Category Archives: 33 Mika

Mika 1

1:1 On ma hata ni Jahowa na ro tu si Mika sian Maressa, uju di angka ari ni si Jotam, Ahas dohot Hiskia, angka raja sian Juda; hata angka na niidana taringot tu Samaria dohot Jerusalem.
1:2 Tangihon ma, hamu ale angka bangso saluhutna! Patinggil ma pinggolmu, ale tano on ro di pangisina i! Asa gabe sitindangi Tuhan Jahowa dompak hamu, Tuhan i sian joro habadiaonna.
1:3 Ai ida ma, ruar do Jahowa sian ingananna, jala tuat ibana, jala mardalan di atas buntulbuntul ni tano on.
1:4 Jadi malala ma angka dolok di toruna, jala mabola angka rura, songon pantis maradophon api, songon aek tangkuju na mabaor sian robean.
1:5 Ala ni pangalaosion ni si Jakkob do saluhutna i, jala ala dosa ni pinompar ni Israel. Ise do parbonsiran ni pangalaosion ni si Jakkob? Nda Samaria do i? Jala ise do mula ni angka buntulbuntul ni Juda? Nda Jerusalem do i?
1:6 Jadi bahenonku ma Samaria gabe tambak batu di ladang, gabe porlak panuanan anggur; jala baorhononku tu rura angka batuna, jala patedehonku angka ojahanna.
1:7 Jala saluhut ganaganaannasida ropukkononhon sogot, jala nasa upa parmainanna mosokkononhon do tu api, jala nasa ganaganaannasida agohononhon do; ai sian upa parmainan dipapungupungu jadi ingkon mulak do i muse gabe upa parmainan.
1:8 Ala ni do ahu mangandungi jala tumatangis, mardalan ahu so marsipatu, jala marsaemara; marauang ahu songon antuasu, jala margudompong songon pidong unto.
1:9 Ai targisik do bugangna, pola sahat ibana tu Juda, dolos ibana sahat tu bahal ni bangsongku, sahat tu Jerusalem.
1:10 Unang baritahon hamu barita i di Gat, unang tangis hamu di Akko. Margulu sirabun ahu di Bet Leapara.
1:11 Borhat ma ho, ale isi ni Sapir marsaemara mardongan haurahon. Ndang ruar anggo isi ni Zenan, tarbege do andung sian Bethejel, ai buatonna do sian hamu hajongjonganna.
1:12 Ai margondok ni roha do isi ni Marot ala mago na denggan i; ai nunga tuat sian Jahowa hamagoan sahat tu bahal ni Jerusalem.
1:13 Pasang ma hoda tu hureta, ho ale isi ni Lakis; parbonsiran ni dosa do huta i tu boru Sion, ai di bagasan ho do jumpang angka pangalaosion ni Israel.
1:14 Dibahen i tongosonmu ma surat partulahan taringot tu Maressa Gat, angka bagas sian Aksib, gabe gabus di angka raja ni Israel.
1:15 Paroonku dope angkupni sada sipanean di ho, ale isi ni Maressa; sahat ro di Adullam hamuliaon ni Israel.
1:16 Marnabung ma ho, asa palpal ho ala ni angka anak hasudunganmu; pabidang ma palpalmu, songon lali: Ai nunga tarboan nasida sian ho.

Advertisements

Leave a comment

Filed under 1 Padan Na Robi, 33 Mika

Mika 2

2:1 Marjea ma halak situptup hageduhon dohot angka sibahen hajahaton di atas lagenasida, disi torang ari diulahon ma i, ai nasa gogo ni tanganna dibahen.
2:2 Ia impol rohanasida di angka hauma, laos dirampas do i, manang di angka bagas, laos dibuat nasida do. Sai dirupa nasida indukna ro di jabuna, baoa i pe ro di partalianna.
2:3 Dibahen i songon on do hata ni Jahowa: Ida ma marsangkap hamagoan ma ahu dompak bangso on, ndang tagamon malua rungkungmuna sian i, jala ndang be mandirgak hamu mardalan, ai tingki hamagoan do i.
2:4 Di ari na sasada i bahenon ni halak do sada ende aling taringot tu hamu, jala andungkononna sada andung: Nunga songgop, dohononna, nunga pesan situtu hita; partalian ni bangsongku nunga dipaimbar ibana; songon dia do pangarampasna di ahu! Tu pangose dibagihon haumanta.
2:5 Dibahen i ndang adong nanggo sada dingkan ho sisintak hotang pamalok laho martali diluhutan ni Jahowa.
2:6 Ndang jadi manurirangi hamu! Handiannasida i. Tung so manurirangi ma iba taringot tusi? Ndang tagamon mansohot angka haurahon.
2:7 Oe tung na jadi ma songon on pangkataion ni pinompar ni si Jakkob: Tung naung piripirion do Tondi ni Jahowa huroha? Tung songon i ma pangalaho ni angka jadijadianna? Tung so denggan huroha angka hatangku tu ganup halak na tigor marpangalaho?
2:8 Alai nunga tibu hian hehe bangsongku gabe musu: Dipupusi nasida ulos sampesampe dohot bajubaju sian halak pamolus na marsonangsonang, angka parsindak.
2:9 Angka inaina ni bangsongku dionjar hamu do sian bagas hasoloannasida; sian posoposonasida dibuat hamu do hamuliaonki salelenglelengna.
2:10 Borhat ma hamu jala laho, ai ndada on tano hasonangan ala haramunon na mangkorhon hamagoan na sogir situtu.
2:11 Tung sura adong sahalak na mangihutihut alogo dohot sipaotooto jala mandok hata gabus songon on: Manurirangi ma ahu di ho taringot tu anggur dohot tu tuak na pang! I ma nian panurirang ni bangso on.
2:12 Sai na papunguonku do sandok ho, ale Jakkob! Sai na paluhutonku do pasipasi ni Israel, pasadaonku ma nasida, songon birubiru di bagasan bara, songon sada punguan di tongatonga ni adaran, riburan nasida dibahen torop ni jolma.
2:13 Dung i manaek sada sipalua manguluhon nasida; tulusonnasida ma sahat ro di bahal, pola salpuanna tahe, jala rajanasida di jolonasida, jala Jahowa manguluhon nasida.

Leave a comment

Filed under 1 Padan Na Robi, 33 Mika

Mika 3

3:1 Dung i hudok ma: Ua tangihon hamu ma ale angka induk ni Jakkob dohot hamu ale angka panguhum ni pinompar ni Israel! Nda tama ma ingkon botoonmuna uhum?
3:2 Hamu angka na mangkagigihon na denggan, jala mangapian di na roa, angka na mambobahi hulingkulingnasida sian dagingna dohot na mambilbil sibuk sian holiholinasida.
3:3 Hamu angka na manohali sibuk ni bangsongku, jala dibobahi hulingkulingnasida sian nasida, jala diponggolhon holiholinasida, jala dijaljali songon di bagasan hudon, songon sibuk di tongatonga ni balanga.
3:4 Disi ma nasida joujou tu Jahowa, alai ndang alusanna nasida, jala hungkupanna bohina maradophon nasida di tingki uju i, hombar tu pambahenannasida angka na jahat i.
3:5 Songon on do hata ni Jahowa dompak panurirang, angka na mangaliluhon bangsongki, angka na maningtingkon dame molo adong sihilhilon ni iponnasida, alai manang ise na so margugu panganonnasida, marmusumusu nasida dompak ibana.
3:6 Dibahen i lia sian pangungkapon do borngin di hamu, jala lia sian pangarundingon hagolapon di hamu; gari mata ni ari sundut do di atas ni angka panurirang, jala holom marimpotimpot ia arian di nasida.
3:7 Jadi murak ma angka pangarunding, jala maila angka partondung, saluhut nasida mangkuphupi misena, ai ndang adong ro paraluson sian Debata.
3:8 Alai anggo ahu gok gogo do, gok Tondi ni Jahowa dohot uhum dohot hatogaon paboahon tu Jakkob pangalaosionna, dohot tu Israel dosana.
3:9 Antong tangihon ma on hamu ale angka induk ni pinompar ni si Jakkob dohot hamu angka panguhum ni pinompar ni si Israel, angka na marbiasbias di uhum, jala dipapeol nasa hatigoran.
3:10 Angka na pauli Sion marhitehite mudar dohot Jerusalem marhitehite hageduhon.
3:11 Manjalo sisip angka induknasida mandabu uhum, jala manjalo upa mangajari malim nasida, jala manjalo perak panurirangnasida mangarundingi, laos mangasahon Jahowa dope nasida, ninna do: Nda Jahowa do di tongatonganta? Ndang tagamon ro hamagoan tu hita!
3:12 Dibahen i ala hamu ninggala on do Sion sogot songon hauma tur, jala Jerusalem gabe timbunan batu, jala dolok ojahan ni joro i gabe tombak.

Leave a comment

Filed under 1 Padan Na Robi, 33 Mika

Mika 4

4:1 Jadi masa ma sogot di ujung ni angka ari: Ojak ma dolok ni joro ni Jahowa di punsu ni angka dolok, jala huminsat sian angka robean, jadi marrongoman ma tu ibana angka bangso.
4:2 Jadi mardalan ma torop bangso parbegu, angka dohononnasida ma: Beta hita nangkok tu dolok ni Jahowa, dohot tu joro ni Debata ni si Jakkob, asa diajarhon tu hita angka dalanna, jala mardalan hita di angka lapangna. Ai marharoroan sian Sion do patik i, jala hata ni Jahowa sian Jerusalem.
4:3 Jadi manguhum ma ibana di tongatonga ni torop angka bangso jala toruanna angka bangso bolon sahat ro di na dao; jadi patopahononnasida ma podangnasida bahen gigi, jala hujurnasida bahen sasabi. Ndang be sintahon ni bangso dompak bangso podang, jala ndang be guruhononnasida ruhut ni hamusuon.
4:4 Hundul be ma nasida di toru ni hau anggurna dohot di toru ni hau arana, jala ndang adong panonggoti, ai pamangan ni Jahowa Zebaot do na mandok i.
4:5 Ai saluhut angka bangso mardalani marhitehite goar ni debatana be, alai anggo hita mardalan marhitehite goar ni Jahowa Debatanta ro di saleleng ni lelengna.
4:6 Di ari na sasada i, ninna Jahowa, papungupunguonku ma jolma na mengkat, jala jolma na binolongkon paluhutonku muse ro di jolma na hupasipal na jolo.
4:7 Jala patindangonku jolma na mengkat i bahen pasipasi, jala jolma na dao binolongkon bahen bangso na gogo, jala Jahowa rajanasida di dolok Sion olat ni nuaeng ro di salelenglelengna.
4:8 Ianggo ho ale Migdal Eder, robean ni boru hian, ro do hamuliaonmu sogot tu ho; ro do huhut tu ho panggomgomion parjolo harajaon ni boru Jerusalem.
4:9 Ia nuaeng, boasa tung mangangguhi ho? Tung na so adong be raja di tongatongamu? Manang tung naung mago do panuturim, umbahen marsahit rian ho, songon boruboru na maniop siraraisan.
4:10 Paodon ma, jala lujukkon ale boru Sion, songon boruboru na naing mangintubu! Ai ingkon ruar ho anggo nuaeng sian huta i jala maringan di ladang, jala ingkon sahat ho tu Babel; disi ma ho paluaonna, disi ma tobuson ni Jahowa ho sian tangan ni musum.
4:11 Alai anggo nuaeng marpungu torop angka bangso parbegu dompak ho, angka na mandok: Niramunan ma! Asa tung sombu roha ni matanta mida Sion!
4:12 Alai ndang ditanda nasida anggo angka sangkap ni Jahowa, jala ndang diantusi nasida tuptupna: Na pinapunguna i nasida, songon tibalan tu pardegean.
4:13 Hehe ma ho jala mardege, ale boru Sion! Ai tandukmi gabe bosi bahenonku, jala sisilonmi gabe tombaga bahenonku, jadi ropuhanmu ma torop angka bangso jala tu Jahowa ontongkononku arta na niomonasida, jala ugasannasida tu Tuhan sigomgom liat portibi on.
4:14 On pe marhoronhoron ma hamu, ale boru ni parduan ni parangan! Ai hona tungkum do hita humaliang; tungkot do dilibashon tu hurum ni siuhum Israel.

Leave a comment

Filed under 1 Padan Na Robi, 33 Mika

Mika 5

5:1 Alai anggo ho, ale Betlehem Eprata, mametmethu do ho nian anggo tung pola jujuron tu angka huta marriburibu di Juda; hape sian ho do haroroan ni na gabe panggomgomi di Israel, jala angka haroroanna sian na nahinan, sian angka ari na robi salelenglelengna.
5:2 Dibahen i pasahatonna ma nasida sahat ro di tingki pangintubuan ni na manubuhon, jala mulak pasipasi ni angka hahaanggina tu angka anak ni Israel.
5:3 Alai jongjong anggo ibana, jala marmahan mangasahon gogo ni Jahowa, marhitehite hamuliaon ni goar ni Jahowa Debatana; jadi maringan ma nasida, ai timbul ma ibana disi ro di angka ujung ni tano on.
5:4 Jala ibana gabe hadameon; molo naeng ro Assur tu tanonta, molo naeng luntahonna bagasta angka na bolon i, jadi patindangonta ma mangalo ibana pitu parmahan dohot ualu induk ni jolma.
5:5 Jadi suda gagatonnasida tano Assur marhitehite podang dohot tano ni si Nimrod di bagasan harbanganna. Jadi ibana ma paluahon hita sian Assur molo ro naeng sumola tanonta, jala naeng degeonna partalpahanta.
5:6 Jadi sobokkon nambur sian Jahowa ma pasipasi ni Jakkob di tongatonga ni torop angka bangso, jala songon udan na manetehi tu duhutduhut, na so maimaima di jolma, manang di angka anak ni jolma.
5:7 Alai huhut muse pasipasi ni Jakkob di tongatonga ni angka bangso parbegu, di tongatonga ni torop angka bangso, songon singa di tongatonga ni binatang angka na di tombak, songon singa panoro di tongatonga ni angka punguan ni birubiru, molo dibolus, gabe dilotongi jala disoro, ndang adong na paluahon.
5:8 Jadi timbul ma tanganmu di atas ni angka na manosak ho, jala siap nasa musum.
5:9 Di ari na sasada i, ninna Jahowa, siaphononku ma angka hodam sian tongatongami, jala agoonku angka huretam.
5:10 Siaphononku ma dohot angka huta bolon ni tanom, jala gargaronku nasa hutam angka na gonting i.
5:11 Jala pansingkononku angka utiutian sian tanganmu, jala ndang adong be di ho pangarunding.
5:12 Jala siaphononku ma ganaganaan ni angka na niuhirmi dohot ganaganaan angka na tinuangmi sian tongatongami, jadi ndang be ho marsomba tu jadijadian ni tanganmu.
5:13 Jala uratanku ma angka sombaonmi sian tongatongam, jala siaphononku angka hutam.
5:14 Jala bahenonku ma partubolan di bagasan parpiar ni rimashu tu angka bangso parbegu, angka na so tumangihon ahu.

Leave a comment

Filed under 1 Padan Na Robi, 33 Mika

Mika 6

6:1 Ua tangihon hamu ma na nidok ni Jahowa: Borhat ma ho marbada dompak angka dolok, asa dibege angka dolokdolok soaram.
6:2 Tangihon ma, hamu ale angka dolok, parbadaan ni Jahowa, hamu pe ojahan ni tano on, angka na hoti, ai marparbadaan do Jahowa dohot bangsona, jala naeng masitariasan ibana dohot Israel.
6:3 Aha do uhumhu na sega tu ho, ale bangsongku? Marhitehite aha tahe ho hulojai? Alusi ma ahu!
6:4 Ala na hutogihon i ho ulaning ruar sian tano Misir, jala hupalua ho sian bagas parhatobanan i? Husuru si Musa, si Aron dohot si Miriam manguluhon ho?
6:5 Sai ingot ale bangsongki, na tinahi ni si Balas, raja sian Moab dohot alus ni si Bileam, anak ni si Beor, tu ibana; angka na masa olat ni Sitim pe sahat ro di Gilgal, asa tung ditanda ho angka habonaron ni Jahowa.
6:6 Marhitehite aha tarbahen ahu mandapothon Jahowa, marsomba ahu tu Debata na di ginjang? Marhitehite angka pelean situtungon ulaning ahu manjumpangkon ibana marhitehite anak ni lombu, angka na marumur sataon ulaning?
6:7 Lomo do ulaning roha ni Jahowa mida hambing tunggal marriburibu? Manang mida angka sunge miak marloksaloksa? Lehononku do ulaning anak buhabajungku abul ni pangalaosingki? Parbue ni butuhangku ulaning abul ni dosa ni rohangku?
6:8 Nunga dipabotohon ibana tu ho, ale jolma manang aha na denggan, jala manang aha na niluluan ni Jahowa sian ho, nda holan na mangulahon uhum dohot holong ni roha di habasaon, jala marpangalaho haserepon maradophon Debatam.
6:9 Joujou do suara ni Jahowa tu huta i, jala hatuaon do na tinembak ni goarmu. Tangihon hamu ma linsinglinsing dohot ibana na mangalumbahonsa.
6:10 Nda tong dope adong di jabu ni halak parjahat angka arta hajahaton, dohot ampang na mametmethu, naung pinulasan hian?
6:11 Tung tarbahen ahu ma marsombusombu mida hatian hajahaton dohot mida batu timbangan ni pangansion di bagasan puro?
6:12 Ala gok hadoboon halak na mora di bagasan huta i, jala pangisina i mangkatahon gabus, jala sipaotooto do dilanasida di bagasan pamangannasida.
6:13 Ahu pe antong matemate ne ho bunuonku, jala tarulang ho bahenonku ala ni dosam.
6:14 Mangan pe ho, hape ndang butong jala haraparonmu maringan di bagasan butuham, jala na niluahonmu, laos so malua, jala na pinaluam pasahatonku do tu podang.
6:15 Manabur pe ho hape ndang adong gotilonmu; mardege parbue ni jetun pe ho, hape ndang jadi miahanmu ho dohot miak nang mangilang parbue ni anggur ho, ndang jadi inumonmu anggur i.
6:16 Ai diradoti hamu angka patik ni si Omri ro di nasa jadijadian ni pinompar ni si Ahab, jala mardalan hamu mangihuthon angka sangkapnasida, ala ni pasahatonku ma ho gabe tarulang jala pangisina i gabe sirehereheon, ia haurahon ni bangsongku: Ingkon hamu do mangusungsa.

Leave a comment

Filed under 1 Padan Na Robi, 33 Mika

Mika 7

7:1 Ngalutnai di ahu, ai nunga tung tudos ahu tu halak na papunguhon parbue, songon halak na manjomputi na marpisikpisik dung gotilon anggur! Ndang adong be parbue ni anggur allangon, sai mangapian do rohangku di patumonaanna.
7:2 Nunga tung siap jolma na daulat sian tano on, jala ndang adong halak na tigor nanggo sada di tongatonga ni jolma. Tung saluhut nasida mangarop di mudar, sai masitaonan sambil do nasida be tu donganna.
7:3 Girgir do tangannasida mangulahon na roa: Tole pangarajai mangigil silehonlehon, jala panguhum manjalo sisip, jala halak na bolon guru roharohana do mangkuling, gabe marpiupiu hajahatan dibahen nasida.
7:4 Na dumenggan sian nasida tung sobokkon suga do, jala na tumobok tumajom sian tadatada; nunga ro ari na nilumbahon ni pangarundingmi, ari partubolan tu ho tarhatotong ma ho nuaeng bahenonnasida.
7:5 Unang ma porsea manang ise di donganna! Unang ma marhaposan tu aleale hasudungan ni roha, gari maradophon parompuan na modom di ampuanmi ingkon jamotanna do angka bibir ni pamanganmu.
7:6 Ai anak i paotootohon amana, boru i hehe dompak inana, parumaen dompak simatuana boru, musu ni baoa i i ma angka halak donganna sajabu.
7:7 Alai anggo ahu manatap tu Jahowa do, jala dihalungunhon rohangku do Debata ni hatuaonku, sai tangihonon ni Debatangku do ahu.
7:8 Unang ho marlas ni roha, ale musungku, mida ahu! Ai tinggang pe ahu sai hehe do ahu muse; ai hundul pe ahu nuaeng di bagasan haholomon, Jahowa do panondang di ahu.
7:9 Usungonku do rimas ni Jahowa, ai dompak ibana do ahu mardosa, paima dibadahon ibana badangku, jala maruli uhum ahu dibahen. Sai toguonna do ahu sogot tu hatiuron, idaonku do hatigoranna.
7:10 Alai idaon ni musungku ma i sogot, jadi hungkupan ni haurahon bohina, ibana naung mandok tu ahu: Didia do Jahowa Debatam? Marsombusombu ma matangku marnida nasida, dung hona luntak songon gambo di alaman.
7:11 Nunga ro ari parpaulion di parikmu, ari parholangan ni patik do i.
7:12 Ari haroroan ni halak do i tumopot ho sian Assur, dohot sian angka huta ni Misir; jala sian Misir sahat ro di batang aek jala sian laut tu laut jala sian tor tu tor.
7:13 Alai gabe halongonan ma tano i ala ni pangisina, binahen ni parbue ni pambahenannasida.
7:14 Sai parmahan i ma bangsom marhitehite batahim, punguan ni partalianmi, ho ale na punjung maringan di tombak, di tongatonga ni Karmel! Loas ma nasida manjampal di Basan dohot di Gilead songon uju di ari angka na galia.
7:15 Suang songon di angka ari haruruarmu sian tano Misir, ahu pataridahon tu nasida angka halongangan.
7:16 Idaon ni angka bangso parbegu ma i, gabe murak nasida ala ni saluhut hagogoonnasida i, ampehononna ma tangan tu pamanganna gabe nengel pinggolnasida.
7:17 Ingkon dilatonnasida ma orbuk songon ulok na manginsiri di tano; angka hitir nasida ro sian partabuniannasida i mandapothon Jahowa Debatanta i, angka dotdot nasida jala mabiar maradophon ho.
7:18 Tung ise ma Debata songon ho, na marpamuati di dosa jala na umbolus pangalaosion ni partalianna na teba i! Ndang tongtong ibana marsigomos marronirimas, ai mangkalomohon asi ni roha do ibana.
7:19 Sai marpangulahi do rohana, jala popoanna do angka hajahatonta; jala reongkononna do sude dosanasida i tu laut apala na umbagas.
7:20 Sai lehononmu do hasintongan tu si Jakkob, asi ni roha tu si Abraham, naung niuarihonmu tu ompunami sian angka ari na robi dope.

Leave a comment

Filed under 1 Padan Na Robi, 33 Mika