I Raja-raja 1

1:1 Jadi dung sarimatua raja Daud, ndang olo las dagingna, atik pe diborhos ibana dohot angka ulos.
1:2 Jadi ro ma hata ni angka naposona mandok tu ibana: Denggan nian niluluan di tuanku sada boruboru namarbaju na tongtong jongjong di adopan ni rajai, marhaladoi, jala modom di abinganmu, asa las tuanku.
1:3 Jadi dilului nasida ma sada boruboru namarbaju na uli di sandok gomgoman Israel, gabe jumpang nasida ma si Abisag sian Sunem, jala diboan boruboru i tu jolo ni rajai.
1:4 Alai na uli situtu do boruboru namarbaju i, gabe parhalado di rajai jala pauliuli ibana; alai ndatung ditopot rajai nasida.
1:5 Alai ro ma si Adonia, tubu ni Nai Haggit, patimbotimbo dirina, ninna ma: Ahu do patut gabe raja! Gabe didokkon ma paulihon di ibana hureta dohot angka jolma parsihundul dohot limapulu halak angka na mardalan di jolona.
1:6 Alai ndang dung marsak ibana dibahen amana, saleleng mangolu ibana, tung pola dohononna: Boasa tung songon i bahenonmu? Angkup ni na uli situtu do rupana; jala ditubuhon inana ibana umpudi sian si Absalom.
1:7 Dung i marsatahi ma ibana dohot si Joab, anak ni Nai Seruia, rap dohot malim Abiatar, angka na mangurupi paihuthon tahi ni si Adonia.
1:8 Alai anggo malim Sadok dohot si Benaia, anak ni si Joiada dohot panurirang Natan dohot si Simei dohot si Rei, ro di angka ulubalang ni si Daud, ndang marsatahi dohot si Adonia.
1:9 Dung i dipelehon si Adonia ma angka birubiru dohot lombu dohot pinahan na pinamokmok di lambung batu Sohelet, mardonokkon sumur Enrogel, jala dipio saluhut anggina, angka anak ni rajai, ro di sude halak Juda, angka naposo ni rajai.
1:10 Alai anggo panurirang Natan dohot si Benaia dohot angka ulubalang, dohot si Salomo anggina i, ndang dipio.
1:11 Dung i ninna si Natan ma mandok si Batseba, ina ni si Salomo: Atehe, ndang dibege ho naung bangkit raja si Adonia, tubu ni Nai Haggit? Jala tuanta si Daud ndang umbotosa.
1:12 On pe ro ma ho, naeng ahu marsipaingot tu ho, asa malua hosam dohot hosa ni anakmu si Salomo.
1:13 Laho ma ho manopot raja Daud, jala dok ma tu ibana: Nda nunga disumpahon ho, ale rajanami tu naposom boruboru, pola nimmu: Ingkon si Salomo, anakmu gabe raja singkathu, jala ingkon ibana hundul di atas habangsangku? Boasa ia nuaeng si Adonia bangkit raja?
1:14 Ida ma, tagan mangkatai dope ho disi dohot rajai, ro ma ahu masuk sian pudim paujungkon angka hatam.
1:15 Jadi masuk ma si Batseba manopot rajai tu bilut. Alai nunga matua situtu anggo rajai, jala si Abisag sian Sunem marhaladoi di adopan rajai.
1:16 Dung i dipaunduk si Batseba ibana marsomba tu rajai. Alai ninna rajai ma: Aha di ho huroha?
1:17 Jadi ninna nasida ma mandok ibana: Ale tuanku, nunga pola disumpahon ho tu Jahowa, Debatam, marbagahon tu naposom boruboru: Ingkon si Salomo, anakmi gabe raja singkathu, jala ingkon ibana juguk di atas habangsangku.
1:18 Hape ia nuaeng, ida ma, nunga ro si Adonia, bangkit raja, ia ho ale rajanami, ndang parbinoto disi!
1:19 Nunga pola dipelehon ibana angka jonggi dohot pinahan na pinamokmok dohot birubiru mansai deak, jala dipio saluhut anak ni rajai, dohot malim Abiatar dohot si Joab, partogi ni angka parangan; alai anggo si Salomo naposom, ndang dipio.
1:20 Alai sai tu ho do, ale rajanami, nolnol mata ni sandok Israel, asa dipabotohon ho tu nasida manang ise ingkon juguk di atas habangsa ni tuanku, gantina.
1:21 Alai ia dung monding tuanku, gabe top dohot angka ompuna, ingkon ahu dohot anakmu si Salomo gabe pardosa, pola marutang hosa.
1:22 Alai ida ma, tagan mangkatai dope nasida dohot rajai, ro ma panurirang Natan.
1:23 Jadi marboaboa ma halak tu rajai songon on: Ida ma, disi do panurirang Natan. Jadi dung sahat ibana tu jolo ni rajai, manungkap ma ibana tu tano di jolo ni rajai.
1:24 Dung i ninna si Natan ma: Atehe ale rajanami, nunga didok ho huroha: Ingkon si Adonia gabe raja singkathu, jala ingkon ibana juguk di atas habangsangku?
1:25 Ai nunga pola tuat ibana sadarion, jala nunga dipelehon angka jonggi dohot birubiru na pinamokmok mansai deak, jala nunga dipio saluhut anak ni rajai, ro di angka partogi ni parangan dohot malim Abiatar; jala ida ma, mangan minum do nasida di jolona, huhut didok nasida: Horas ma raja Adonia!
1:26 Alai anggo ahu naposomon dohot malim Sadok dohot si Benaia, anak ni si Joiada dohot naposom si Salomo, ndang dipio.
1:27 Aturan sian ho do i ulaning, ale rajanami, alai tahe so adong dipabotohon ho tu naposomon, manang ise ingkon juguk di atas habangsa ni tuanku, bahen gantina?
1:28 Dung i ninna raja Daud ma mangalusi: Gora hamu si Batseba ro tu ahu. Jadi ro ma nasida tu jolo ni rajai, laos tindang di adopan ni rajai.
1:29 Dung i marsumpa ma rajai, ninna ma: Songon sintongna mangolu Jahowa, naung palua hosangku sian nasa hagogotan.
1:30 Ingkon hombar tu naung husumpahon tu Jahowa, Debata ni Israel marbagahon tu ho: Ingkon si Salomo, anakmi gabe raja singkathu, jala ingkon ibana juguk di atas habangsangku, gontingku, ingkon songon i bahenonku sadarion.
1:31 Jadi marsomba ma si Batseba, pola manungkap tu tano di jolo ni rajai mandok mauliate: Sai horas ma tuanku, raja Daud ro di salelenglelengna!
1:32 Dung i ninna raja Daud ma: Gora hamu ro tu ahu malim Sadok dohot panurirang Natan dohot si Benaia, anak ni si Joiada. Jadi dung sahat nasida tu jolo ni rajai.
1:33 Ninna rajai ma mandok nasida: Arahon hamu ma angka naposo ni tuanmuna, jala pahundul hamu ma anakku si Salomo tu halodengku na marsahe, jala togihon hamu ibana tuat tu Gihon.
1:34 Ingkon dimiahi malim Sadok dohot panurirang Natan ibana disi bahen raja gumomgom Israel, jala palu hamu sarune, huhut dohononmu ma mangolophon: Horas ma raja Salomo!
1:35 Dung i nangkok hamu muse mangihuthon ibana, asa ro ibana jala hundul di atas habangsangku, jala ibana gabe raja singkathu; ai nunga hutodo ibana hian bahen partogi manguluhon anak Israel dohot Juda.
1:36 Dung i ninna si Benaia, anak ni si Joiada ma mangalusi rajai: Amen! Boti ma dohonon ni Jahowa, Debata ni tuanku!
1:37 Songon na nidonganan ni Jahowa tuanku na sai laon, suang songon i ma nian dongananna dohot si Salomo, tumimbul dope tahe dibahen habangsana, sian habangsa ni tuanku raja Daud.
1:38 Jadi tuat ma malim Sadok dohot panurirang Natan dohot si Benaia, anak ni si Joiada dohot angka hupas dohot rundo, jala dipahundul nasida si Salomo tu halode ni raja Daud, asa manogihon ibana tu Gihon.
1:39 Dung i dibuat malim Sadok ma sahan parmiahan sian undungundung i, laos dimiahi ma si Salomo. Dung i dipalu nasida ma sarune, jala sahata sandok na torop i mangolophon: Horas ma raja Salomo!
1:40 Dung i nangkok ma sandok na torop i mangihuthon ibana laos umpalui angka parhinaloan jala marlas ni roha godang, pola mardorom tano i dibahen suraknasida.
1:41 Jadi dibege si Adonia dohot sude angka na piniona i, angka na rap dohot ibana, jala ipe sun nasida mangan. Alai dung dibege si Joab soara ni sarune, ninna ma: Na marhua do soara hagunturon di huta i?
1:42 Alai mangkatai dope ibana ida ma, nunga ro si Jonatan, anak ni malim Abiatar. Jadi ninna si Adonia ma: Masuk ma ho, ai jolma haposan do ho, jala barita na uli do tagamon na binoanmi.
1:43 Alai ninna si Jonatan ma mangalusi si Adonia: Tongon do nian, alai tahe nunga dipabangkit tuanta raja Daud si Salomo gabe raja!
1:44 Jala nunga disuru rajai bahen donganna malim Sadok dohot panurirang Natan dohot si Benaia, anak ni si Joiada ro di angka hupas dohot rundo, angka na pahundul ibana tu halode na marsahe hinundulan ni rajai.
1:45 Angkup ni nunga dimiahi malim Sadok dohot panurirang Natan ibana di Gihon bahen raja, jala marlas ni roha nasida nangkok sian i, pola tung guntur huta i. I ma soara surak na binegemuna i.
1:46 Angkup ni nunga hundul si Salomo di atas habangsa harajaon.
1:47 Nunga masuk huhut angka naposo ni rajai laho mamasumasu tuanta raja Daud, angka didok do: Dumenggan muse dope nian barita ni si Salomo sian baritam, tumpahon ni Debatam, jala tumimbul habangsana sian habangsami! Nunga pola martangiang rajai di atas podomanna.
1:48 Angkup ni nunga pola songon on hata ni rajai: Pinuji ma Jahowa, Debata ni Israel, na marbasabasahon sadarion sahalak na juguk di atas habangsangku, sanga dope matangkon marnidasa.
1:49 Jadi godoron jala hehe be sude jolma na pinio, angka na rap dohot si Adonia, laho be nasida masitondong tondongonna.
1:50 Alai tahuton ma si Adonia mida si Salomo, dibahen i hehe ma ibana laos laho mangkaol angka tanduk ni langgatan.
1:51 Dung i tarbortik ma tu si Salomo didok halak: Ida ma, tahuton do si Adonia mida raja Salomo, jala ida ma, dihaol ibana do angka tanduk ni langgatan, ninna do: Aut olo ma nian raja Salomo marsumpahon tu ahu sadarion, paboa na so bunuonna ahu naposona marhitehite podang.
1:52 Dung i ninna si Salomo ma: Molo tung lidang rohana, na so tupa marurus obukna nanggo sada tu tano; alai molo tung jumpang tahi jahat di bagasan ibana, ingkon marutang hosa ibana!
1:53 Dung i disuru raja Salomo ma suruanna mangalapi ibana mijur sian langgatan i. Jadi dung ro marsinggang ma ibana tu jolo ni raja Salomo. Alai ninna si Salomo ma mandok ibana: Laho ma ho muli tu jabum!

I Raja-raja 2

2:1 Jadi dung lam jonok ajal ni si Daud laho mate, martona ma ibana tu anakna si Salomo, ninna ma:
2:2 Na laho ma anggo ahu tumopot dalan ni saluhut manisia isi ni tano on. Antong marsihohot ma roham jala pir tondim.
2:3 Jala radoti pangoloion tu Jahowa Debatam, asa marparange ho di angka dalanna laho mangaradoti angka patikna, angka tonana, angka uhumna dohot angka panindangionna, hombar tu na tarsurat di bagasan patik ni si Musa, asa marbisuk ho di sude sibahenonmu dohot di sude na tinembak ni roham disi.
2:4 Asa dipahot Jahowa hatana, na pinarbagabagana tu ahu, uju nidokna: Molo diramoti angka anakmu angka dalannasida, marparange nasida di jolongku di bagasan hasintongan sian nasa rohanasida dohot sian nasa ateatenasida, na so tupa tos sian ho baoa na hundul di habangsa ni Israel, ninna.
2:5 Angkup ni tangkas do diboto ho na binahen ni si Joab, anak ni Nai Seruia tu ahu, na binahenna tu na dua partogi ni parangan ni Israel, tu si Abner tahe, anak ni si Ner, dohot tu si Amasa, anak ni si Jeter, na binununa, jala mandurushon mudar parporangan di demak ni tahi, jala marsapu mudar parporangan dibahen hohosna na di gontingna, dohot sipatuna na di patna!
2:6 Antong bahen ma hombar tu hapistaranmu, unang loas ubanna marsonangsonang tuat tu parbeguan.
2:7 Alai anggo tu angka anak ni si Barsilai, halak Gilead i, ingkon bahenonmu ma asi ni roha, loas ma nasida saor tu angka jolma sisada panganan dohot ho, ai songon i do panomunomunasida tu ahu, uju na maporus ahu maradophon si Absalom hahami.
2:8 Jala ida ma, di lambungmi do si Simei, anak ni si Gera, halak Benjamin, sian Bahurim, ibana mambuburahon tu ahu bura na sogir uju di ari hapoporushu tu Mahanaim. Hape tuat ibana muse manjumpangkon ahu tu topi ni Jordan, pola husumpahon uju i tu Jahowa marbagahon tu ibana: Ndang bunuonku ho marhitehite podang.
2:9 Alai anggo nuaeng, unang lias ibana bahen sian uhum, ai baoa na pistar do ho, jala botoonmu do manang aha sibahenonmu tu ibana, ingkon marabul mudar ubanna tuat tu parbeguan bahenonmu.
2:10 Dung i monding ma si Daud, gabe top dohot angka ompuna, jala tartanom di huta ni si Daud.
2:11 Alai anggo lelengna mangarajai si Daud di Israel, opatpulu taon do. Pitu taon lelengna ibana mangarajai di Hebron, jala tolupulu tolu taon lelengna ibana mangarajai di Jerusalem.
2:12 Jadi si Salomo i saut juguk di atas habangsa ni si Daud, amana i, jala lam hot situtu do harajaonna i.
2:13 Dung i ro ma si Adonia, anak ni Nai Haggit, mandapothon si Batseba, ina ni si Salomo. Jadi didok si Batseba ma: Beha dame do na hinarohonmi? Dame ma tutu ninna!
2:14 Dung i ninna ma: Adong hata sidohononku tu ho. Antong dok ma! ninna nasida.
2:15 Jadi didok ibana ma: Diboto ho do patut tu ahu do harajaon i, jala nolnol tu ahu do bohi ni sandok Israel, parajahon ahu nian; hape anggo nuaeng nunga bali harajaon i jala sahat tu anggingki; Jahowa do tutu patongonhon tu ibana.
2:16 Nuaeng pe, sada sambing pangidoan na hupangido sian ho, unang tung tarila bohingku bahen. Jadi didok nasida ma mandok ibana: Antong paboa ma!
2:17 Dung i ninna ibana ma: Ua pangkulingi jolo raja Salomo i, ai ndang tagamon pailaonna bohim, asa dilehon tu ahu nian si Abisag sian Sunem bahen jolmangku.
2:18 Jadi ninna si Batseba ma: Denggan, hupangkulingi pe rajai taringot tu ho.
2:19 Dung i ditopot si Batseba ma raja Salomo, naeng mangkatai dohot ibana taringot tu si Adonia. Jadi hehe ma rajai manjumpangkon laos marsomba dompak nasida, laos hundul ibana tu habangsana. Didokkon huhut boanon sada habangsa di ina ni rajai, asa hundul di siamunna.
2:20 Dung i ninna si Batseba ma: Adong do pangidoan sada na metmet na hupangido tu ho, unang tung paila ahu. Jadi ninna raja ma mandok nasida: Pangido ma, ale inang, ai ndang pailaonku bohim.
2:21 Jadi ninna si Batseba ma: Nilehon nian si Abisag sian Sunem tu hahami si Adonia bahen jolmana.
2:22 Dung i ninna raja Salomo ma mangalusi inana i: Boasa tung ho mangidohon si Abisag sian Sunem di si Adonia? Pangido tagonan huhut harajaon i di ibana, ai dahahang hian do ibana, jala dingkan ibana do malim Abiatar dohot si Joab, anak ni Nai Seruia.
2:23 Dung i marsumpa ma raja Salomo tu Jahowa, ninna ma: Ingkon songon i bahenon ni Debata tu ahu, jala patambaonna dope songon i! Ingkon marutang hosa si Adonia ala ni hatana on!
2:24 On pe, songon sintongna mangolu Jahowa, na pahot ahu, jala pahundul ahu tu atas habangsa ni damang si Daud, jala na pauli di ahu sada bagas, songon na pinarbagabagana i: Ingkon sadarion dope mate si Adonia!
2:25 Dung i disuru raja Salomo ma si Benaia, anak ni si Joiada na maniham ibana, asa mate.
2:26 Anggo tu malim Abiatar, didok rajai ho: Laho ma ho tu Anatot, topot ma ladangmu, ai baoa na marutang hosa do ho nian; alai ndang dope bunuonku ho anggo sadarion, ala naung niusungmu poti ni Tuhan Jahowa di adopan ni damang si Daud, jala ala naung sapardangolan ho dohot damang na jolo.
2:27 Jadi dibuangkon si Salomo ma anggo si Abiatar i, asa unang be malim ni Jahowa ibana, jadi sintong ma hata ni Jahowa, naung nilumbahonna hian taringot tu pinompar ni si Eli di Silo.
2:28 Dung i sahat ma barita i tu si Joab (ai nunga marbalik si Joab mangihuthon si Adonia, ndang nian marbalik ibana anggo mangihuthon si Absalom na jolo). Jadi maporus ma si Joab tu undungundung ni Jahowa, jala dihaol angka tanduk ni langgatan.
2:29 Dung i adong ma na paboahon tu raja Salomo, naung maporus si Joab tu undungundung ni Jahowa, jala ida ma, di lambung ni langgatan i do ibana. Jadi disuru si Salomo ma si Benaia, anak ni si Joiada, ninna ma: Laho ma ho, tiham ibana tusi! ninna.
2:30 Jadi dung sahat si Benaia tu undungundung ni Jahowa, ninna ma mandok ibana: Songon on do hata ni rajai: Ruar ma ho! Gabe ninna ibana: Ndang, ai tagonan dison ahu mate. Jadi dipaboa si Benaia muse hata i tu rajai: Songon on do hata ni si Joab, jala songon on do alusna tu ahu.
2:31 Dung i didok rajai ma tu ibana: Bahen ma songon na nidokna i, tiham ma ibana jala tanom, asa dipurpurhon ho sian ahu dohot sian pinompar ni damang sapata ni mudar na so marpipot, na nidurushon ni si Joab.
2:32 Asa manginona tu uluna bahenon ni Jahowa mudarna, ala tinihamna dua halak na ubanon jala na dumenggan marroha sian ibana, laos dibunu nasida marhitehite podang, so pamotoan ni damang si Daud, i ma si Abner, anak ni si Ner, partogi ni parangan ni Israel dohot si Amasa, anak ni si Jeter, partogi ni parangan ni Juda.
2:33 Asa marsibalik sapata ni mudarnasida manginona tu ulu ni si Joab dohot tu ulu ni pinomparna ro di salelenglelengna; alai anggo si Daud, dohot pinomparna ro di isi ni bagasna dohot habangsana, ingkon maruli dame sian Jahowa ro di salelenglelengna.
2:34 Jadi nangkok ma si Benaia, anak ni si Joiada, ditiham ma ibana laos mate; gabe tartanom ibana di bagasan jabuna di halongonan.
2:35 Dung i dipabangkit rajai ma si Benaia, anak ni si Joiada bahen singkatna, manguluhon angka parangan i, huhut dipabangkit rajai malim Sadok, singkat ni si Abiatar.
2:36 Dung i disuru rajai ma mangalapi si Simei, ninna ma mandok ibana: Pauli ma di ho sada bagas di Jerusalem, asa maringan ho disi, jala unang ruar ho sian i laho manang dompak dia.
2:37 Ai sadari ho ruar jala manaripari batang aek Kidron, ingkon boto hian, sai na mate do ho; manginona tu ulum ma sapata ni mudarmu!
2:38 Dung i ninna si Simei ma mandok rajai: Denggan do hata i, songon na nidok ni tuanku, ingkon songon i bahenon ni naposomon. Jadi maringan ma si Simei di Jerusalem, pola na nia lelengna.
2:39 Hape dung salpu tolu taon lintun ma dua naposo ni si Simei tu si Akis, anak ni si Maaka, raja sian Gat. Jadi adong ma na paboahon tu si Simei songon on: Ida ma, di Gat do angka naposom.
2:40 Jadi laho ma si Simei, dipalanoi ma halodena, asa laho ibana tu Gat manopot si Akis naeng mangalului naposona. Jadi dung sahat si Simei, diboan ma angka naposona mulak sian Gat.
2:41 Dung i adong ma na paboahon tu si Salomo naung laho si Simei sian Jerusalem tu Gat, jala mulak muse.
2:42 Jadi disuru rajai ma mangalapi si Simei, ninna ma mandok ibana: Nda nunga pola hupatolon ho tu Jahowa, jala huhatindangkon tu ho songon on: Sadari ruar ho jala laho manang dompak dia, boto hian ma, ingkon mate ho! Pola didok ho uju i tu ahu: Denggan hata i hubege.
2:43 Boasa tung so ingotonmu uari tu Jahowa dohot tona na hutonahon i tu ho?
2:44 Angkup ni, ninna rajai mandok si Simei: Ho pe, diboto ho do sandok hajahaton na niingot ni roham, na binahenmi tu damang si Daud. Ala ni nunga manginona hajahatonmu tu ulum, dibahen Jahowa.
2:45 Alai dapotan pasupasu anggo raja Salomo, jala hot do ia habangsa ni si Daud di adopan ni Jahowa ro di saleleng ni lelengna.
2:46 Dung i didokkon rajai ma si Benaia, anak ni si Joiada, asa ruar maniham ibana, laos mate. Jadi hot ma harajaon i dipegang tangan ni si Salomo.

I Raja-raja 3

3:1 Dung i martondong ma si Salomo tu si Firaun, raja sian Misir, dibuat ma boru ni si Firaun, jala diboan tu huta ni si Daud, paima sun pinaulina jabuna dohot joro ni Jahowa ro di parik ni Jerusalem humaliang.
3:2 Alai mamele dope uju i situan na torop i di atas robean, ai ndang dope dipajongjong joro di Goar ni Jahowa rasirasa sadarina i.
3:3 Alai holong do roha ni si Salomo mida Jahowa, marparange do ibana di angka aturan ni amana si Daud, asal mamele dope ibana di atas ni angka tambak jala manutung daupa disi.
3:4 Dung i laho ma rajai tu Gibeon, asa mamele disi, ai tambak bolon do disi; saribu pelean situtungon dipelehon si Salomo di atas langgatan i.
3:5 Apala di Gibeon ma patar Jahowa tu si Salomo di bagasan nipina bornginna i, didok Debata ma: Pangido ma manang aha silehononku tu ho.
3:6 Dung i ninna si Salomo ma: Nunga dibahen Ho asi ni roha godang tu naposom, damang si Daud, hombar tu parangena di jolomi di bagasan hasintongan, hatigoran dohot habonaron ni roha maradophon ho, jala nunga dipahot Ho di ibana asi ni roha na godangon, dilehon Ho di ibana sada anak na juguk di atas habangsana, songon na masa nuaeng.
3:7 On pe, ale Jahowa, Debatangku, nunga dipabangkit Ho naposom gabe raja singkat ni damang raja Daud; alai bajar dope ahu, ndang huboto ruhut tu balian manang di bagasan huta.
3:8 Ia naposomon di tongatonga ni bangsom do, naung pinillitmi, bangso na bolon, na so taretong jala na so habilangan dibahen deakna.
3:9 Dibahen i, lehon ma tu naposomon roha na pantas laho manguhum bangsomi, asa huboto manirang na denggan sian na roa; ai tung ise ma na tuk manguhum bangsom na marmulia on?
3:10 Dung i lomo ma roha ni Jahowa, ala songon i pangidoan ni si Salomo.
3:11 Jadi ninna Debata ma tu ibana: Ala na songon i pangidoanmi, jala ndang dipangido ho ginjang ni umur, jala ndang dipangido ho hamoraon, jala ndang dipangido ho hosa ni angka musum, roha tahe pinangidom asa tumimbang uhum.
3:12 Ida ma, bahenonku ma hombar tu hatam. Ida ma! Lehononku ma tu ho roha na bisuk jala na pantas, asa unang adong tudoshon ho sian na robi angka naung salpu i, nang na tubu muse.
3:13 Angkup ni na so pinangidom pe, lehononku do tu ho, nang hamoraon, nang hamuliaon, asa unang adong tudoshon ho nanggo sahalak di tongatonga ni angka raja saleleng ho mangolu.
3:14 Dung i molo sai tong marparange ho di angka dalanku laho mangaradoti angka patikku dohot tonangku, songon parange ni amangmu si Daud, tumpahonku ho huhut sarimatua.
3:15 Jadi dung ngot si Salomo, ida ma, nipina do hapengani. Jadi dung sahat ibana tu Jerusalem, jongjong ma ibana di jolo ni poti parpadanan ni Jahowa, jala dipelehon angka pelean situtungon, dibahen huhut angka pelean hamauliateon, jala dilehon mangan saluhut naposona.
3:16 Uju i ro ma dua parompuan sibabijalang mangalualu tu rajai, laos jongjong di jolona.
3:17 Ninna parompuan na sada ma: Santabi, ale tuanku, ia ahu dohot parompuan on maringan di sada jabu, jadi mangintubu ahu di lambungna di jabu i.
3:18 Dung i patoluarihon dung mangintubu ahu, mangintubu huhut parompuan on; jala rap hami na dua, ndang adong halak na asing di jabu i, dungkon ni hami na dua.
3:19 Dung i mate ma anak ni parompuan on borngin i, ditipa ibana uju modom.
3:20 Jadi hehe ma ibana tonga borngin, dihindat ma anakku sian lambungku, uju modom naposom boruburu, jala dipeakkon ibana tu ampuanna, ia anakna na mate dipeakkon tu ampuanku.
3:21 Jadi dung hehe ahu manogotna i laho pasusuhon anakki, gabe ida ma, nunga mate ibana. Alai hupamanatmanat ma ibana manogotna i, gabe ida ma, ndada ibana anakku na hutubuhon i.
3:22 Alai ninna parompuan na sadanari ma: Ndang songon i, ai anakku do na mangolu i, jala anakmu do na mate. Alai ninna parjolo i ma: Ndada! Ai anakmu do na mate, jala anakku do na mangolu i. Songon i nasida marbada masialusan di jolo ni rajai.
3:23 Dung i ninna rajai ma: Sadaon mandok: On do anakku na mangolu i, jala anakmu do na mate. Alai sadaan mandok: Ndada, ai anakmu do na mate, jala anakku do na mangolu i.
3:24 Jadi ninna rajai ma: Antong boan hamu ma tu ahu sada podang. Jadi dung sahat podang i tu jolo ni rajai.
3:25 Ninna rajai ma: Ponggol dua hamu ma posoposo na mangolu i, jala lehon hamu samponggol tu sadaon, jala samponggol tu sadaan.
3:26 Jadi ninna parompuan, paranak na mangolu i ma tu rajai (ai tarsunggul do holong ni rohana mida anakna i): Sombangku di ho, ale tuanku, lehon hamu ma tu nasida posoposo na mangolu i, unang tung bunu hamu ibana. Alai ninna parompuan na sadanari ma: Unang di ahu, unang di ho, ponggol hamu ma i!
3:27 Dung i ninna rajai ma mangalusi: Lehon hamu ma posoposo na mangolu i tu parompuan on, unang be bunu hamu, on do inana.
3:28 Dung i sar ma uhum na nidabu ni rajai tu sandok Israel, gabe mabiar ma nasida mida rajai, ai diida nasida do habisuhon sian Debata di bagasan ibana laho madabu uhum.

I Raja-raja 4

4:1 Jadi raja Salomo i ma gabe raja gumomgom sandok Israel.
4:2 Jala on do induk angka na pinabangkitna i: Si Azaria, anak ni malim Sadok.
4:3 Si Elihorep dohot si Ahia, anak ni si Sisa, i ma jurutulis; si Josapat, anak ni si Ahilud do panuturina.
4:4 Jala si Benaia, anak ni si Joiada, partogi ni parangan, jala si Sadok dohot si Abiatar malim.
4:5 Ia si Azaria, anak ni si Natan, induk ni angka parhalado, jala si Sabud, anak ni si Natan, aleale hasudungan ni rajai.
4:6 Jala si Ahisar induk ni angka siramoti bagas, jala si Adoniram, anak ni si Abda, induk ni halak parrodi.
4:7 Angkup ni dipabangkit si Salomo sampulu dua halak siparenta sandok Israel, angka na pasingkop sipanganon tu rajai dohot tu isi ni bagasna, sasabulan lelengna di na sataon, gonop nasida pasingkophon.
4:8 On do goargoar nasida: Anak ni si Hur di dolok Epraim.
4:9 Anak ni si Bendeker di Makas dohot di Salabim dohot di Betsemes dohot di Elon sahat ro di Betharan.
4:10 Anak ni si Benhesed di Arubot, masuk tu ibana huhut Soko ro di sandok tano Heper.
4:11 Anak ni si Amminadab di sandok banua Dor; si Tafat, boru ni si Salomo do jolmana.
4:12 Si Baana, anak ni si Ahilud di Taanak dohot Megiddo ro di sandok Betsean, marbalokkon Zaretan, tungkan toruan sian Jisreel, olat ni Betsean sahat ro di Abel Mehola, sahat ro di bariba ni Jokmeam.
4:13 Anak ni si Geber di Ramot di Gilead, masuk tu ibana do angka huta ni si Jair, anak ni si Manasse, angka na di Gilead, masuk tu ibana muse luat Argob, na di Basan; onompulu huta na bolon marparik jala marransangransang tombaga.
4:14 Si Ahinadab, anak ni si Ido di Mahanaim.
4:15 Si Ahimas di Naptali, ibana pe mambuat si Basemat, boru ni si Salomo bahen jolmana.
4:16 Si Baana, anak ni si Husai, di Aser dohot di Alot;
4:17 Si Josapat, anak ni si Parua, di Isasar.
4:18 Si Simei, anak ni si Ela, di Benjamin.
4:19 Si Geber, anak ni si Uri, di tano Gilead, di tano ni si Sihon, raja ni halak Amori dohot si Og, raja sian Basan. Sasadasa do siparenta tano i.
4:20 Mansai deak do halak Juda dohot Israel, songon horsik di pasir ni laut hinadeakna, angka na mangan minum jala marlas ni roha nasida.

I Raja-raja 5

5:1 Asa si Salomo panggomgomi di sandok harajaon, olat ni batang aek sahat ro di tano ni halak Palistim jala sahat ro di parbalohan Misir, angka na mamboan sohe jala mangoloi rodi ni si Salomo, saleleng mangolu ibana.
5:2 Alai ingkon adong bahen bohal ni si Salomo sasadari tolupulu pingkul itak na lamot dohot onompulu pingkul itak hian.
5:3 Sampulu lombu na pinamokmok dohot duapulu lombu sian jampalan dohot saratus birubiru, so padohot angka ursa dohot bedu dohot hije dohot pahanpahanan marragamragam na pinamokmok.
5:4 Ai digomgomi ibana do sandok tano di bariba ni batang aek Euprat, olat ni Tirza sahat ro di Gasa, digomgomi saluhut raja na di baribaon ni batang aek i, jala marhademahon ibana sian na humaliang.
5:5 Jadi marhasonangan ma Juda dohot Israel maringan ganup di toru ni hau anggurna be dohot di toru ni hau arana, olat ni Dan sahat ro di Berseba, saleleng mangolu raja Salomo.
5:6 Angkup ni adong di raja Salomo opatpulu ribu hajongjongan ni hoda angka sitait huretana dohot sampulu dua ribu hoda hundulan ni parangan parsihundul.
5:7 Dung i angka siparenta ondeng marbohalhon raja Salomo ro di sude angka na mangan sian meja ni raja Salomo, ganup di bulanna be, ndang adong hurang agia aha.
5:8 Tole eme dohot durame di angka hoda sitait hureta dohot hoda hundulan, diboan nasida do i tu inganan parmianan ni rajai ganup di gansina be.
5:9 Dung i dibasabasahon Debata ma tu si Salomo habisuhon dohot roha panimbangon mansai godang dohot parbinotoan godang, tudoshon horsik na di topi ni laut godangna.
5:10 Jala gumodang do habisuhon ni si Salomo sian habisuhon ni saluhut anak angka na di habinsaran dohot sian saluhut habisuhon ni halak Misir.
5:11 Umbisuk ibana tahe sian sude manisia, umbisuk sian si Etan, halak Esrahi dohot si Heman dohot si Kalkol, dohot si Darda, angka anak ni si Mahol, gabe sar baritana tu saluhut bangso parbegu humaliang.
5:12 Jala dihatahon ibana tolu ribu umpama, ia torop ni endena saribu lima do.
5:13 Diboto huhut torsahononna taringot tu angka hau, sian hau Ares na di Libanon ro di Ysop (limutlimut) na tubu di dorpi; ditorsahon huhut taringot tu angka pahanpahanan, taringot tu angka pidong, taringot tu angka gulokgulok dohot taringot tu angka dengke.
5:14 Jadi marroan ma halak sian saluhut bangso naeng umbege habisuhon ni si Salomo, sian saluhut angka raja di tano on, angka na umbege barita ni habisukonna.
5:15 Dung i disuru raja Hiram, sian Tirus ma angka naposona manopot si Salomo, ala naung binegena naung miniahan ibana bahen raja singkat ni amana; ai holong roha ni si Hiram mida si Daud saleleng mangolu ibana.
5:16 Jadi ditongoshon si Salomo ma hatana tu si Hiram, ninna ma:
5:17 Diboto ho do, na so tarbahen si Daud damang i pajongjong sada joro di Goar ni Jahowa Debatana, ala ni hamusuon angka na humaliang ibana, paima dipatunduk Jahowa nasida tu toru ni palak ni patna.
5:18 Alai anggo nuaeng nunga marhasonangan ahu humaliang dibahen Jahowa, Debatangku, ndang adong be alo nanggo sahalak, manang masa hinamago.
5:19 Dibahen i, ninna rohangku, denggan pinajongjong sada joro di Goar ni Jahowa Debatangku songon na pinorbagabaga ni Jahowa tu damang si Daud, uju nidokna: Anakmu, sipahundulonku di atas habangsamu bahen gantim, ingkon ibana pajongjong sada joro di Goarhu.
5:20 Antong dokkon ma halak angka na manaba di ahu hau Ares sian Libanon, asa tampak angka naposongku dohot angka naposom, ia upa ni angka naposom lehononku do tu ho, guru pandokmu; ai diboto ho do ndang adong anggo di tongatonganami manang ise na umboto manaba hau, songon halak Sidon i.
5:21 Jadi dung dibege si Hiram angka hata ni si Salomo i, las situtu ma rohana, ninna ma: Pinuji ma Jahowa sadarion, ala naung nilehonna tu si Daud anak sada na bisuk gumomgom bangso na bolon on.
5:22 Dung i disuru si Hiram ma suruanna manopot si Salomo mandok: Nunga hubege alana umbahen disuru ho manopot ahu; sai bahenonku do sude hombar tu lomo ni roham taringot tu hau Ares dohot taringot tu hau sampinur.
5:23 Ingkon angka naposongku patuathon hau i sian Libanon tu laut; dung i ahu mambahen angka i marrakitrakit di laut sahat ro di inganan sitonahononmu tu ahu, asa pinarade disi, jadi ripe mangalap ho. Alai ho pe ingkon bahenonmu huhut pinangido ni rohangku mangalehon bohal tu isi ni bagashu.
5:24 Jadi dilehon si Hiram ma tu si Salomo hau Ares dohot hau sampinur guru lomo ni rohana.
5:25 Alai anggo raja Salomo mangalehon tu si Hiram duapulu ribu pingkul dahanon bahen bohal ni isi ni bagasna dohot duapulu pingkul miak dahan. Songon i dilehon raja Salomo ganup taon tu si Hiram.
5:26 Dung i dibasabasahon Jahowa ma hapistaran tu raja Salomo, songon na pinarbagabagana i hian tu ibana; jadi mardame ma si Hiram dohot raja Salomo, laos umpungka parjanjian nasida na dua.
5:27 Dung i dipillit raja Salomo ma angka parrodi sian sandok Israel, ia torop ni parrodi i tolupulu ribu halak do.
5:28 Jadi disuru rajai ma nasida tu Libanon, sampulu ribu halak sagansi sasabulan lelengna, gabe sabulan nasida di atas Libanon jala dua bulan di jabuna. Jadi si Adoniram do induk ni angka parrodi i.
5:29 Angkup ni pitupulu ribu halak parhuli di raja Salomo, jala ualupulu ribu halak pandakdak batu di dolok.
5:30 So padohot induk angka na pinabangkit ni raja Salomo angka na parenta ulaon i, tolu ribu tolu ratus halak, angka na mandasdas situan na torop i mangula ulaon.
5:31 Didokkon rajai huhut nasida mangkali batu angka na bolon dohot batu angka na arga, angka na nidakdak bahen ojahan ni joro i.
5:32 Jadi rap tole ma angka pande ni raja Salomo dohot pande ni raja Hiram ro di halak Gebal i mambarbar hau dohot mandakdak batu laho marhobas bagas joro i.

I Raja-raja 6

6:1 Boho opat ratus ualupulu taon, dung ruar halak Israel sian tano Misir, jala paopattaonhon hinarajahon ni raja Salomo gumomgom Israel, di bulan Siw, i ma bulan paidua, dipungka rajai palolo joro ni Jahowa.
6:2 Ia joro na pinalolo ni raja Salomo di Jahowa, onompulu asta unjurna, jala duapulu asta bohangna, jala tolupulu asta timbona.
6:3 Ianggo emper na di adopan ni bagas joro i, duapulu asta do unjurna, mangihuthon bohang ni joro i, sampulu asta ia bohangna di adopan ni joro i.
6:4 Dipambahen huhut di joro i pandiloan angka na marhandanghandang na sosot.
6:5 Dipauli huhut di lambung dorpi ni joro i sada emper humaliang, i ma humaliang dorpi ni joro i, boti humaliang pamurnanganna dohot pudina, jala dibahen angka bilut humaliang marlampislampis.
6:6 Ia emper partoru lima asta bohangna, ai partonga onom asta bohangna, ia paitolu pitu asta bohangna; ai dipambahen do bagas joro i martagahambing humaliang, asa unang masijaloan angka i tu dorpi ni joro i.
6:7 Tole laho palolohon joro i, nunga tipak hian didakdak angka batu i, asa unang tarbege be soara ni nanggar manang tangke manang dia ulaula bosi di bagasan joro i laho palolohon.
6:8 Alai anggo pintu laho tu emper partonga dingkan siamun ni joro i do, asa marhite sian tangga na marlegotlegot manaek halak tu emper partonga, jala sian emper partonga tu emper paitolu.
6:9 Songon i ma parpaulina di joro i jala dipasidung jala dilangitlangit i joro i margulanggulang jala marpapan sian hau Ares.
6:10 Dipauli huhut sada emper di sandok haliang bagas i, lima asta timbona, jala hau Ares dipangke padomuhon tu joro i.
6:11 Dung i ro ma hata ni Jahowa tu si Salomo songon on:
6:12 Taringot tu joro on na pinalolomon: Molo marparange ho di bagasan angka patikku, jala dipatupa ho angka uhumhu, jala diradoti ho angka tonangku, jala marparange ho hombar tu angka i, jadi pahotonku ma tu ho bagabagangku, na huparbagabaga tu amangmu si Daud.
6:13 Jadi maringan ma Ahu di tongatonga ni halak Israel, jala ndang be tadingkononku bangsongku Israel.
6:14 Songon i ma parpauli ni raja Salomo di joro i, jala dipasidung.
6:15 Ia dorpi ni joro i dilampis do sian bagasan dohot papan na sian hau Ares, sian pantar ni joro i sahat ro di gulanggulang ni langitlangit di lampis do dohot hau sian bagasan, ia pantar ni joro i dilampis do dohot hau sampinur.
6:16 Ia na duapulu asta na di pudi ni joro i dilampis do dohot papan sian hau Ares, olat ni pantar tolhas ro di gulanggulang, jala dipauli ibana huhut sian bagasan sada bilut bahen partangiangan, i ma na songkal sahali.
6:17 Jala opatpulu asta unjur ni joro parbagasan i, i ma adopan ni joro i.
6:18 Dung i hau Ares tungkan bagasan ni joro i, maruhiran mutikmutik dohot bungabunga angka na mangerbang, luhutna i sian hau Ares do, ndang adong tarida batu nanggo sada.
6:19 Ia bilut partangiangan na di tongatonga ni joro i, dipauli do bahen hajongjongan ni poti parpadanan ni Jahowa.
6:20 Ia ungkuran ni bilut partangiangan i, duapulu asta unjurna, jala duapulu asta bohangna, jala duapulu asta timbona, jala dilampis do i dohot sere palangki; dibahen huhut sada langgatan sian hau Ares di jolona.
6:21 Dung i dilampis raja Salomo joro parbagasan i dohot sere palangki, jala dipagistang angka ranterante sere di jolo ni bilut partangiangan i, na nilampisanna i dohot sere.
6:22 Jadi sandok joro i dilampis do dohot sere; nang sandok langgatan na di jolo ni bilut partangiangan i dilampis do dohot sere.
6:23 Dibahen huhut di bagasan bilut partangiangan i dua kerubim sian hau jetun, sampulu asta timbona.
6:24 Jala lima asta ganjang ni habong ni kerubim na sada, jala lima asta ganjang ni habong ni kerubim na sadanari, gabe sampulu asta sian ujung ni habongna na sambariba sahat tu ujung ni habongna na sambariba nari.
6:25 Laos sampulu asta do nang kerubim na sadanari, sisada ungkuran dohot sisada rupa tahe kerubim na dua i.
6:26 Asa sampulu asta do timbo ni kerubim i sadasada.
6:27 Dung i dibahen ma angka kerubim i tu tongatonga ni joro parbagasan. Jadi dipaherbang angka kerubim i ma habongna, asa dolos habong ni na sada tu dorpi sambariba, jala habong ni kerubim na sadanari dolos tu dorpi na sambariba nari; alai masidolosan habongnasida anggo di tongatonga ni joro i.
6:28 Dung i dilampis ma angka kerubim i dohot sere.
6:29 Jala tu saluhut dorpi ni joro i humaliang diuhirhon sumansuman ni angka kerubim dohot harambir dohot bungabunga angka na mangerbang, sian bagasan dohot sian balian.
6:30 Nang pantar ni joro i dilampis do dohot sere songon i bilut parbagasan, songon i bilut parbalian.
6:31 Jala pintu haroroan tu bilut partangiangan i dibahen do marhinsuhinsu sian hau Jetun, jala tohang dohot angka tiangna i ma saparlima ni dorpi i.
6:32 Jadi dipauli ma na dua hinsuhinsu sian hau Jetun, jala diuhirhon do tusi sumansuman ni angka kerubim dohot harambir dohot bungabunga angka na mangerbang, jala dilampis do i dohot sere; dilampis huhut angka kerubim nang harambir i dohot sere.
6:33 Laos songon i dibahen di haroroan ni joro i tiang sian hau Jetun angka na pinaropat suhi.
6:34 Jala dua hinsuhinsu sian hau sampinur, jadi mordong na dua hinsuhinsu ni pintu na sada, mordong ma dohot na dua hinsuhinsu ni pintu na sadanari.
6:35 Diuhirhon huhut tusi sumansuman ni angka kerubim, harambir dohot bungabunga angka na mangerbang, jala dilampis do i dohot sere, mangihuthon une ni uhirani.
6:36 Dipauli muse alaman parbagasan, tolu rinte batu angka na nidakdak jala sarinte tiang sian hau Ares angka na niotom.
6:37 Paopattaonhon, di bulan Siw dibahen haojahan ni joro ni Jahowa.
6:38 Jala pasampulusadataonhon, di bulan Bul, i ma bulan paiualu sun ma joro i, hombar tu sandok hata ni rajai dohot sandok lomo ni rohana, asa pola pitu taon lelengna dipauli.

I Raja-raja 7

7:1 Alai anggo bagasna sandiri pola sampulu tolu taon lelengna, asa sun dipauli raja Salomo tung sandok bagasna.
7:2 Dipauli huhut bagas tombak Libanon saratus asta unjurna, limapulu asta bohangna, jala tolupulu asta timbona, ojak di atas ni opat rinte tiang sian hau Ares, jala di atas ni angka tiang i peak angka gulanggulang sian hau Ares.
7:3 Jala ditarup dohot hau Ares di ginjang ni bilut, angka na jinujung ni angka tiang, opatpulu lima bilanganna, sasampulu lima sarinte.
7:4 Jala tolu rinte angka tiang, jala pajojor angka pandiloan, tolu rinte patondong be.
7:5 Saluhut angka pintu dohot tiang pinaropat suhi do nang gulanggulang jala patondong be angka jandela tolutolu rinte.
7:6 Dipauli huhut sada emper sian tiang, limapulu asta unjurna, jala tolupulu asta bohangna, maremper muse di jolona, martiang jala marlobulobu di jolona.
7:7 Angkup ni dibahen do panisioan ni habangsa paruhuman, i ma parrapotan, pantarna dohot dorpina dilampis do dohot hau Ares.
7:8 Bagasna pe na niingananna i, marpulik alaman do tungkan bagasan sian panisioan i, suang songon i do parpaulina. Angkup ni dipauli raja Salomo muse sada bagas di boru ni raja Firaun, na binuatna bahen jolmana, suang songon i parpaulina.
7:9 Luhutna i dipauli sian batu angka na arga, angka na nidakdak marungkuran jala ginargajian sian bagasan dohot sian ruar, sian ojahan sahat ro di sumban, jala sian balian sahat ro di alaman godang.
7:10 Ojahanna pe sian batu angka na arga, jala na bolon, batu sisampulu asta dohot siualu asta unjurna.
7:11 Di atas ni muse batu angka na arga, angka na nidakdak marungkuran, dohot hau Ares.
7:12 Alai anggo di alaman godang humaliang tolu rinte batu angka na nidakdak, jala sarinte tiang sian hau Ares; suang songon i alaman parbagasan di adopan ni joro ni Jahowa, dohot emper ni bagas i.
7:13 Dung i disuru raja Salomo ma mangalapi si Hiram sian Tirus.
7:14 Anak ni parompuan na mabalu do ibana sian marga Naptali, alai anggo amana halak Tirus do, jolma pande tombaga, gok hapistaran, parbinotoan dohot marhapandean, mamandei luhut ulaula sian tombaga; jadi dung ro ibana manopot raja Salomo, tole ma dipauli saluhut ulaulana.
7:15 Dung i dijadihon ma dua tiang sian tombaga, sampulu ualu elak be timbona, jala sampulu dua elak be ganjang ni tali lilitna i humaliang.
7:16 Dipauli huhut dua uluna angka na tinuang sian tombaga, jala dibahen tu pasi ni tiang i; lima elak timbo ni ulu ni tiang i sadasada.
7:17 Dibahen huhut pinartaraoang jala, tole ranterante tu ulu ni tiang na di atas tiang i, pitu tu uluna na sada, laos pitu tu uluna na sadanari.
7:18 Dibahen huhut angka parbue ni hau dalimo, pola dua rinte humaliang gantung tu taraoangna i bahen pangkuphupi ni uluna i angka na di ginjang ni tiang i, laos songon i do parpaulina dohot di na paduahon i.
7:19 Ia ulu na di atas ni tiang i tudos do tu bunga pansur na mangerbang, opat asta tumimbo sian emper i.
7:20 Jala uluna angka na di atas ni tiang na dua i di ginjangna dope mardonokkon badanna mardonokkon pinartaraoang, adong huhut dua ratus parbue ni hau dalimo, dua rinte humaliang di ganup uluna.
7:21 Dung i dipajongjong ibana ma na dua tiang i, jonok tu adopan ni joro i; jumolo dipajongjong tiang pangiamunan, dibahen ma goarna Jakin, dipajongjong muse tiang pangambirangan, dibahen ma goarna Boas.
7:22 Ia di atas ni ulu ni tiang i adong hapandean bunga pansur na mangerbang; sun disi ma pinauli ulaon taringot tu angka tiang i.
7:23 Dung i dibahen ma sada tobat tuangan, sampulu asta bidangna sian topi na sada tu baribana tuk humaliang, jala lima asta bagasna, jala tolupulu asta lilitna humaliang.
7:24 Jala di toru ni topina adong angka mutik ni bungabunga tuk humaliang sampulu kibung di bagasan saasta humaliang tobat i; dua rinte mutik ni bungabunga tartuang di panuanganna.
7:25 Ojak do i di atas ni sampulu dua lombu, tolu uluna mandompakkon utara, tolu uluna mandompakkon pastima, tolu uluna mandompakkon dangsina, jala tolu uluna mandompakkon habinsaran, jala tobat i di atas nasida; jala ihur ni angka lombu i dompak bagasan do.
7:26 Ia hapalna santopap, jala topina hira songon topi ni panginuman songon bunga pansur na mangerbang siatsiat dua ribu bat.
7:27 Dibahen huhut sampulu tong pamurian sian tombaga, ganup pamurian i opat asta ganjangna, opat asta bidangna jala tolu asta timbona.
7:28 Alai songon on do parpaulina di pamurian i: Marbibir humaliang, jala pantarna di holangholang ni bibirna.
7:29 Ia di pantarna angka na di holangholang ni bibirna adong do sumansuman ni singa dohot lombu dohot kerubim; suang songon i di tiangna parsuhi tungkan ginjang dohot tungkan toru ni angka singa dohot lombu, adong muse hapandean ramerame.
7:30 Jala opat galapang sian tombaga di ganup pamurian, botohonna pe sian tombaga do; jala suhina na opat i marabara do; di toru ni pamurian i do angka ramerame sadasada.
7:31 Ia babana tungkan bagasan ni bibirna do saasta do tu ginjang, jala tingko do babana suman tu pat ni tiang tonga dua asta bidangna; adong do huhut di babanai hapandean na niuhir; alai anggo pantarna i pinaropat suhi do, ndada tingko.
7:32 Anggo na opat galapang i di toru ni pantarna i do jala angka botohon ni galapang i mardomu do tu pamurian i; ganup galapang tonga dua asta timbona.
7:33 Ia parpaulina di angka galapang i suman do tu galapang ni hureta hian; luhutna i na tinuang do pangordonganna, botohonna, rangarangana dohot anakanakna.
7:34 Opat abara huhut di na opat suhi ni ganup pamurian i, jala sisada tuangan do abara dohot pamurian i:
7:35 Tungkan ulu ni pamurian i tingko do humaliang arga satonga asta timbona, jala di atas ulu ni parburian i angka sitioponna, sisada tuangan dohot pantarna.
7:36 Jala diuhirhon tu papan ni sitiopanna i dohot tu papanna humaliang sumansuman ni angka kerubim, singa dohot harambir marguru tu siatna di ganup papan, jala angka ramerame humaliang.
7:37 Songon i ma parpaulina di na sampulu pamurian i, dos tuanganna, suhatna dohot rupana di na saluhutna.
7:38 Angkup ni dipauli sampulu hudon sian tombaga, siatsiat opatpulu bat di ganup hudon; opat asta do ruak ni ganup hudon i, jala di atas ni ganup pamurian na sampulu i adong hudon sada be.
7:39 Dung i dibahen do lima pamurian i tungkan siamun ni joro i, na lima nari tungkan hambirangna; alai anggo tobat i dibahen do tungkan siamun ni joro i dingkan anggoni na.
7:40 Songon i ma parpauli ni si Hiram di angka hudon, siuksiuk dohot mangkuk. Jadi sun ma dipauli si Hiram sandok ulaon na pinandeanna di raja Salomo tu joro ni Jahowa.
7:41 Na dua tiang i ro di pinarninggor ni ulu angka na di atas ni tiang na dua i dohot taraoang na dua i bahen pangkuphupi ni na pinarninggor na dua i na di atas ni ulu ni tiang i.
7:42 Tole muse na opat ratus parbue ni hau dalimo na lohot tu taraoang i duadua rinte parbue ni hau dalimo i di sada taraoang bahen pangkuphupi ni na dua pinarninggor ni ulu di atas ni tiang na dua i.
7:43 Tole muse na sampulu pamurian i dohot na sampulu hudon na di atas ni pamurian i.
7:44 Tole muse tobat i ro di na sampulu dua lombu na di toru ni tobat i.
7:45 Tole angka hudon, siuksiuk dohot mangkuk Saluhut ulaula angka na pinandean ni si Hiram di raja Salomo tu joro ni Jahowa, sian tombaga mamolin do.
7:46 Di tano tobing mardonokkon Jordan di holangholang ni Sukot dohot Zaretan; didokkon rajai tuangon luhutna i di bagasan tuangan sian tano liat.
7:47 Jala dipasombu raja Salomo saluhut angka ulaula i, ai ndang dapot dasingon borat ni tombaga i dibahen hinagodangna situtu.
7:48 Didokkon raja Salomo huhut paulion sude ulaula angka na masuk tu joro ni Jahowa, i ma langgatan sere dohot meja sere hapeahan ni sagusagu na marhadohoan.
7:49 Tole angka parpalitoan, lima tungkan siamun jala lima tungkan hambirang di adopan ni bilut partangiangan, sian sere na pita do luhut na i.
7:50 Ro di angka mangkuk dohot raut dohot saoan dohot balanga dohot pardaupaan sian sere na pita do; nang angka pangordongordongan ni pintu ni joro parbagasan, di na songkal sahali dohot pangordongordongan ni pintu ni joro i sian sere do.
7:51 Jadi sun ma sandok hapandean ni raja Salomo tu joro ni Jahowa. Dung i diboan si Salomo ma tu bagasan saluhut arta na niuras ni amana si Daud ro di perak dohot sere dohot ulaula, jala dipeakkon tu bilut parpeopan arta di joro ni Jahowa.

I Raja-raja 8

8:1 Dung i dipaluhut raja Salomo ma angka sintua ni Israel dohot sude induk ni halak Israel marmargamarga dohot marompuompu ro tu jolo ni raja Salomo di Jerusalem, naeng boanonna nangkok poti parpadanan ni Jahowa sian huta ni si Daud i ma Sion.
8:2 Jadi marluhut ma tu jolo ni raja Salomo nasa baoa di Israel di ari raya bulan Etanim, i ma bulan sipaha pitu.
8:3 Jadi dung marluhut sude sintua ni Israel, dihindat angka malim i ma poti i.
8:4 Dung i diboan nasida ma poti ni Jahowa nangkok, angkup ni undungundung parluhutan dohot sude ulaula ni habadiaon, angka na di undungundung i na sai laon, laos diboan angka malim dohot halak Lepi do i nangkok.
8:5 Jadi marudur ma raja Salomo dohot sandok luhutan ni Israel, angka na marluhut di lambungna mardalan rap dohot ibana di adopan ni poti i, huhut mamelehon angka birubiru dohot lombu, angka na so tarbilang manang taretong dibahen godangna.
8:6 Jadi sahat ma diboan angka malim poti parpadanan ni Jahowa tu hajongjonganna, tu bilut partangiangan di joro i, tu bagasan bilut na songkal sahali di toru ni habong ni kerubim na dua i.
8:7 Ai dipaherbang kerubim na dua i do habongna na dua i tu atas hajongjongan ni poti i, laos dihungkupi kerubim na dua i do poti i ro di haluhaluna sian ginjang.
8:8 Juruk do angka haluhalu i, pola dapot idaon uluna sian bilut na badia i di adopan ni bilut partangiangan, alai ndang dapot idaon anggo sian ruar, laos disi do angka i rasirasa sadarion.
8:9 Ndang adong agia aha di bagasan poti i, nda holan na dua lei batu, angka naung pineakkon ni si Musa tusi uju di Horeb, uju na binahen ni Jahowa parjanjian tu halak Israel, dung diparuar nasida sian tano Misir.
8:10 Jadi dung ruar angka malim sian bilut na badia i, ro sada ombun manggohi joro ni Jahowa.
8:11 Pola ndang manahan angka malim i jongjong marulaon na badia maradophon ombun i, ai hamuliaon ni Jahowa manggohi joro ni Jahowa.
8:12 Dung i didok raja Salomo ma: Nunga marboaboa hian Jahowa ingkon maringanan ibana di bagasan haholomon.
8:13 Antong nunga hupauli sada joro bahen parmiananmu, bahen ojahan ni habangsam ro di saleleng ni lelengna.
8:14 Dung i dipahusor rajai ma bohina asa pasupasuonna sandok luhutan Israel, jala jongjong be do sandok luhutan Israel i.
8:15 Dung i ninna rajai ma: Pinuji ma Jahowa, Debata ni Israel, naung marboaboa hian marhite sian pamanganna sandiri tu damang si Daud i, jala nunga dipasintong nuaeng marhite sian tanganna, uju na nidokna:
8:16 Olat ni ari uju Ahu manogihon bangsongku Israel ruar sian Misir, ndang dung hupillit sada huta sian sandok marga ni Israel, paulionna sada joro bahen inganan ni Goarhu; alai nunga hupillit anggo si Daud, asa ibana manggomgomi bangsongku Israel.
8:17 Nunga nian disangkap roha ni damang si Daud naeng paulionna sada joro di Goar ni Jahowa, Debata ni Israel.
8:18 Alai ninna Jahowa ma mandok damang si Daud i: Ala naung ditahi roham naeng pajongjongonmu sada joro di Goarhu, denggan do nian anggo sangkap ni roham.
8:19 Alai ndada jadi anggo ho pajongjong joro i, ingkon anakmu na ruar sian butuham, ingkon ibana pe pajongjong sada joro di Goarhu.
8:20 Nunga tung dipasintong Jahowa hatana naung pinaboana hian, jala nunga ahu dipahot singkat ni damang si Daud i, jala nunga hundul ahu di habangsa ni harajaon Israel, songon na pinaboa ni Jahowa hian, jala nunga ahu pajongjong sada joro di Goar ni Jahowa, Debata ni Israel.
8:21 Jala nunga hupadiri disi sada hajongjongan di poti i, parpeopan ni parjanjian ni Jahowa, na binahenna tu angka ompunta, uju tinogihonna nasida ruar sian tano Misir.
8:22 Dung i jongjong ma raja Salomo di adopan ni langgatan ni Jahowa mandompakkon sandok luhutan Israel, jala dipaherbang tanganna dompak langit.
8:23 Dung i ninna ma: Ale Jahowa, Debata ni Israel! Ndang adong Debata na tudoshon Ho di banua ginjang dohot di banua tonga on; Ho do tutu pahothon parjanjian dohot asi ni roha tu naposom, angka na marparange di jolom sian nasa rohana.
8:24 Ho do naung pasintongkon tu damang, naposom si Daud i hata na pinorbagabagam tu ibana; pamanganmu tutu marbagabagahon, jala tanganmu pasintongkon apala sadarion.
8:25 On pe, ale Jahowa, Debata ni Israel! Sai pasintong ma tu naposom si Daud, damang i hata naung pinorbagabagam hian tu ibana, uju na nidokmu: Ndang jadi hurangan di ho sada baoa di jolongku na hundul di atas habangsa ni harajaon Israel, asal diramoti angka anakmu dalanna, marparange nasida di jolongku songon ho naung marparange di jolongku.
8:26 On pe, ale Debata ni Israel, sai pasintong ma hatami naung pinorbagabagam tu naposom si Daud, damang i.
8:27 Alai tahe, tung tarbahen Debata ma tutu maringan di atas tano on? Ida ma, gari langit ni langitan ndang hahaliangansa Ho, baliksa apala joro on na hupauli on?
8:28 Alai sai manatap ma Ho tu tangiang ni naposom dohot tu parhurajaonna i, ale Jahowa Debatangku! Sai tangihon ma joujou dohot tangiang na tinangiangkon ni naposom di adopanmon sadarion.
8:29 Sai tonggor ma matam manatap tu joro on borngin dohot arian, tu inganan naung nidokmu: Ingkon disi do Goarhu! Antong sai tangihon ma tangiang na tinangiangkon ni naposom di inganan on.
8:30 Sai tangihon ma tutu parhurajaon ni naposomon dohot bangsom Israel, na tinangiangkonnasida di inganan on; sai tangihon ma i tutu di inganan parhabangsaanmu di banua ginjang; tangihon ma tutu jala marpamuati roham!
8:31 Tung sura mardosa sada baoa dompak donganna pola dipatolon halak ibana ala ni, sanga ibana jala saut manolon di adopan ni langgatanmon di bagasan joro on.
8:32 Sai manangi ma Ho di banua ginjang huhut marlulu asa maruli uhum angka naposom, laho manorui anggo halak parjahat, asa manginona pambahenanna tu uluna laho mamintori anggo halak parpintor mangalehon tu ibana hombar tu hatigoranna i.
8:33 Tung sura talu bangsom Israel maradophon musuna, ala naung mardosa nasida dompak Ho; alai molo mulak nasida tu Ho jala dihatindangkon Goarmu, jala martangiang nasida huhut marhuraja tu Ho di bagasan joro on.
8:34 Sai manangi ma Ho di banua ginjang jala marpamuati roham mida dosa ni bangsom Israel, jala boan nasida mulak tu tano naung nilehonmu tu ompunasida i.
8:35 Tung sura tarhinsu langit i, gabe ndang ro udan, ala naung mardosa nasida dompak Ho, dung i martangiang nasida di inganan on, jala dihatindangkon nasida Goarmu, jala mulak nasida sian dosanasida i, ala naung tarjepol nasida binahenmu:
8:36 Sai manangi ma Ho di banua ginjang, jala marpamuati roham mida dosa ni angka naposom dohot bangsom Israel, ala naung niajarhonmu tu nasida dalan na denggan i na tama sidalananna, jala lehon udan tu tanom, naung nilehonmu tu bangsom bahen partalianna.
8:37 Tung sura masa haleon di tano i manang begu antuk, manang siraraon hauma manang antinganoon manang masa sihapor manang tamponok; molo tung disosak musuna nasida di tano i pola dirongom pargumbanganna, manang tung masa begu antuk manang sahit na asing.
8:38 Nasa tangiang dohot pangidoan, manang marsasahalak, manang tung sandok bangsom Israel manangiangkonsa, ala naung mananda be di jea ni harohaonna, gabe dipaherbang tanganna dompak joro on.
8:39 Sai manangi ma Ho di banua ginjang, ojahan ni habangsam, jala marpangulahi roham, huhut marlulu dohot mangalehon tu ganup hombar tu saluhut dalanna marguru tu panandam di harohaonna, ai sasada ho do tumanda roha ni jolma manisia luhutna.
8:40 Asa tung dihabiari nasida Ho tongtong, saleleng mangolu nasida di tano naung nilehonmu tu ompunasida i.
8:41 Nang halak sileban, na so sian bangsom Israel, na ro tahe sian luat na dao ala Goarmu.
8:42 Ai begeonnasida ma barita ni Goarmu na timbul i dohot tanganmu na gogo i, dohot botohonmu na toltoli, molo ro ibana martangiang di bagasan joro on:
8:43 Sai manangi ma Ho di banua ginjang, ojahan ni habangsam, jala bahen ma hombar tu saluhut na pinangido ni halak dagang i tu Ho, asa tung saluhut bangso di tano on mananda di Goarmu jala marhabiaran tu Ho songon bangsom Israel, asa tung diboto naung sahat jinou Goarmu tu atas joro na hupauli on.
8:44 Tung sura ruar bangsom laho marporang dompak musuna di dalan sinurum nasida, jala martangiang nasida tu Jahowa dompak huta on naung pinillitmu dohot dompak joro on naung hupajongjong di Goarmu.
8:45 Sai tangihon ma tangiang dohot pangidoannasida di banua ginjang, jala pasintong uhum tu nasida.
8:46 Tung sura mardosa nasida dompak Ho (ai ndang adong jolma nanggo sada na so mardosa), gabe tarrimas Ho mida nasida, jala dipasahat Ho nasida tu musuna, asa tung tarbuang nasida tu tano ni musuna, na dao manang na jonok.
8:47 Dung i dipasuang nasida ma rohanasida tu bagasan di tano habuangannasida i, laos dipauba nasida rohanasida i, jala martangiang tu Ho di tano habuangannasida i songon on: Nunga mardosa hami, jala nunga huulahon hami hajahaton jala nunga manggunturi hami.
8:48 Molo mulak nasida tu Ho sian nasa rohanasida dohot sian nasa ateatenasida di tano ni musuna angka na mambuangkon nasida, jala martangiang nasida tu Ho mandompakkon tanonasida naung nilehonmu tu ompunasida, mandompakkon huta naung pinillitmu dohot mandompakkon joro na hupauli on di Goarmu:
8:49 Sai manangi ma Ho di banua ginjang, di ojahan ni habangsam mangalusi tangiang dohot pangidoannasida, huhut pasintong uhum tu nasida.
8:50 Jala marpamuati roham mida dosa angka naung niulahon ni bangsom dompak Ho dohot mida saluhut hajahaton angka naung binahennasida dompak Ho, jala lehon tu nasida asa maruli asi ni roha nasida maradophon halak angka na mambuangkon nasida, jala asianna nasida.
8:51 Ai bangsom do nasida jala partalianmu, angka naung tinogihonmu ruar sian Misir, sian parsitongaan ni liang pamurunan bosi.
8:52 Jala patonggor matam manatap parhurajaon ni naposom, manatap dohot parhurajaon ni bangsom Israel laho manangihon nasida taringot tu saluhut na pinangidonasida sian Ho.
8:53 Ai nunga sapala dipapulik Ho nasida sian saluhut bangso ni tano on bahen partalianmu sandiri, hombar tu naung pinorbagabagam marhite sian si Musa naposom, uju na tinogihonmu angka ompunami ruar sian Misir, ale Tuhan Jahowa.
8:54 Jadi dung sun ditangiangkon raja Salomo tu Jahowa saluhut tangiang dohot pangidoan ondeng, hehe ma ibana sian adopan ni langgatan ni Jahowa dohot sian na marsinggang i dohot sian na pinaherbangna i tanganna dompak banua ginjang.
8:55 Laos jongjong ma rajai, huhut mamasumasu sandok luhutan Israel, pola dipagogo soarana mandok songon on:
8:56 Pinuji ma Jahowa, naung mangalehon hasonangan tu bangsona Israel, hombar tu sandok naung pinarbagana i! Ndang adong tartinggal nanggo sada hata sian saluhut hatana na denggan i, naung pinaboana hian marhite sian si Musa naposona i.
8:57 Sai didongani Jahowa, Debatanta i ma hita, songon naung nidongananna angka ompunta na jolo; sai unang ma ditadingkon Ibana hita manang mambolongkon hita.
8:58 Sai ditaiti ma rohanta tu Ibana, asa marparange hita di saluhut dalanna huhut mangaradoti angka tonana dohot patikna dohot uhumna, angka naung tinonahonna tu angka ompunta i.
8:59 Jala saluhut hata pangidoan on, angka naung husombahon di adopan ni Jahowa, sai ngomngom ma i di jolo ni Jahowa, Debatanta i borngin dohot arian, asa pasintongonna uhum tu naposona dohot tu bangsona Israel, singkop ariari!
8:60 Asa tung saluhut bangso ni tano on mananda, paboa Jahowa do Debata, jala dungkon ni Ibana ndang adong.
8:61 Jala ingkon sun daulat rohamuna tu Jahowa, Debatanta i, asa marparange di bagasan angka patikna jala mangaradoti angka tonana suman songon sadarion.
8:62 Dung i dipelehon rajai rap dohot sandok bangso i ma angka pelean di adopan ni Jahowa.
8:63 Pelean hamauliateon angka na pinelehon ni raja Salomo tu Jahowa, i ma duapulu dua ribu lombu dohot saratus duapulu ribu birubiru. Songon i ma parturena dibahen rajai dohot sandok halak Israel pasahathon joro i tu Jahowa.
8:64 Laos di ari na sasada i diuras rajai parsitongaan ni alaman na di adopan ni joro ni Jahowa, ai disi do dipelehon ibana pelean situtungon dohot pelean sipanganon dohot tabotabo ni pelean hamauliateon, ai langgatan tombaga na di adopan ni Jahowa, mametmethu do i ndang siat bahen pamelean ni pelean situtungon dohot sipanganon ro di tabotabo ni angka pelean hamauliateon.
8:65 Dung i marari raya ma raja Salomo uju i rap dohot sandok Israel, luhutan na bolon, angka na ro sian Hamat sahat ro di sunge Misir marpungu di adopan ni Jahowa, Debatanta i, pitu ari jumolo, pitu ari muse gabe sampulu opat ari luhutna.
8:66 Tole paualuarihon dipamuli rajai ma halak situan na torop i laos dipasupasu nasida rajai, gabe laho nasida masitopot undungundungna be marhasonangan, jala marlas ni roha ala saluhut na denggan i, na binahen ni Jahowa tu raja Daud naposona i dohot tu Israel bangsona i.

I Raja-raja 9

9:1 Asa dung sun dipajongjong raja Salomo joro ni Jahowa dohot bagas ni rajai, ro di nasa esehesek ni raja Salomo, na hinalomohon ni rohana naeng paulionna.
9:2 Ro muse Jahowa pataridahon dirina tu raja Salomo paduahalihon, suang songon uju na niidana Ibana di Gibeon.
9:3 Dung i ninna Jahowa ma tu rajai: Nunga hutangihon tangiangmu dohot parhurajaonmu, na sinombahonmi di jolongku; jala nunga huparbadiai joro on, naung pinaulim bahen parmianan ni Goarhu ro di saleleng ni lelengna, jala ingkon disi do tongtong ariari matangku dohot rohangku marpanatap.
9:4 Molo tung marparange ho di jolongku, suang songon amam si Daud i marparange marrohahon roha hadaulaton dohot hatigoran laho patupahon sude na hutonahon i tu ho, tole angka patikku dohot uhumhu diradoti ho:
9:5 Jadi pahotonku ma habangsa ni harajaonmi gumomgom Israel ro di salelenglelengna, hombar tu naung huparbagabaga hian tu amam si Daud, mandok songon on: Ndang jadi hurang di ho sada baoa hundul di atas habangsa ni harajaon Israel.
9:6 Alai molo tung marbalik hamu manang anakmuna sogot sian Ahu, jala ndang diradoti hamu angka tonangku dohot patikku, angka naung hupeakhon di jolomuna, pola laho hamu mangoloi angka debata sileban dohot marsomba tusi:
9:7 Jadi ripashononku ma Israel sian tano naung hulehon i tu nasida, jala joro on naung huparbadiai di Goarhu, padaoongku ma i sian jolo ni bohingku, jala bahenonku halak Israel gabe pambuatan umpama dohot bahen alingalingan di tongatonga ni saluhut bangso.
9:8 Ia joro on naung timbul sahali, pola longang roha ni ganup na mamolus sian i, huhut mangarehe mandok songon on: Boasa ulaning bahenon ni Jahowa songon i tu tano on dohot tu joro on?
9:9 Dung i dohonon ni halak ma mangalusi: Ala na tinadingkonnasida i Jahowa, Debatanasida i, na manogihon ompunasida ruar sian tano Misir, gabe marparsigantungan nasida tu angka debata sileban, jala marsomba tusi, jala mangoloi disi, ala ni do umbahen diparo Jahowa luhut jea on tu nasida.
9:10 Jadi dung salpu na duapulu taon i lelengna raja Salomo i paulihon na dua bagas i, i ma joro ni Jahowa dohot bagas ni rajai.
9:11 Tinumpak ni si Hiram, raja sian Tirus mangalehon tu raja Salomo hau Ares dohot sampinur dohot sere, marguru tu sandok lomo ni rohana, gabe dilehon raja Salomo tu raja Hiram duapulu huta di laut Galilea.
9:12 Dung i borhat ma raja Hiram sian Tirus laho maningkir huta i, angka naung nilehon ni raja Salomo tu ibana, hape ndang tongon angka i tu rohana.
9:13 Pola didok: Ba apala dia ma huta on, angka naung nilehonmu tu ahu, ale anggia? Gabe digoar ma angka huta i luat Kabul rasirasa sadarion.
9:14 Ala na ditongoshon raja Hiram tu raja Salomo saratus duapulu talenta sere.
9:15 Jala songon on do parture ni parrodi on, na niampehon ni raja Salomo laho paulihon joro ni Jahowa dohot bagasna sandiri dohot Milo dohot parik ni Jerusalem ro di Hazor, Megiddo dohot Gezer.
9:16 Ai nangkok do na jolo Firaun, raja sian Misir papatu Gezer, laos disurbu dohot api, jala dibunui halak Kanaan angka na maringan di huta i, jala dilehon huta i panseang tu boruna, jolma ni raja Salomo.
9:17 Dung i dipauli raja Salomo muse huta Gezer dohot Bethoron parjae.
9:18 Dohot Baalat dohot Tamar di halongonan na di luat i.
9:19 Angkup ni saluhut huta parpeopan bohal na di raja Salomo, ro di angka huta parpunguan ni hureta porang dohot jolma parsihundul, tung guru esehesek ni roha ni raja Salomo laho paulihon di Jerusalem dohot di atas Libanon dohot di sandok tano ginomgomanna i.
9:20 Saluhut halak angka na teba sian halak Amori, Het i, Perisi, Hevi dohot Jebusi, angka na so sian halak Israel.
9:21 Ro di pinomparnasida, angka na teba i sian nasida di tano i, angka na so dapot halak Israel rendephononna, tu nasida ma diampehon raja Salomo ulaon rodi rasirasa sadarion.
9:22 Alai anggo tu halak Israel ndang diampehon raja Salomo ulaon rodi, bahen jolma parmusu do nasida, parhaladona, angka induk, angka ulubalangna dohot induk panahatan ni huretana dohot jolma parsihundulna.
9:23 On ma induk, angka na pinabangkit mamatamatahon ulaon na nidokkon ni raja Salomo, lima ratus limapulu halak toropna, angka na mandasdas halak situan na torop i mangula ulaonna be.
9:24 Jadi dung nangkok boru ni raja Firaun sian huta ni raja Daud, bongot tu jabuna naung pinauli ni rajai di nasida, pintor dipauli rajai ma dohot Milo.
9:25 Dung i tolu hali di bagasan sataon raja Salomo mamelehon angka pelean situtungon dohot hamauliateon di atas langgatan, naung pinaulina di Jahowa, huhut manutung daupa disi di adopan ni Jahowa, asa tung sun tipak joro i.
9:26 Huhut disuru raja Salomo paulihon angka kopal di Esion Geber, mardonokkon Elat, di pasir ni laut arung di tano Edom.
9:27 Dung i disuru raja Hiram ma angka naposona bahen halak parhalado di kopal, angka na somal di laut, rap dohot naposo ni raja Salomo.
9:28 Jadi sahat ma nasida tu Opir, jala diboan sian i sere opat ratus duapulu talenta, na binoanna tu raja Salomo.

I Raja-raja 10

10:1 Ia raja boruboru sian Saba, dung dibege barita ni raja Salomo taringot tu Goar ni Jahowa, ro ma nasida naeng masiujian dohot rajai marundangundang.
10:2 Jadi sahat ma nasida tu Jerusalem mardongan parangan mansai torop, tole unto, angka na mangusung na hushus marragamragam dohot sere mansai godang dohot mata intan na arga. Jadi dung ro nasida tu jolo ni raja Salomo dipaboaboa ma tu ibana saluhut na di bagasan rohana i.
10:3 Jadi dipatorang raja Salomo ma tu nasida sude sungkunsungkunna, ndang adong na buni nanggo sada sian roha ni rajai, na so pinatorangna tu nasida.
10:4 Jadi dung diida raja boruboru sian Saba luhut hapistaran ni raja Salomo dohot bagas na pinaulina i.
10:5 Tole sipanganon di mejana, tole partordingna hundul angka naposona, tole panagam ni angka parhaladona dohot pangkeannasida, tole angka sitahu anggurna, tole partanggaonna laho nangkok tu joro ni Jahowa, jadi hira na tarmali tondinasida.
10:6 Laos didok ma mandok rajai: Sintong do hape barita i na hubege di luathu taringot tu aturan binahenmi dohot taringot tu hapistaranmu.
10:7 Ndang nian diparhatongon rohangku jolo barita i paima ro ahu tuson, gabe diida matangku; hape ida ma, nanggo satongana ndang dibaritahon halak tu ahu; dilompoi hapistaranmu dohot artam do tahe barita na hubage i.
10:8 Martua ma halak naposom, martua ma halak parhaladomon, angka na tongtong jongjong di adopanmu pabegebege hapistaranmu.
10:9 Pinuji ma Jahowa, Debatam, na marlomo ni roha mida ho, na pabangkithon ho tu atas habangsa ni harajaon Israel! Ala ni holong ni roha ni Jahowa mida Israel salelenglelengna, umbahen dipabangkit Ibana ho gabe raja mangulahon uhum dohot hatigoran.
10:10 Dung i dilehon boruboru i ma tu rajai saratus duapulu talenta sere dohot pamurpuri mansai godang dohot mata intan; ndang dung ro be pamurpuri na sai godang, songon na nilehon ni raja boruboru sian Saba tu raja Salomo.
10:11 Tole kopal ni raja Hiram, angka na mamboan sere sian Opir, diboan huhut sian Opir hau jati mansai godang dohot mata intan.
10:12 Dung i didokkon rajai paulion sian hau jati angka handanghandang di joro ni Jahowa dohot di jabu ni rajai, tole angka hasapi dohot tulila di halak parende; ndang dung ro songon i mansam ni hau jati, diboan halak manang didia pe rasirasa sadarion.
10:13 Raja Salomo i pe dilehon do tu raja boruboru sian Saba sandok guru lomo ni rohana dohot pangidoanna, so padohot silehonlehon na sian tangan ni raja Salomo sandiri. Dung i mulak ma nasida tu tanona rap dohot angka naposona.
10:14 Ianggo dokdok ni sere na ro tu raja Salomo di bagasan sataon, arga onom ratus onompulu onom talenta sere do.
10:15 So padohot sere na dapotsa sian halak pangallung dohot sian partigatiga pansar dohot sian saluhut raja ni Arab dohot sian halak na mora di tano i.
10:16 Dung i didokkon raja Salomo i ma paulion dua ratus lombulombu sian sere na pinapita; pola onom ratus sekkel sere dilampishon tu sada lombulombu.
10:17 Dipauli huhut tolu ratus lombulombu parinse sian sere na pinapita, pola tolu hati sere dilampishon tu sada parinse; tu bagasan jabu na di tombak Libanon angka i dipambahen rajai.
10:18 Dung i didokkon rajai ma paulion sada habangsa na bolon sian gading, jala lampisanna do i dohot sere palangki.
10:19 Onom do talha ni habangsa i, jala ulu ni pangunsandean di habangsa i tingko do dingkan pudi, adong huhut siradeon ni tangan angkupangkup be humaliang hundulani, jala dua suman ni singa jongjong di lambung siradeon i.
10:20 Jongjong huhut disi sampulu dua suman ni singa di atas ni na onom talha i angkupangkup be. Ndang dung adong dope songon i hapandean ni halak manang di harajaon dia.
10:21 Nang saluhut mangkuk panginuman ni raja Salomo sian sere do jala saluhut ulaula ni jabuna di tombak Libanon sian sere na pinapita do, ndang adong anggo sian perak, ai hira na so marguna do anggo perak di roha ni halak uju di tingki ni raja Salomo.
10:22 Ai adong do huhut kopal sian Tarsis di rajai angka na di laut rap dohot kopal ni raja Hiram; sahali di bagasan tolu taon ro angka kopal Tarsis mamboan sere dohot perak dohot gading dohot bodat dohot angka pidong uo.
10:23 Dung i tumimbul ma raja Salomo sian saluhut raja ni tano on taringot tu hamoraon dohot hapistaran.
10:24 Nasa isi ni tano on tahe marsangkap naeng idaonna bohi ni raja Salomo huhut naeng begeonna hapistaranna, naung nilehon ni Debata tu bagasan rohana.
10:25 Jadi angka diboan be siluana ganup taon, i ma angka ulaula perak dohot sere dohot pangkean dohot sinjata marragamragam dohot pamurpuri, tole angka hoda dohot hoda na marsahe.
10:26 Dipapungupungu raja Salomo huhut angka hureta dohot jolma parsihundul, pola saribu opat ratus hureta di ibana, jala sampulu dua ribu jolma parsihundul, angka na sinagihonna di bagasan angka huta hajongjongan ni hureta dohot di Jerusalem di lambung ni rajai.
10:27 Dung i dipagodang rajai ma perak i di Jerusalem, hira doshon batu godangna ro di hau Ares hira antajau na tubu di tano pea godangna.
10:28 Ianggo haroroan ni hoda angka na tu raja Salomo sian Misir do, marrongkanrongkan angka saudagar ni rajai mangalap hoda i marhabanhaban, pajak hian ia argana.
10:29 Mararga onom ratus sekkel perak sada hureta diboan halak nangkok sian Misir, jala saratus limapulu sekkel arga ni sada hoda; laos songon i diboan nasida tu sude raja ni halak Het dohot halak Ram.