor di bagasan tondi ma ahu: Adong ma habangsa sada di banua ginjang, jadi adong do na mangkunduli habangsa i.
4:3 Ia na hundul i, songon mata intan Jaspis dohot Sardion do idaon rupana; dihaliangi halibutongan do habangsa i, na songon mata intan Samara rupana.
4:4 Humaliang habangsa i adong ma duapulu opat habangsa, juguhan ni duapulu opat sintua, angka parabit na saksak jala martumpal sere di ulunasida.
4:5 Na ruar do sian habangsa i angka hilap dohot soara na mardoromdorom dohot ronggur; galak do pitu parpalitoan api di jolo ni habangsa i, i ma na pitu Tondi ni Debata.
4:6 Di jolo ni habangsa i adong ma songon laut sorminan, suman tu kristal (galas), jala di parsitongaan ni habangsa i dohot humaliang habangsa i adong ma opat parngolu, angka na marmata torop, di jolo nang di pudi.
4:7 Ia parngolu parjolo suman do tu singa, ia parngolu paduahon suman tu jonggi, ia na patoluhon marbohi songon jolma, ia na paopathon suman tu pidong raja ualu na habang.
4:8 Adong di ganup parngolu na opat i onom habonghabongna be, na marmata do nasida humaliang dohot di bagasan; ndang maradian nasida arian dohot borngin, mandok: Na badia, na badia, na badia do Tuhan Debata, Sigomgom saluhutna, naung adong hian, Siparngolu i, na naeng ro!
4:9 Disi dilehon angka parngolu i hasangapon dohot hamuliaon dohot hamauliateon tu Ibana, na hundul di habangsa i, na mangolu ro di salelenglelengna,
4:10 jalo ma manungkap sintua na duapulu opat i di jolo ni na hundul di habangsa i, disomba ma Parngolu sisalelenglelengna i, dipeakkon ma tumpalnasida tujolo ni habangsa i, huhut ma didok:
4:11 Ale Tuhan Debatanami, na tama do Ho manjalo hasangapon dohot hamuliaon dohot hagogoon, ai ditompa Ho do saluhutna; hinorhon ni lomo ni roham do, umbahen manjadi angka i jala tartompa!

Leave a comment

Filed under 2 Padan Na Imbaru, 66 Pangungkapon

Pangungkapon 5

5:1 Dung i huida ma di tangan siamun ni na hundul di habangsa i sada buku, naung sinuratan sian bagasan nang sian duru, naung sinahap dohot pitu sahap.
5:2 Jadi huida ma sada surusuruan na marsahala, na marsoara na gogo mamaritahon: Ise do na tau mangungkap buku i jala mangkarhari angka sahapna i?
5:3 Alai ndang adong manang ise di banua ginjang nang di tano nang di toru ni tano, na tarbahen mangungkap buku i manang marnida tubagasan.
5:4 Gabe tangis situtu do ahu, ala so adong jumpang agia ise, na tau mangungkap buku i nang marnida tubagasan.
5:5 Dung i didok sada sian angka sintua i ma mandok ahu: Unang ho tangis; nunga monang Singa i, na sian marga Juda, urat ni si Daud, laho mangungkap buku i dohot sahapna na pitu i.
5:6 Jadi di parsitongaan ni habangsa i, di tongatonga ni na opat parngolu dohot angka sintua i, huida jongjong sada Birubiru, songon naung tarbunu, pitu do tandukna jala pitu matana, i ma na pitu Tondi ni Debata, na sinuruna tu liat tano on.
5:7 Dung i ro ma Ibana, dijalo ma buku i sian tangan siamun ni na hundul di habangsa i.
5:8 Asa dung dijalo buku i, manungkap ma na opat parngolu i dohot na duapulu opat sintua i di jolo ni Birubiru i; ganup nasida maniop sada hasapi dohot sada saoan sere gok angka na hushus, i ma tangiang ni angka na badia.
5:9 Diendehon nasida ende na imbaru, ninna ma: Na tama do Ho manjalo buku i jala mangungkap angka sahapna, ai naung tarbunu do Ho jala marhitehite mudarmu ditobus Ho do tu Debata jolma sian saluhut marga, hata, houm dohot bangso.
5:10 Jala dijadihon Ho do nasida gabe harajaon hamalimon di Debatanta, asa manggomgomi nasida di atas tano i!
5:11 Dung i mamereng ma ma ahu, gabe hubege ma songon soara ni torop surusuruan humaliang habangsa i, nang soara ni angka parngolu i dohot angka sintua i; ia toropnasida marloksaloksa jala marriburibu.
5:12 Marsoara na gogo nasida mandok: Na tama do Birubiru naung tarbunu i manjalo hagogoon dohot hamoraon dohot hapistaran dohot sahala dohot hamuliaon dohot hasangapon dohot pujipujian!
5:13 Gabe hubege ma soara ni nasa na tinompa, angka na di banua ginjang, di tano, ditoru ni tano ro di na di laut, tung saluhutna na di bagasan angka i mandok: Pujipujian dohot hamuliaon dohot hasangapon dohot hagogoon ro di salelenglelengna ma di Ibana, na hundul di habangsa i dohot di Birubiru i!
5:14 Jadi didok na opat parngolu i ma: Amen! Laos manungkap ma angka sintua i huhut marsomba.

Leave a comment

Filed under 2 Padan Na Imbaru, 66 Pangungkapon

Pangungkapon 6

6:1 Dung i huida ma, diungkap Birubiru i ma sada sahap sian na pitu i, jadi hubege ma sada sian parngolu na opat i marsoara songon ronggur mandok: Ro ma ho!
6:2 Dung i hubereng, jadi adong ma hoda sihapaspili; na marsior do na mangkunduli hoda i, dilehon do tu ibana tumpal, laos borhat do ibana marhamonangan, asa monang.
6:3 Jadi dung diungkap sahap paduahon, hubege ma parngolu paduahon mandok: Ro ma ho!
6:4 Dung i ruar ma hoda na asing, na rara songon api; dilehon ma tu na mangkunduli hoda i huaso mambuat dame sian tano on, asa masiseatan, laos dilehon ma podang na balga tu ibana.
6:5 Jadi dung diungkap sahap patoluhon, hubege ma soara ni parngolu patoluhon mandok: Ro ma ho! Jadi huida, adong ma hoda sada na birong; ditiop na mangkunduli hoda i do sada dasing di tanganna.
6:6 Jadi hubege do songon soara di tongatonga ni na opat parngolu i mandok: Sasolup eme sahupang, jala tolu solup eme na rara sahupang; ia miak dohot anggur, unang hahua!
6:7 Jadi dung diungkap sahap paopathon, hubege ma soara ni parngolupaopathon mandok: Ro ma ho!
6:8 Jadi hubereng, gabe adong ma hoda sada silansat; ia goar ni na mangkunduli hoda i, hamatean do, jala mangihut do tu ibana banua toru; jadi dilehon do di nasida huaso tu saparopat ni pangisi ni tano on, mamusa nasida marhitehite podang dohot haleon dohot hamatean hian nang marhitehite binatang angka na di tano on.
6:9 Jadi dung diungkap sahap palimahon, huida ma ditoru ni langgatan i tondi ni angka naung sineat, ala ni hata ni Debata dohot ala ni pangkatindangkonnasida.
6:10 Na marsoara na gogo do nasida manjoujou, angka ninna ma: Sadia leleng nari, ale Tuhan na badia jala na sintong, asa manguhumi Ho jala mangaluluhon mudarnami tu angka na mangingani tano i?
6:11 Gabe dilehon ma tu ganup nasida abit na saksak, jadi didokkon ma nasida maimaima sangombas nari, paima tumpu nang angka dongannasida naposo, angka hahaangginasida, angka sipusaon dope songon nasida.
6:12 Jadi huida, dung diungkap sahap paonomhon: Masa ma lalo bolon, gabe mamirong ma mata ni ari songon harung hori, jadi sandok bulan i songon mudar.
6:13 Jala mardekdehan ma bintang angka na di langit i tu tano, songon di hau antajau, na mameuthon parbuena, ia jumpa hinutur ni alogo na gogo.
6:14 Jadi dibalun ma langit i songon surat na binalun, meret ma nasa dolok dohot pulo sian inganannasida.
6:15 Gabe martabuni ma angka raja ni tano on dohot angka na sangap, angka induk ni soldadu, angka na mora dohot angka na gogo, angka anak somang nang angka anak mata: Martabuni be ma tu angka liang dohot batu na di dolok.
6:16 Gabe didok nasida ma tu angka dolok dohot batu: Tinggang i jala hungkupi hamu ma hami maradophon bohi ni na hundul di habangsa i dohot maradophon rimas ni Birubiru i!
6:17 Ai nunga ro ari ni rimasnasida na balga i; tung ise tartahan i?

Leave a comment

Filed under 2 Padan Na Imbaru, 66 Pangungkapon

Pangungkapon 7

7:1 Dung salpu i, huida ma opat surusuruan jongjong di na opat desa ni tano i, angka na maniop na opat alogo ni tano i, asa unang mangombus alogo di tano, nang di laut nang tu sada hau pe.
7:2 Dung i huida ma surusuruan na asing hehe sian habinsaran ni mata ni ari, na maniop sahap ni Debata na mangolu, jadi balga ma soarana manjouhon dompak surusuruan na opat i, angka naung manjalo sahala mangago tano dohot laut.
7:3 Ninna ma: Unang ma ago hamu tano nang laut nang angka hau, paima husahapi hami angka naposo ni Debatanta di bohinasida be!
7:4 Laos hubege do bilangan ni angka na tarsahap i: Saratus opatpulu opat ribu sian saluhut marga ni halak Israel:
7:5 Sian marga Juda sampuludua ribu angka na tarsahap, sian marga Ruben sampuludua ribu, sian marga Gad sampuludua ribu,
7:6 sian marga Aser sampuludua ribu, sian marga Naptali sampuludua ribu, sian marga Manasse sampuludua ribu,
7:7 sian marga Simeon sampuludua ribu, sian marga Lepi sampuludua ribu, sian marga Isasar sampuludua ribu,
7:8 sian marga Zebulon sampuludua ribu, sian marga Josep sampuludua ribu, sian marga Benjamin sampuludua ribu angka na tarsahap.
7:9 Dung salpu i, adong ma hubereng mansai torop, na so dapot bilangan ni jolma, sian nasa bangso, marga dohot houm dohot hata, angka na jongjong diadopan ni habangsa i dohot di adopan ni Birubiru i, angka na maruloshon abit na saksak jala na maniop maremare di tangannasida.
7:10 Gogo ma soaranasida manjoujou, angka ninna ma: Tua ma di Debatanta, na mangkunduli habangsa i, dohot di Birubiru i!
7:11 Jadi jongjong ma saluhut surusuruan i humaliang habangsa i dohot humaliang angka sintua i dohot parngolu na opat i, dung i manungkap ma nasida di jolo ni habangsa i huhut marsomba tu Debata.
7:12 Ninna nasida ma: Amen! Pujipujian dohot hasangapon dohot hapistaran dohot hamauliateon dohot hagogoon dohot hatoguon ma di Debatanta ro di salelenglelengna! Amen.
7:13 Dung i mangalusi ma sada sian angka sintua, didok ma mandok ahu: Ise do angka i; jala sian dia do ro angka na maruloshon abit na saksak i?
7:14 Jadi hudok ma mandok ibana: Ale tuanku, ho do umbotosa. Gabe didok ma tu ahu: I ma angka naung ro sian haporsuhon godang; nunga diburi nasida abitnasida jala dipasaksak di bagasan mudar ni Birubiru i.
7:15 Ala ni i sai di jolo ni habangsa ni Debata do nasida, mangoloi Ibana arian dohot borngin di bagasan jorona i, jala Ibana, na mangkunduli habangsa i, ma paulihon inganan di atasnasida.
7:16 Ndang be male nasida, ndang be mauas, ndang be ditinggang las ni ari nasida, manang dia na mohop pe.
7:17 Ai parmahanon ni Birubiru na di parsitongaan ni habangsa i do nasida jadi togihononna ma nasida tu angka mual aek hangoluan, jadi apusan ni Debata nasa iluilu sian matanasida.

Leave a comment

Filed under 2 Padan Na Imbaru, 66 Pangungkapon