I Samuel 1

1:1 Dung i adong ma sada baoa sian Ramataim-Sup, sian dolok Epraim, goarna si Elkana, anak ni si Jeroham, tubu ni si Elihu, tubu ni si Tohu, tubu ni si Sup, halak Eprata.
1:2 Dua do jolmana, goar ni na sada si Hanna, jala goar ni na sadanari si Pininna. Marianakkon do ianggo si Pininna, alai ndang adong anggo tubu ni si Hanna.
1:3 Sai nangkok do baoa i ganup taon sian hutana laho marsomba dohot mamele tu Jahowa Zebaot di Silo; jala disi do anak ni si Eli na dua i, si Hopni dohot si Pinehas, angka malim ni Jahowa.
1:4 Jadi dung jumpang ari ni si Elkana mamele, gabe dilehon ma tu si Pininna, jolmana i dohot tu saluhut anakna dohot boruna angka parjambaran.
1:5 Alai anggo tu si Hanna parjambaran sidua halak dilehon, ai tuanlaenna do si Hanna, alai na hol do bortianna dibahen Jahowa.
1:6 Sai disungguli imbangna huhut hinamagona manggitihi rohana nian, ala na hol bortianna dibahen Jahowa.
1:7 Sai songon i do dibahen ganup taon, manang piga hali nasida nangkok tu bagas ni Jahowa, sai songon i do diarsahi rohana, gabe tumatangis ibana jala ndang olo mangan.
1:8 Jadi ninna si Elkana, sinondukna i ma tu ibana: Ale Hanna, boasa tung tumatangis ho? Jala boasa so olo ho mangan? Jala boasa sai gondok roham? Nda tagonan ahu di ho sian anak sampulu?
1:9 Jadi dung mangan jala minum di Silo, hehe ma si Hanna. Alai hundul di hundulanna ianggo malim Eli di lambung tiang ni bagas ni Jahowa.
1:10 Tung na marsak situtu rohana, gabe martangiang si Hanna tu Jahowa, huhut tumatangis situtu.
1:11 Dung i marbagabaga ma ibana, ninna ma: Ale Jahowa Zebaot! Molo ditatap roham pardangolan ni naposomon, jala diingot Ho ahu, jala ndang halupahononmu naposomon, jala dilehon Ho tu naposomon sada anak, lehononku ma ibana muse tu Jahowa saleleng mangolu ibana, jala ndang jadi hona raut parnabung uluna.
1:12 Jadi dung leleng ibana martangiang di jolo ni Jahowa, sai dipamanatmanat si Eli ma pamanganna.
1:13 Ai martangiang di bagasan rohana do si Hanna, asal ubitubit bibirna, ndang tarbege ianggo suarana, gabe dirimpu si Eli na mabuk ibana.
1:14 Jadi ninna si Eli ma tu ibana: Sadia leleng on ho mabuk? Utahon ma anggur niinummi sian ho?
1:15 Alai ninna si Hanna ma mangalusi: Sitongka, ale tuanku! Parompuan na gondok roha do ahu tahe, ndang dung huinum anggur, manang siinumon na koras, rohangki do na huusehon di jolo ni Jahowa.
1:16 Unang tung bahen naposom hira boru na jahat, ai sian ponjot dohot arsak ni rohangku na godang i ahu mangkatai rasirasa nuaeng.
1:17 Dung i ninna si Eli ma mangalusi: Laho ma ho muli mardamedame! Sai na lehonon ni Debata ni Israel tu ho na pinangidom sian Ibana.
1:18 Jadi ninna si Hanna ma: Sai dapotan asi ni roha ma naposomi di jolom! Dung i ditulus parompuan i ma dalanna, jala mangan, bohina pe, ndang be surbot idaon.
1:19 Tole manogotna i, sogot ma nasida hehe asa marsomba di jolo ni Jahowa, dung i mulak ma nasida muli tu jabuna di Rama. Dung i ditopot si Elkana ma si Hanna jolmana i, gabe marningot Jahowa di nasida.
1:20 Dung i di laonlaon ni ari gabegabean ma si Hanna, jala ditubuhon anak sada, jala dibahen goarna si Samuel, ai sian Jahowa ibana hupangido, ninna.
1:21 Dung i nangkok ma muse si Elkana rap dohot sude isi ni bagasna laho mamelehon tu Jahowa pelean siganup taon ro di bagabagana.
1:22 Alai anggo si Hanna ndang nangkok, ai ninna do mandok sinondukna: Dung pe sirang susu dakdanak i, asa boanonku ibana, paidaidaonna bohi ni Jahowa, laos tinggal disi tongtong.
1:23 Dung i ninna si Elkana, sinondukna i ma tu ibana: Bahen ma lomo ni roham! Tinggal ma ho, paima sirang susu ibana dibahen ho; tung dipasaut Jahowa hatana! Jadi tinggal ma parompuan i pasusu anakna, paima sirang susu ibana dibahen.
1:24 Jadi dung sirang susu ibana, udur ma nasida nangkok huhut mamboan anak ni lombu tolu dohot itak sada Epah dohot anggur sapoting, jala diboan ibana tubagasan bagas ni Jahowa di Silo. Alai bajar situtu dope dakdanak i.
1:25 Dung i dipotongi nasida ma anak ni lombu i, jala diboan dakdanak i tu si Eli.
1:26 Dung i ninna si Hanna ma: Santabi ale tuangku, songon sintongna mangolu tondim ale tuan, ahu ma parompuan i na jongjong di lambungmon na jolo, martangiang tu Jahowa.
1:27 Dakdanak on do na hupangido uju i, gabe dibasabasahon Jahowa tu ahu na pinangido ni rohangku sian Ibana.
1:28 Dibahen i ahu pe pasahatonku ma ibana tu Jahowa saleleng mangolu ibana; ai na pinangido di Jahowa do ibana. Jadi laos martangiang tu Jahowa nasida disi.

I Samuel 2

2:1 Dung i martangiang ma si Hanna, ninna ma: Marolopolop ma rohangku mida Jahowa, timbul do tandukku di bagasan Jahowa, na hirtap situtu do pamanganku dompak angka musungku, umbahen na las rohangku di pangurupionmi.
2:2 Ndang adong na badia, tudoshon Jahowa, ai ndang adong dungkon ni Ho, jala ndang adong partanobatoan, dungkon ni Debatangku.
2:3 Unang sai datdati hamu manenganengahon haginjangon, unang ruar hata jungkat sian pamanganmuna, ai Jahowa do, Debata nampuna angka parbinotoan, jala Ibana dumasing angka pambahenan.
2:4 Marponggolan do sior ni ulubalang, jala marhohos hatogaron do angka naung mandate.
2:5 Angka na lobian na sai laon laho do mansari sipanganon, jala angka na rapar hian marlanggelangge; pola tubuan anak pitu na hol hian, jala merus boti sitorop anak hian.
2:6 Jahowa do na mambunu dohot na pangoluhon; Ibana patuathon tu banua toru dohot panangkokkon muse.
2:7 Jahowa do na mambahen pogos dohot mambahen mamora; Ibana do paijurhon, laos Ibana patimbulhon muse.
2:8 Ibana pahehehon sian orbuk halak na tarjepol hian, jala dipatimbul na pogos i sian gambo laho pahundulhon tu lambung ni angka na sangap, jala diturpukkon habangsa hamuliaon tu nasida, ai Jahowa do nampuna angka ojahan ni tano on, jala dipaojak di atasna hasiangan on.
2:9 Sai na ramotanna do pat ni angka na niasianna, alai sai parendeponna do di bagasan haholomon ianggo angka parjahat i, ai ndada binahen ni hagogoon sandiri marhuaso baoa.
2:10 Sai na tunduk do bahenon ni Jahowa halak angka na mangalo Ibana; mangkuling ronggurna di banua ginjang di atas nasida; Jahowa manguhum angka ujung ni tano on sogot, jala lehononna hamuliaon tu Rajana, jala patimbulonna sogot tanduk ni Messiasna.
2:11 Dung i muli ma si Elkana tu jabuna di Rama; alai parhalado ni Jahowa do anggo dakdanak i di jolo ni malim Eli.
2:12 Alai anggo angka anak ni si Eli jolma na jahat sahali do, ndang ditanda nasida Jahowa.
2:13 Ianggo hasomalan ni malim na dua i tu situan na torop i songon on do: Ia adong manang ise na naeng mamelehon pelean, gabe ro naposo ni malim, tagan mangalompa juhut i, mamboan garpu sitolu ngingi di bagasan tanganna.
2:14 Jala dipantullangkon tubagasan hudon manang seret manang balanga manang kuali, nasa na lohot tu garpu i dibuat malim i di ibana. Sai songon i do dibahen nasida tu sandok Israel, angka na ro tusi, tu Silo.
2:15 Gari tagan so dinahiti dope tabotabo i; nunga ro naposo ni malim i, jala ninna do tu baoa na mamelei: Sai lehon ma juhut i gorengon di malim i, ai ndang jaloonna sian ho juhut na nilompa, ingkon na tata do.
2:16 Ia didok baoa i tu ibana: Sai loas jolo dinahiti tabotabo i, songon na siap ari, dung i buat ma di ho guru pinangido ni roham; gabe didok naposo i tu ibana: Ndangana, ingkon nuaeng do lehononmu, molo ndang, antong gogo do bahenonku laho mambuat.
2:17 Dibahen i balga situtu do dosa ni angka dolidoli i di jolo ni Jahowa; ai lam lea do roha ni angka baoa di pelean sipanganon tu Jahowa.
2:18 Alai anggo si Samuel marhalado di jolo ni Jahowa, jala marsampesampe epod sian hori do dakdanak i.
2:19 Dibahen inana do huhut jobit sada na metmet di ibana, binoanna tu ibana ganup taon, uju nangkok nasida rap dohot sinondukna laho mamelehon pelean siganup taon.
2:20 Laos dipasupasu si Eli do si Elkana dohot jolmana, ninna ma: Sai dilehon Jahowa ma pinompar tu ho sian jolmamon, singkat ni pangidoan na pinangidona sian Jahowa. Dung i muli nasida tu ingananna.
2:21 Tongon tahe, diebati Jahowa ma si Hanna muse, jadi gabegabean nasida, laos ditubuhon tolu anak dohot dua boru di laonlaon ni ari; alai magodang di adopan ni Jahowa do ianggo si Samuel.
2:22 Alai nunga matua situtu ianggo si Eli, jala dibege do barita ni saluhut na binahen ni anakna tu sandok Israel, dohot na niangkupannasida angka boruboru modom, angka na marhalado di lambung pintu ni undungundung luhutan i.
2:23 Jadi ninna ma tu nasida: Boasa tung angka sisongon i bahenonmuna? Ai tarbortik do tu pinggolhu sian sandok situan na torop i pambahenanmuna, angka na jahat i.
2:24 Sitongka ale anaha, ai ndang denggan barita na hubage i, mardosa do bangso ni Jahowa binahenmu.
2:25 Molo mardosa jolma tu donganna jolma, Debata do pangalualuanna; alai molo dompak Jahowa jolma i mardosa, tung ise ma pangalualuanna? Alai ndang ditangihon nasida suara ni amanasida i, ai naeng do bunuon ni Jahowa nasida.
2:26 Alai anggo si Samuel na bajar i, lam magodang, lam hasian ni Jahowa dohot jolma.
2:27 Dung i ro ma sada halak ni Debata manopot si Eli, ninna ma tu ibana: Boti hata ni Jahowa: Atehe, nda hupapatar situtu Ahu tu pinompar ni ompum, uju di Misir dope nasida, di bagasan bagas ni si Firaun?
2:28 Jala hupillit ibana di Ahu sian nasa marga ni Israel bahen malim, asa mamele ibana di atas langgatanku, manutung daupa, mamangke sampesampe epod di jolongku, jala hulehon do tu pinompar ni ompum saluhut pelean situtungon ni halak Israel.
2:29 Boasa tung lea bahenonmuna peleanki sipotongon dohot sipanganon, angka na hutonahon pelehononhon di bagasan undungundung i? Jala sumangap angka anakmu sian Ahu dibahen ho, asa pamokmokkon hamu sian patumonaan ni ganup pelean sipanganon, pinelehon ni bangsongku Israel.
2:30 Dibahen i boti hata ni Jahowa, Debata ni Israel: Nunga pola hudok nian: Pinomparmu dohot pinompar ni amam marhalado di jolongku ro di salelenglelengna. Alai anggo nuaeng, ninna Jahowa: Dao ma i sian Ahu; ai angka na pasangap Ahu marsangap bahenonku, alai angka na palea Ahu, marlea do bahenonku.
2:31 Ida ma, na ro do angka ari sogot, gotaphononku ma tanganmu dohot tangan ni pinompar ni amam, asa unang be adong jolma sarimatua di bagasan jabum.
2:32 Jala sanga dope idaonmu hagogotan ni undungundung di hamamasa ni sandok na denggan tu Israel, jala ndang adong na sarimatua di bagasan jabum ro di salelenglelengna.
2:33 Alai nda tung sun siap baoa di ho sian langgatanku, asa tung lotop matam, jala marsipal tondim bahenon ni; alai godangan pinomparmu ingkon mate di haroro ni dagingna.
2:34 Jala on do partinandaan di ho, na ro tu anakmu na dua i, si Hopni dohot si Pinehas: Ingkon mate nasida duansa di bagasan sadari.
2:35 Alai patindangonku ma di Ahu sada malim haposan, hombar tu na di bagasan rohangku dohot di bagasan tondingku bahenonna, jala paulionku di ibana sada bagas na hot, asa marhalado di jolo ni Messiashu ibana saleleng mangolu.
2:36 Jala nasa na teba sian pinomparmu, ingkon ro marsomba tu ibana mangido hepeng sambiji dohot roti sanseat, jala dohononna ma: Sai pabangkit ma ahu mangaradoti ulaon malim sada, asa adong panganonku roti sanseat.

I Samuel 3

3:1 Dung i uju si Samuel na bajar i marhalado di Jahowa, di jolo ni si Eli, mahal ma di angka ari i hata ni Jahowa, jala ndang adong sadia pangungkapon.
3:2 Dung i di na sadari modommodom ma si Eli di ingananna, matana pe nunga mamungka rambon, ndang tarbaensa be marnida.
3:3 Ndang dope mintop ianggo palito ni Debata, jala nunga modom ia si Samuel di joro ni Jahowa, hajongjongan ni poti parpadanan ni Debata.
3:4 Jadi joujou ma Jahowa di si Samuel, gabe didok ibana ma: Ida ma, dison do ahu!
3:5 Dung i marlojong ma ibana tu si Eli, jala ninna ma: Ida ma, dison do ahu, ai dijou ho do ahu. Alai didok si Eli ma: Ndang ahu manjou ho, mulak ma ho mangulahi modom, gabe laho ma ibana jala modom.
3:6 Dung i diulahi Jahowa manjou si Samuel paduahalihon, gabe hehe ma si Samuel jala laho mandapothon si Eli, jala didok ma: Ida ma, dison do ahu, ai dijou ho do ahu. Dung i ninna si Eli ma: Ndang ahu manjou ho, ale anaha, mulak ma ho mangulahi modom.
3:7 Alai ndang dope ditanda si Samuel Jahowa, jala ndang dope pinapatar tu ibana hata ni Jahowa.
3:8 Dung i diulahi Jahowa ma manjou si Samuel patoluhalihon, gabe hehe ibana jala laho mandapothon si Eli, jala ninna ma: Ida ma, dison do ahu, ai dijou ho do ahu. Jadi mamoto ma roha ni si Eli, Jahowa do hape manjou dolidoli i.
3:9 Jadi ninna si Eli ma tu si Samuel: Laho ma ho mangulahi modom; molo tung joujou muse di ho, dohononmu ma: Mangkuling ma Ho, ale Jahowa, ai mananginangi do naposomon! Dung i laho ma si Samuel, jala diulahi modom di ingananna.
3:10 Dung i ro muse ma Jahowa, tindang disi jala joujou songon na jolo: O Samuel, Samuel! Gabe didok si Samuel ma: Mangkuling ma Ho, ai mananginangi do naposomon.
3:11 Dung i ninna Jahowa ma tu si Samuel: Ida ma, pamasaonku ma uhum sada di Israel, tung marnginging do pinggol ni ganup na umbegesa duansa.
3:12 Di ari na sasada i paroonku ma tu si Eli saluhut na huhatahon taringot tu pinomparna. Ahu mamungka, laos Ahu paujungkon.
3:13 Ai nunga hulumbahon hian tu ibana, paboa Ahu parlulu dompak pinomparna ro di salelenglelengna, ala hajahaton na binotona, ai mangala torutoru tu nasida angka anakna i, hape so mangonai hata ibana tu nasida.
3:14 Dibahen i nunga pola maruari Ahu taringot tu pinompar ni si Eli: Tung na so hahuphupan be hajahaton ni pinompar ni si Eli marhitehite pelean sipotongon manang sipanganon ro di salelenglelengna.
3:15 Dung i modom ma si Samuel ro di torang ni ari, dung i diungkap ma angka pintu ni joro ni Jahowa. Alai mabiar do anggo si Samuel paboahon pangungkapon i tu si Eli.
3:16 Jadi dijou si Eli ma si Samuel, jala ninna ma: Jo Samuel, ale anaha, gabe didok ibana ma: Dison do ahu.
3:17 Dung i ninna si Eli ma: Dia do hata na pinaboana tu ho? Unang tung porso maradophon ahu! Suang songon i bahenon ni Debata tu ho, jala patambaonna dope, molo tung diporso ho tu ahu nanggo sada hata sian saluhut hata na pinaboana tu ho.
3:18 Jadi dipaboa si Samuel ma hata i luhut tu ibana, jala ndang diporso agia aha tu ibana. Dung i ninna si Eli ma: Jahowa do Ibana, na denggan di rohana ma dibahen.
3:19 Dung i lam magodang ma si Samuel, jala didongani Jahowa ibana, jala ndang madabu boti tu tano nanggo sada sian saluhut hatana i.
3:20 Jadi sandok Israel, olat ni Dan sahat ro di Beerseba marhatopothon si Samuel sintong panurirang ni Jahowa.
3:21 Dung i didatdati Jahowa ma pataridahon Ibana di Silo; ai nunga patar Jahowa tu si Samuel di Silo marhitehite hata ni Jahowa.

I Samuel 4

4:1 Dung i songgop ma lumbalumba ni si Samuel tu sandok Israel. Alai borhat ma halak Israel manjumpangkon halak Palistim laho marmusu, gabe marsaro nasida mardonokkon Ebeneser; marsaro di Apek do ianggo halak Palistim.
4:2 Dung i pariris ma halak Palistim manjumpangkon halak Israel, gabe ragat martongtang, jadi talu ma halak Israel dibahen halak Palistim, marragean nasida di tongtangan arga opat ribu halak.
4:3 Jadi dung mulak bangso i tu parsaroan, ninna angka sintua ni Israel ma: Boasa ulaning talu hita sadarion dibahen Jahowa maradophon halak Palistim? Beta ma, itaalap ma sian Silo poti parpadanan ni Jahowa, asa ro Ibana tu tongatonganta, asa dipalua hita sian tangan ni musunta!
4:4 Dung i disuru bangso i ma tu Silo mamboan sian i poti parpadanan ni Jahowa Zebaot, na marhabangsahon angka kerubim, disi do huhut na dua anak ni si Eli, si Hopni dohot si Pinehas, mandongani poti parpadanan ni Debata.
4:5 Jadi dung sahat poti parpadanan ni Jahowa tu parsaroan i, marsurak godang ma sandok halak Israel mangolophonsa, pola humuntal tano i dibahen.
4:6 Jadi dung dibege halak Palistim suara suraksurahi, angka ninna nasida ma: Soara surak godang dia do i di parsaroan ni halak Heber? Jala dung diboto nasida, poti ni Jahowa do hape ro tu parsaroan i.
4:7 Mabiar ma halak Palistim, ai ninna nasida ma: Nunga ro Debata tu parsaroan i; angkupni didok nasida; marjea ma hita, ai ndang songon i nantuari manang nantuari sada.
4:8 Marjea ma hita! Tung ise ma paluahon hita sian tangan ni Debata, angka na marmulia sisongon i? I ma Debata, angka na mambunu halak Misir marhitehite begu masa marragamragam di halongonan.
4:9 Antong pir ma tondimuna, hamu baoa ni halak Palistim, asa unang diparhatoban halak Heber hamu, songon na pinarhatobanmuna nasida na sai laon. Asa pir ma tondimuna huhut mangalo, hamu ale angka baoa!
4:10 Jadi turtar ma halak Palistim marmusu, gabe talu ma halak Israel, jala maporus nasida ganup tu undungundungna; asa hataluan na bolon situtu do i, marragean do sian Israel tolupulu ribu parangan angka na mardalan pat.
4:11 Dapot do dohot poti ni Debata, mate dohot na dua anak ni si Eli, si Hopni dohot si Pinehas.
4:12 Dung i marlojong ma sada halak Benjamin sian tongtangan i, jala sahat ibana tu Silo sadarina i, jala marpangkean na sinansanan, jala tano di atas uluna.
4:13 Jadi dung sahat ibana, ida ma, hundul di hundulanna si Eli di lambung dalan manatapnatap, ai nunga holsoan hian rohana taringot tu poti ni Debata. Jadi dung sahat baoa i tu huta i paboahon barita i, mangangguhi ma sandok isi ni huta i.
4:14 Jadi dung dibege si Eli suara ni angguhanggukki, ninna ma: Soara hagunturon dia do i? Gabe hapogan ma baoa i ro mamaritahon tu si Eli.
4:15 Alai marumur siapulu ualu taon ma ia si Eli uju i, jala nunga rambon matana, ndang be marnida.
4:16 Dung i ninna baoa i ma tu si Eli: Na ro sian tongtangan do ahu jala maporus sian tongtangan i do ahu sadarion. Jadi ninna si Eli ma: Aha do barita na masa, ale anaha?
4:17 Jadi ninna siboan barita i ma mangalusi: Nunga maporus halak Israel maradophon halak Palistim, tung talu situtu do bangso i, mate dohot anakmu na dua i, si Hopni dohot si Pinehas, diboan dohot poti ni Debata.
4:18 Jadi dung ditaringoti ibana poti ni Debata, singgalak ma si Eli tu pudi sian hundulanna di lambung ni harbangan i, gabe upok ma rungkungna laos mate; ai nunga jolma matua ibana, jala na mokmok. Alai arga opatpulu taon lelengna ibana manguhum halak Israel.
4:19 Ia parumaenna, jolma ni si Pinehas, gabegabean do uju i matoras ne emena; dung dibege barita taringot tu poti ni Debata naung dapot i, jala naung mate simatuana doli dohot sinondukna, marsinggang ma ibana laos mangintubu; ai tompu do manombo rianna.
4:20 Marhira laho mate ibana, ro ma hata ni sibaso, angka na jongjong di lambungna: Unang ho mabiar, ai anak do tinubuhonmon! Alai ndang dialusi, jala ndang parduli rohana disi.
4:21 Jadi digoar ma dakdanak i si Ikabod, huhut mandok: Nunga pesan hamuliaon sian Israel, ala naung dapot i poti ni Debata, jala ala naung mate simatuana doli dohot sinondukna i.
4:22 Alani do umbahen didok: Nunga pesan hamuliaon sian Israel, ai nunga tarboan poti ni Debata.

I Samuel 5

5:1 Dung i dibuat halak Palistim ma poti ni Debata, jala diboan sian Ebeneser tu Asdod.
5:2 Asa dibuat halak Palistim ma poti ni Debata, jala diboan do i tu bagasan joro ni Dagon, dipahombar do i tu lambung ni Dagon i.
5:3 Alai dung dipasogot halak Asdod hehe manogotna i, ida ma, nunga tungkap tu tano Dagon i di jolo ni poti ni Jahowa didapot; jadi dibuat nasida ma Dagon i, jala dipasuang ibana tu ingananna hian.
5:4 Alai dung dipasogot nasida muse hehe manogotna i, ida ma, nunga manungkap muse tu tano Dagon i didapot di jolo ni poti ni Jahowa; alai matipul ulu ni Dagon dohot palak ni tanganna duansa, peak di lobulobu, holan badanna dengke na teba sian ibana.
5:5 Dibahen i sitongka do degeon ni angka malim ni Dagon ro di sude angka na masuk tu joro ni Dagon i lobulobu ni joro ni Dagon na di Asdod rasirasa sadarion.
5:6 Alai dokdok do tangan ni Jahowa mandondon tu halak Asdod, jala mangago tu nasida, jala dipatubu barobuni di isi ni Asdod ro di na humaliang huta i.
5:7 Jadi dung diida halak Asdod songon i do hape pangalahona, angka ninna nasida ma: Ndang jadi tinggal di lambungnami on poti ni Debata ni halak Israel, ai posi do tanganna mangonai tu hami dohot tu Dagon, debatanta i.
5:8 Dung i disuru nasida ma paluhuthon sude raja ni halak Palistim tu nasida, angka ninna nasida ma: Beha do bahenonnami taringot tu poti ni Debata ni halak Israel? Jadi ninna angka rajai ma mangalusi: Tu huta Gat ma pinaunsat poti ni Debata ni halak Israel. Jadi dipaunsat nasida ma poti ni Debata ni halak Israel tusi.
5:9 Jadi dung dipaunsat nasida tusi, mangonai ma tangan ni Jahowa tu isi ni huta i, pola guntur situtu, hona toruna ma isi ni huta i, nang na metmet, nang na magodang, tubu do angka barobuni di nasida.
5:10 Dung i ditongos nasida ma poti ni Debata tu Ekron. Alai dung tolhas poti ni Debata tu Ekron, mangangguhi be ma isi ni Ekron, angka ninna ma: Diboan nasida poti ni Debata ni halak Israel tu hami, asa mambunu hami dohot bangsonami huroha.
5:11 Dung i disuru nasida ma paluhuthon sude raja ni halak Palistim, angka didok nasida ma: Tongos hamu ma poti ni Debata ni Israel mulak tu ingananna hian, asa unang dibunui hami ro di bangsonami; ai masa do gunturguntur hamatean di sandok huta i, tung na dokdok situtu do tangan ni Debata mangonai tusi.
5:12 Jala baoa angka na so mate, hona barobuni do, pola manaek sahat tu langit angguhangguk ni huta i.

I Samuel 6

6:1 Asa pola pitu bulan leleng ni poti ni Jahowa di luat ni halak Palistim.
6:2 Dung i dipaluhut halak Palistim ma angka malim dohot pangarunding, angka ninna ma: Aha do sibaenonnami taringot tu poti ni Jahowa? Sai pabotohon hamu ma tu hami manang aha bahenonnami hamulianna tu ingananna hian.
6:3 Jadi didok angka nasida ma: Molo naeng tongoshononmuna poti ni Debata ni Israel, unang rumar boti tongoshon hamu ingkon paihuthononmuna sada pelean parsalaan tusi. Molo tung malum hilalaonmuna, andar ma botoonmuna manang ala ni aha umbahen so manginsurut tanganna sian hamu.
6:4 Jadi ninna nasida ma: Aha do pelean parsalaan sipaihuthononnami tusi? Dung i didok nasida ma mangalusi: Lima baro sere dohot lima monsi sere, marguru tu bilangan ni raja ni halak Palistim, ai sada do uhumi na mangonai tu nasida sude dohot tu rajanasida i.
6:5 Dibahen i ingkon bahenonmuna do sumansuman ni baromuna dohot sumansuman ni monsimuna, angka na mangago tu tano i, ingkon lehononmuna hamuliaon tu Debata ni Israel; anggiat dipaganggang tanganna sian hamu dohot sian debatamuna dohot sian tanomuna.
6:6 Jala boasa tung tangkanganmuna rohamuna, songon na tinangkangan ni halak Misir dohot Firaun najolo rohanasida i? Nda songon on do, dung ditorui Jahowa nasida, balik do nasida mandokkon bangso i mardalan?
6:7 On pe, hobas i hamu ma mambahen padati na imbaru sada, jala buat hamu dua lombu panusuan, angka na so dung niaugaan, tu lombu i ma pampe hamu padati i, alai olat hamu anakna i sian pudina mulak tu bara.
6:8 Dung i handit hamu ma poti ni Jahowa, jala pajongjong hamu tu padati i; jala sombasomba sere, angka sipaihuthononmuna tusi bahen pelean parsalaan, bahen hamu ma i tu bagasan potipoti di lambungna, jala loas hamu laho manulus dalanna.
6:9 Dung i matahon hamu: Molo dalan parbalohan ni tanona dinangkohi laho tu Betsemes, andar ma Ibana do na mambahen jea godangon tu hita; alai molo ndang, botoonta ma na so tanganna do na mangonai tu hita, hamamasana hian do i tu hita.
6:10 Jadi dibahen angka baoa i ma songon i, dibuat nasida ma dua lombu panusuan, jala dipampe padati i tusi, alai dihurung do anggo anakna i di bara.
6:11 Dung i dipajongjong nasida ma poti ni Jahowa tu padati i ro di potipoti, isian ni angka monsi sere dohot sumansuman ni baronasida.
6:12 Jadi sai ditulus angka lombu i dalan panigoran mangihuthon dalan laho tu Betsemes; sai dalan balobung i ditulus nasida, huhut marumbeumbe, jala ndang manimbil tu siamun manang tu hambirang; sai diiringiring angka raja ni halak Palistim do antong sahat ro di partalpahan ni Betsemes.
6:13 Alai ragat mambuat eme di rura do ianggo isi ni Betsemes, jadi manaili dompak ginjang ma nasida, gabe diida nasida poti i, jala las rohanasida marnidasa.
6:14 Dung i sahat ma padati i tu hauma ni si Josua, isi ni Betsemesi, laos ngongong disi, jala adong disi sada batu na bolon. Dung i ditahai nasida ma parhau ni padati i, jala lombu i dipelehon bahen pelean situtungon tu Jahowa.
6:15 Dung i dipaijur halak Lepi ma poti ni Jahowa dohot potipoti di lambungna, isian ni sombasomba sere i, jala dipeakkon tu batu na bolon i; laos mamelehon angka pelean situtungon dohot sipotongon halak Betsemes sadarina i tu Jahowa.
6:16 Alai dung ditonduri na lima raja ni halak Palistim pangalahona, mulak ma nasida tu Ekron sadarina i.
6:17 Jala on do baro sere, angka na pinaihut ni halak Palistim bahen pelean parsalaan tu Jahowa: Sian Asdod sada, sian Gaza sada, sian Askelon sada, sian Gat sada, sian Ekron sada.
6:18 Angkupni angka monsi sere. Marguru tu bilangan ni saluhut angka huta ni halak Palistim, ginomgom ni raja na lima i, olat ni huta na gonting sahat ro di sosor ni halak parpea; jala batu na bolon i do sitindangi, pangulonan ni poti ni Jahowa rasirasa sadarion, di hauma ni si Josua, isi ni Betsemesi.
6:19 Alai hona toru ma halak Betsemes, ala na tiniliknasida i poti ni Jahowa, jala dibunu sian nasida pitupulu halak sian limapulu ribu halak. Jadi margudompong ma bangso i, ala hataluan bolon na binahen ni Jahowa di tongatonganasida.
6:20 Dung i ninna halak Betsemesi ma: Tung ise ma manahan tindang di jolo ni Jahowa, Debata na badia sisongon i? Jala ise do ulaning topotonna, dung laho sian lambungta?
6:21 Dung i disuru nasida ma suruanna manopot isi ni Kiriat Jearim, angka ninna ma: Nunga mulak poti ni Jahowa ditaruhon halak Palistim; sai tuat ma hamu mangalap tu hamu.

I Samuel 7

7:1 Dung i ro ma halak isi ni Kiriat Jearim mamboan poti ni Jahowa nangkok tu jabu ni si Abinadab, na di atas robean, jala si Eleasar, anakna i, diuras nasida mangaramoti poti ni Jahowa.
7:2 Dung i olat ni ari pangulonan ni poti i di Kiriat Jearim, nania laonna, arga duapulu taon lelengna. Sai margudompong sandok Israel mangihuthon Jahowa.
7:3 Jadi ro ma hata ni si Samuel tu sandok Israel songon on: Molo tung mulak hamu tu Jahowa sian nasa rohamuna, sai paholang hamu ma angka debata sileban sian tongatongamuna, ro di angka sombaon Astarot, jala marsihohot rohamuna tu Jahowa, jala sasada Ibana oloi hamu, asa dipalua hamu sian tangan ni halak Palistim.
7:4 Jadi dipaholang halak Israel ma angka Baal dohot Astarot, jala sasada Jahowa dioloi nasida.
7:5 Dung i ro muse hata ni si Samuel: Marluhut ma sandok Israel tu Mispa, asa huondihon hamu tu Jahowa.
7:6 Jadi marluhut ma nasida tu Mispa, jala ditahui aek, diusehon muse tu jolo ni Jahowa, jala marpuasa nasida sadarina i, angka ninna huhut disi: Nunga mardosa hami dompak Jahowa. Asa si Samuel do manguhum halak Israel di Mispa.
7:7 Alai dung dibege halak Palistim naung marluhut halak Israel di Mispa, nangkok ma angka raja ni halak Palistim dompak Israel. Jadi dung dibege halak Israel barita i, mabiar ma nasida maradophon halak Palistim.
7:8 Jadi ninna halak Israel ma tu si Samuel: Unang ma ho mansohot joujou tu Jahowa Debatanta, mangondihon hami, asa dipalua hami sian tangan ni halak Palistim.
7:9 Jadi dibuat si Samuel ma anak ni birubiru sada onsop manusu, jala hibul dipelehon tu Jahowa bahen pelean situtungon, huhut joujou si Samuel tu Jahowa mangondihon Israel, gabe dialusi Jahowa ibana.
7:10 Dung i uju mamelehon pelean situtungon i si Samuel, marrongoman ma ro halak Palistim laho marmusu dompak Israel; alai mangkuling ma ronggur mansai gogo sadarina i dibahen Jahowa mangalo halak Palistim, gabe guntur nasida, laos talu maradophon Israel.
7:11 Jadi ruar ma angka baoa ni Israel sian Mispa, jala dilele halak Palistim, jala ditaluhon nasida sahat ro di toruan ni Betkar.
7:12 Dung i dibuat si Samuel ma sada batu, jala dipatindang di holangkolang ni Mispa dohot Sen jala dibahen goarna: Ebeneser, jala ninna do: Rasirasa nuaeng diurupi Jahowa do hita.
7:13 Jadi tarjepol ma halak Palistim, jala ndang be ro nasida tu partalpahan ni Israel, jala sai dialo tangan ni Jahowa do halak Palistim saleleng mangolu si Samuel.
7:14 Jadi mulak ma tu Israel huta, angka na nilahang ni halak Palistim sian Israel, olat ni Ekron sahat ro di Gat, nang angka luat humaliang i dirampas Israel sian tangan ni halak Palistim, gabe mardemak ma Israel tu halak Amori.
7:15 Jadi si Samuel manguhum Israel saleleng mangolu ibana.
7:16 Jala ganup taon do ibana marliat sahat ro di Betel, boti tu Gilgal, boti tu Mispa, asa diuhumi Israel di angka huta i.
7:17 Dung i mulak ibana muse tu Rama; ai disi do jabuna, jala disi do diuhumi Israel, jala dipauli disi sada langgatan di Jahowa.

I Samuel 8

8:1 Alai dung sarimatua si Samuel, dipabangkit ma anakna na dua i, bahen panguhum di Israel.
8:2 Ia goar ni anak buhabajuna, i ma si Joel, goar ni na paduahon i i ma si Abia, rap panguhum nasida di Berseba.
8:3 Alai ndang diihutihut anakna i dalan ni amana, impolan di perak do nasida, jala manjalo sisip nasida papeol uhum.
8:4 Alani marluhut ma saluhut angka sintua ni Israel manopot si Samuel tu Rama.
8:5 Angka ninna nasida ma tu ibana: Ida ma, nunga sarimatua anggo ho, jala angka anakmu ndang diihutihut nasida angka dalanmu, on pe pampe ma di hami sada raja, asa ibana manguhum hami, suang songon saluhut bangso parbegu.
8:6 Alai sogo ni roha ni si Samuel do hata, na nidoknasida i: Sai lehon di hami raja sada, asa ibana manguhum hami. Jadi martangiang ma si Samuel tu Jahowa.
8:7 Dung i ninna Jahowa ma tu si Samuel: Tangihon ma suara ni bangso i di saluhut na nidoknasida i tu ho, ai ndada ho, Ahu do na binolonghonnasida disi, asa unang be Ahu rajanasida.
8:8 Suman tu saluhut pambahenan, angka na binahennasida olat ni ari uju Ahu manogihon nasida ruar sian Misir rasirasa sadarion, sai ditadingkon nasida Ahu, asa mangoloi angka debata sileban, suang songon i dibahen nasida nang tu ho.
8:9 On pe, tangihon ma suaranasida i, asal tangkas dihatindangkon jala dipasingothon ho tu nasida uhum ni raja na gumomgom nasida sogot.
8:10 Dung i dipatolhas si Samuel ma sude hata ni Jahowa tu bangso i, angka na mangido raja sian ibana.
8:11 Jala didok ma: On do uhum siingoton tu raja na gumomgom hamu sogot; buatonna do angka anakmuna jala bahenonna mangiringiring huretana dohot hodana, asa marlojong nasida di jolo ni huretana.
8:12 Jala bahenonna nasida gabe induk ni marsasaribu, jala induk ni marlimalimapulu; huhut mambahen saro maninggala haumana, jala manggotil sigotilonna, mamandei dohot angka parhohas tu hamusuonna dohot parhohas ni huretana.
8:13 Buatonna dohot borumuna bahen pande pangir, jala bahen angka pangalompa dohot pande roti.
8:14 Buatonna dohot haumamuna dohot porlak anggurmuna dohot hau jetunmuna, angka na dumenggan i, jala lehononna tu angka naposona.
8:15 Buatonna do saparsampulu sian parbue ni na niulamuna sian hauma dohot sian porlak anggur, jala lehononna tu angka panuturina dohot tu angka naposona.
8:16 Buatonna huhut angka naposomuna baoa dohot parompuan, ro di lombu dohot halodemuna, angka na dumenggan i, asa pangkeonna tu ulaonna.
8:17 Buatonna saparsampulu nang sian birubirumuna, jala ingkon gabe naposona hamu.
8:18 Dung i di laonlaon ni ari mangangguhi ma hamu ala ni rajamuna, na pinillitmuna i di hamu, alai ndang alusan ni Jahowa hamu di ari na sasada i.
8:19 Hape manjua do bangso i tumangihon suara ni si Samuel, angka ninna nasida ma: Agia songon i, ingkon adong raja di hami.
8:20 Asa dos hami songon saluhut bangso parbegu, asa rajanta i manguhum hita, jala manguluhon hita laho marmusu.
8:21 Jadi dung dibege si Samuel luhut hata ni bangso i, dialualuhon ma i tu pinggol ni Jahowa.
8:22 Dung i ninna Jahowa ma tu si Samuel: Tangihon ma suaranasida i, jala pabangkit di nasida raja sada. Jadi ninna si Samuel ma tu angka baoa ni Israel: Muli ma hamu ganup tu hutana be.

I Samuel 9

9:1 Dung i adong ma sada halak sian marga Benjamin, na margoar si Kis, anak ni si Abiel, anak ni si Zeror, anak ni si Behorat, anak ni si Apia, anak ni sada halak Benjamin, parsinamot na godang.
9:2 Adong di ibana anak sada, na margoar si Saul, dolidoli na uliutus do ibana, ndang adong baoa na ummuli sian sandok halak Israel; olat ni abarana tu ginjang hasurunganna sian sandok bangso i.
9:3 Dung i mago ma halode boruboru ni si Kis, ama ni si Saul. Jadi didok si Kis ma tu si Saul, anakna i: Ua arahon ma sada sian angka naposo bahen donganmu, dung i borhat ma ho laho mangalului angka halode boruboru i.
9:4 Jadi diliati ibana ma tor Epraim, boti luat Salisa, hape ndang jumpangsa; diliati nasida muse luat Saalim, hape ndang disi; dibolus nasida muse luat Benjamin, hape ndang jumpangsa.
9:5 Alai dung sahat nasida tu luat Sup, gabe didok si Saul ma tu naposona, donganna i: Beta hita mulak, atek beha naung malua roha ni damang sian angka halode i, humolsohon hita gumodang.
9:6 Jadi ninna naposona i ma mangalusi ibana; ida ma, adong do halak ni Debata sada di huta on, jala na marmulia do baoa i, sai na sintong do songgop manang aha na nidokna; ua ibana ma antong itatopot, anggiat paboaonna tu hita dalan sidalananta.
9:7 Dung i ninna si Saul ma tu naposona i: Ida ma, tung sura laho hita, tung aha ma boanonta tu baoa i? Ai nunga suda ianggo sagusagu sian isianna, jala so adong silua tau boanon tu halak ni Debata; tung aha ma adong di hita?
9:8 Dung i ro muse ma alus ni naposo i tu si Saul songon on: Ida ma, jumpang do di bagasan tanganku saparopat Sekel perak, i ma hulehon tu halak ni Debata, asa dipaboa tu hita dalan sidalananta.
9:9 (Ianggo di na robi somal do di halak Israel, jumpa lahomanang ise manungkun Debata mandok songon on: Beta hita laho tumopot partondung; ai partondung do digoar di na robi panurirang nuaeng.)
9:10 Dung i ninna si Saul ma tu naposona: Denggan do hatami, beta hita mardalan! Jadi laho ma nasida tu huta, inganan ni halak ni Debata.
9:11 Tole nangkok nasida di nangkohan laho tu huta, jumpang nasida ma boruboru partuaek, angka na ruar manahui aek, gabe didok ma manungkun nasida: Atehe, dison do partondung i?
9:12 Jadi ninna nasida ma mangalusi: Dison do, ida ma, indi an di jolomi do ibana; haru siluhon ma, apala sadarion ibana ro tu huta, ala pasahathon pelean situan natorop i sadarion di robean.
9:13 Ia dung tolhas hamu tu huta i, jumpang hamu ma ibana tagan so dinangkohi dope robean i laho mangan, ai ndang tagamon mangan situan natorop i, nda jolo ro ibana; ai ibana do mamasumasu pelean i, dung i pe asa mangan angka na pinio i. On pe, nangkok ma hamu, ai apala sadarion jumpang hamu ibana.
9:14 Jadi dung nangkok nasida sahat tu tongatonga ni huta i, ida ma, ruar ma si Samuel manjumpangkon nasida laho nangkok tu robean i.
9:15 Alai nunga dipalumba Jahowa hian tu pinggol ni si Samuel, jumolo sadari sian haroro ni si Saul, didok hian do:
9:16 Marsogot songon on suruhononku tu ho sada halak sian tano Benjamin, asa miahanmu ibana bahen partogi ni bangsongku Israel, asa ibana paluahon bangsongku sian tangan ni halak Palistim, ai nunga ditatap rohangku bangsongki, ala naung sahat tu Ahu angguhanggukna.
9:17 Jadi dung dibereng si Samuel si Saul i, ro ma hata ni Jahowa tu ibana: Ida ma, i ma baoa i na hupaboa i tu ho, ingkon gomgomanna bangsongki.
9:18 Dung i didapothon si Saul ma si Samuel di tongatonga ni harbangan i, ninna ma: Ua paboa di ahu, manang didia bagas ni partondung i?
9:19 Jadi ro ma alus ni si Samuel mandok tu si Saul: Ahu do partondung i, pajolo ma nangkok tu robean i, asa hamu donganku mangan sadarion, marsogot pe paborhatonku ho, jala luhut na di bagasan roham, hupaboa pe tu ho.
9:20 Anggo taringot tu halode, angka na mago i nunga pola tolu ari, unang pola holsoan roham taringot tusi, ai nunga jumpang; jala ise do nampuna sandok sipangidoon ni Israel? Nda ho do nampunasa ro di sandok pinompar ni amam?
9:21 Dung i ninna si Saul ma mangalusi: Nda pinompar ni si Benjamin do ahu, sian marga na ummetmet di Israel, jala ahu do na ummetmet sian sandok Benjamin marompuompu? Boasa tung songon i dohononmu tu ahu?
9:22 Dung i diarahon si Samuel ma si Saul i rap dohot naposona manogihon nasida tu bilut panganan, jala nasida dibahen tu juluan sian angka na tarpioi, arga tolupulu halak toropnasida.
9:23 Dung i ninna si Samuel ma tu pande sipanganon: Nia tuson todoan na hupasahat i tu ho, pola hudok tu ho papulihonmu do i.
9:24 Dung i diboan pande sipanganon i ma hae bona dohot na lohot tusi, jala dipeakkon tu jolo ni si Saul, huhut didok si Samuel: Ida ma, na pinapulik do i bahen tu jolom, antong pangan ma! Ai nunga sinimpan hian di ho tu ari raja on, laho manggokkon situan natorop i ahu. Jadi mangan ma si Saul rap dohot si Samuel sadarina i.
9:25 Jadi dung tuat nasida sian robean i laho tu huta, mangkatai ma si Samuel dohot si Saul di atas tarup.
9:26 Dung i dipasogot nasida ma hehe manogotna i; alai dung manaek sibalik hunik, joujou ma si Samuel di si Saul tu atas tarup, ninna ma: Borhat ma ho, asa hupataru ho. Jadi borhat ma si Saul, rap ruar ma nasida duansa tu balian, ibana dohot si Samuel.
9:27 Jadi dung tuat nasida sahat tu ujung ni huta i, ninna si Samuel ma tu si Saul: Dokkon ma naposo i pajolohon, gabe dipajolo ma; alai ngongong ma ianggo ho dison, asa hupatubegehon tu ho hata ni Debata.

I Samuel 10

10:1 Dung i dibuat si Samuel ma guriguri sada marisi miak, jala diusehon tu ulu ni si Saul, laos diumma ibana huhut didok: Nda naung miniahan ni Jahowa do ho bahen partogi ni bangso naung niainna i?
10:2 Molo dung tundal ho annon sian lambungkon, jumpang ho ma dua baoa mardonokkon tanoman ni si Rahel, marbalokkon tano Benjamin di Selsa, dohononna ma tu ho: Nunga jumpang halode boruboru angka na niluluanmu; jala ida ma, nunga malua ianggo angka halode i sian roha ni amanta, balik taringot tu hamu holsoan ibana: Aha na ma bahenonku taringot tu anakku, ninna?
10:3 Molo dung mamedu ho sian i manulus dalanmu sahat ro di hariara Tabor, jumpang ho ma disi tolu halak, angka na nangkok manopot Debata tu Betel, na sada mangusung tolu anak ni hambing, na sada mamboan tolu kibung roti, na sada mamboan guriguri marisi anggur.
10:4 Jadi usousoannasida ma sonangmu, jala lehononna tu ho dua roti, sijaloonmu ma i sian tangannasida.
10:5 Dung i sahat ma ho tu dolok ni Debata, parsaroan ni halak Palistim, jadi ia dung sahat ho tubagasan huta i, pajumpang ma ho dohot sada horon panurirang, angka na tuat sian robean i, di jolonasida do arbab, sarune, tulila dohot hasapi, angka manurirangi be nasida.
10:6 Jadi songgopan ni Tondi ni Jahowa ma ho, gabe manurirangi ho rap dohot nasida, jadi muba ma ho gabe jolma na asing.
10:7 Jadi ia dung masa angka tandai tu ho, bahen ma guru roham na jumpang tanganmu, ai donganan ni Jahowa do ho.
10:8 Dung i tuat ma ho tu Gilgal pajolohon, jala ida ma, tuat pe ahu mandapothon ho laho mamelehon angka pelean situtungon dohot angka pelean hamauliateon; ingkon pitu ari lelengna paimaonmu ahu ro mandapothon ho, asa hupabotohon tu ho sibahenonmu.
10:9 Jadi dung tundal ibana laho sian lambung ni si Samuel, gabe dipauba Debata ma rohana, songgop ma dohot sude angka tandai sadarina i.
10:10 Ai dung sahat nasida tu dolok Gibea, ida ma, sahoron panurirang manjumpangkon ibana, gabe songgop ma Tondi ni Debata tu ibana, laos manurirangi ibana di tongatonganasida.
10:11 Alai dung diida saluhut angka na tumanda ibana na sai laon, ibana manurirangi hape rap dohot angka panurirang, gabe ninna be ma tu donganna: Aha do na masa tu anak ni si Kis? Dohot do si Saul hape di tongatonga ni angka panurirang?
10:12 Jadi ro ma alus ni na sahalak sian i mandok: Ise do ulaning amanasida? Alani manjadi gabe umpama: Dohot do si Saul hape di tongatonga ni angka panurirang?
10:13 Dung mansohot ibana manurirangi tolhas ma ibana tu robean i.
10:14 Dung i ninna tulang ni si Saul ma tu ibana dohot tu naposona: Tudia hamu laho huroha? Gabe didok ibana ma: Mangalului angka halode boruboru nian; jadi dung huida hami ndang disi, gabe laho hami manopot si Samuel.
10:15 Dung i ninna tulang ni si Saul ma: Ue paboa di ahu manang aha na nidok ni si Samuel tu hamu.
10:16 Jadi ninna si Saul ma tu tulangna i: Tangkas do dipaboa tu hami naung jumpang angka halode i. Alai anggo hata harajaon i, na nidok ni si Samuel, ndang dipaboa tu ibana.
10:17 Dung i dipaluhut si Samuel bangso i tumopot Jahowa tu Mispa.
10:18 Jadi ninna ma tu halak Israel: Boti hata ni Jahowa, Debata ni Israel: Ahu do manogihon Israel ruar sian Misir, jala hupalua hamu sian tangan ni halak Misir, sian tangan ni saluhut harajaon angka na mangarupa hamu.
10:19 Alai nunga ditoishon hamu sadarion Debatamuna, na paluahon hamu sian saluhut jeamuna dohot sian hagogotanmuna, hape didok hamu do tu Ibana: Ingkon pabangkitonmu di hami sada raja. Dibahen i tindang ma hamu di jolo ni Jahowa marmargamarga, jala marsaribusaribu.
10:20 Dung i didokkon si Samuel ma jumonok saluhut marga ni Israel, gabe hona ma marga Benjamin.
10:21 Dung i didokkon muse jumonok marga Benjamin marsuhusuhu, gabe hona suhu Matris, hona muse si Saul, anak ni si Kis. Jadi dilului nasida ma ibana, hape ndang jumpangsa.
10:22 Jadi diulahi nasida ma manungkunhon tu Jahowa: Ndang dope ro baoa i tuson? Jadi ninna Jahowa ma: Ida ma, na martabuni do ibana tu parugasanan.
10:23 Jadi marlojong ma nasida mangalap ibana sian i. Jadi dung tindang ibana di tongatonga ni bangso i, gabe gumanjang ibana sian sandok bangso i, olat ni abarana tu ginjang.
10:24 Dung i ninna si Samuel ma tu sandok bangso i: Ida hamu ma na pinillit ni Jahowa, ai tudoshon ibana ndang adong di sandok bangso i. Jadi marsurak ma sandok bangso i, angka ninna nasida ma: Sai mangolu ma rajai!
10:25 Dung i dipaboa si Samuel ma tu bangso i uhum harajaon, laos disurathon tubagasan sada buku, jala dipeakkon tu jolo ni Jahowa Dung i dipamuli si Samuel ma sandok bangso i, ganup tu jabuna be.
10:26 Laho do dohot si Saul tu jabuna di Gibea, dipataru parangan angka na sinunggul ni Debata rohanasida.
10:27 Alai adong do huhut angka halak na jahat, angka na mandok: Tung aha ma hangoluan turgas on ni baoa on, gabe marhu ni roha nasida mida ibana, laos so diboan silua tu ibana; alai dipaula so dibege si Saul do hata i.