Category Archives: 32 Jona

Jona 1

1:1 Dung i ro ma hata ni Jahowa tu si Jona, anak ni si Amittai, songon on:
1:2 Borhat ma ho laho tu Ninive, huta na bolon i jala martingting dompak huta i, ai nunga pola maungaung hajahatonnasida sahat tu jolongku.
1:3 jadi borhat ma si Jona laho maporus tu Tarsis maradophon Jahowa, gabe tuat ma ibana tu Joppe, jumpangsa ma disi sada parau na laho tu Tarsis; jadi dilehon ma seoana, gabe masuk ma ibana tu bagasan parau i laho marlayar rap dohot nasida tu Tarsis maporus maradophon Jahowa.
1:4 Alai ditompuhon Jahowa ma habahaba siappalautus tu laut i, gabe masa ma hagunturon bolon di bagasan laut i, gabe disurasura nasida angka ripuk parau i.
1:5 Jadi mabiar ma halak parparau i, mangangguhi ma nasida ganup tu debatana be, jala direongkon ulaula angka na di bagasan ni parau i tu laut, paneangkon sian nasida. Alai mijur tu pamurnangan ni parau i ianggo si Jona, peak disi laos diparedem modom.
1:6 Jadi ro ma induk ni halak paaparau i mandapothon ibana, jala ninna ma tu ibana: Aha di ho parpodom na redem? Hehe ma ho manjou ma ho tu Debatam, anggiat tung marpangulahi roha ni Debata tu hita, asa unang harom hita.
1:7 Dung i mangkuling ma nasida ganup tu donganna: Tole, marhopok ma hita, asa itaboto manang ala ni ise umbahen na ro parmaraan on tu hita. Jadi marhopok ma nasida, gabe hona si Jona.
1:8 Dung i ninna nasida ma tu ibana: Ua paboa di hami ala ni aha umbahen na ro parmaraan on tu hita? Aha do bahenbahenanmu? Jala sian dia ho ro? Dia do tanom, jala sian bangso dia do ho?
1:9 Jadi ninna ibana ma tu nasida: Halak Heber do ahu, jala Jahowa, Debata sitompa langit do na huhabiari, ibana do sitompa laut dohot darat.
1:10 Jadi mabiar situtu ma angka jolma i, angka didok nasida ma tu ibana: Boasa tung songon i bahenonmu? Ai diboto angka jolma i do, na maporus do ibana maradophon Jahowa, ai nunga dipaboa hian tu nasida.
1:11 Dung i didok nasida ma tu ibana: Aha nama bahenonnami tu ho, asa tung mansadi laut i sian hami? Ai lam tu gunturna do laut i.
1:12 Jadi ninna ibana ma tu nasida: Hindat hamu ma ahu, jala reongkon hamu ahu tu laut, jadi mansadi ma laut i sian hamu, ai huboto do, ala ni ahu do ro hagunturon bolon on tu hamu.
1:13 Jadi digogo angka jolma i ma marluga laho mulak tu pasir nian, alai ndang tartondongnasida, ai lam guntur do laut i dompak nasida.
1:14 Jadi manjou ma nasida tu Jahowa, angka didok nasida ma: Iale Jahowa, sai unang loas hami mago ala ni hosa ni baoa on, jala unang jujur tu hami mudar na so marpipot, ai nunga dibahen ho hombar tu lomo ni roham, ale Jahowa.
1:15 Dung i dihindat nasida ma si Jona jala direongkon ibana tu laut. Jadi so ma laut i sian gunsangna.
1:16 Jadi mabiar situtu ma angka jolma i mida Jahowa laos dipelehon pelean tu Jahowa, jala marbagabaga nasida tu ibana.

Advertisements

Leave a comment

Filed under 1 Padan Na Robi, 32 Jona

Jona 2

2:1 Dung i diparo Jahowa ma sada ihan raja, asa di bondut si Jona. Jadi di bagasan butuha ni ihan i ma si Jona tolu ari tolu borngin.
2:2 Dung i martangiang ma si Jona tu Jahowa Debatana, sian butuha ni ihan i.
2:3 Jala didok ma: Joujou do ahu sian hagogotanki tu Jahowa gabe dialusi ibana ahu. Sian butuha ni parbeguan ahu mangangguhi: Ditangihon ho do soarangki!
2:4 Nunga direongkon ho ahu tu bagasan lung tu bagasan pusupusu ni laut, gabe pusat mangkaliangi ahu, sude angka ombakmi dohot galumbangmi mangalungkupi.
2:5 Ianggo ahu, nunga hudok: Nunga bali ahu sian jolo ni matam; alai tahe ulahanku dope mamereng dompak joro habadiaonmi.
2:6 Nunga nian dihaliangi angka aek i ahu, pola tos hosangku, lung i pasampaksampak ahu sirambon do alit tu ulungku.
2:7 Nunga mangungkor ahu sahat tu bona ni angka dolok, ransangransang ni tano on pe nunga tarsordak humaliang ahu ro di salelenglelengna. Alai dipanangkok ho ngolungku sian godung ale Jahowa Debatangku.
2:8 Uju mandate hosangku di bagasan, Jahowa ma huingot, jadi sahat ma tangiangku tu ho, tu joro ni habadiaonmi.
2:9 Alai halak na marsomba tu ganaganaan sipaotooto, i ma na manadingkon hasonangannasida i.
2:10 Alai anggo ahu mardongan soara pujipujian ahu mamele tu ho, gararonku do na huparbagabaga, Jahowa do nampuna hatuaon.
2:11 Dung i didok Jahowa ma tu ihan i, gabe diutahon ma si Jona tu pasir.

Leave a comment

Filed under 1 Padan Na Robi, 32 Jona

Jona 3

3:1 Dung i ro ma muse hata ni Jahowa tu si Jona paduahalihon, songon on:
3:2 Borhat ma ho laho tu Ninive huta na bolon i, jala tingtingkon tusi tingting sipaboaonku tu ho.
3:3 Jadi borhat ma si Jona laho tu Ninive hombar tu hata ni Jahowa. Alai huta na bolon do ianggo Ninive di jolo ni Debata, partoluarian mardalan lambasna.
3:4 Dung i dipungka si Jona ma mardalan di bagasan huta i parsadarian, jala martingting ma ibana mandok: Opatpulu ari nari na ma, jadi marongrong ma Ninive!
3:5 Jadi porsea ma angka jolma i isi ni Ninive i di Debata, jala ditingtingkon mandokkon marpuasa sadari, jala marulos hori nasida sian halak na magodang ro di na metmet.
3:6 Dung i sahat ma hata i tu raja ni Ninive. Jadi hehe ma ibana sian habangsana, jala diosari pangkeanna hian sian dagingna, jala martujungkon hori ibana, jala hundul tu sirabun.
3:7 Dung i disuru rajai ma martingting paboahon tu bagasan Ninive, songon on do tingting ni rajai dohot donganna angka na sangap: Nang jolma dohot pinahan, tole lombu dohot birubiru, ndang jadi mandai agia aha, ndang jadi manggagat, aek pe ndang jadi inumonna.
3:8 Ingkon marulos hori jolma, nang pinahan, jala gogoonna be joujou tu Debata; jala ganup jolma ingkon mulak sian dalanna na roa i, dohot sian hatodoson na niula ni tangannasida.
3:9 Ise umbotosa, anggiat tung marpangulahi jala solsolan ni Debata rohana, jala mulak ibana sian parpiar ni rimasna, asa unang mago hita.
3:10 Jadi dung diida Debata pambahenannasida, na mulak i nasida sian dalannasida angka na roa i, gabe disolsol Debata ma rohana taringot tu hamagoan na nilumbahonna bahenonna hian tu nasida, gabe ndang saut dibahen.

Leave a comment

Filed under 1 Padan Na Robi, 32 Jona

Jona 4

4:1 Alai sogo situtu do roha ni si Jona disi, jala piripirion ibana.
4:2 Jadi martangiang ma ibana tu Jahowa jala didok ma: Oe, ale Jahowa, nda i do hatangku hian, uju di tanongku dope ahu? Umbahen hujoloani nian maporus tu Tarsis, ai huboto hian do, Debata parasi roha jala pardengganbasa do ho lambat tarrimas, jala parasi roha godang, jala na olo sumolsol rohana taringot tu hamagoan.
4:3 On pe ale Jahowa, ua buat ma tagonan hosangku sian ahu, ai dengganan ahu mate sian na mangolu.
4:4 Dung i ninna Jahowa ma: Tung turut ma ho marronirimas?
4:5 Dung i ruar ma si Jona sian huta i, jala hundul tungkan habinsaran ni huta i, jala dibahen disi soposopona, jala hundul tusi marlinggomlinggom, paima diida manang aha masa tu huta i.
4:6 Jadi dipadiri Debata Jahowa ma hau dulang sada, na simbur magodang di atas ni si Jona bahen parlinggoman di atas uluna, paluahon ibana sian hinamagona, jadi las situtu ma roha ni si Jona ala ni hau dulang i.
4:7 Dung i dipadiri Debata ma sada gulokgulok di hananaek ni sibalik hunik manogotna i, gabe diruangi ma hau dulang i, laos malos.
4:8 Jadi dung binsar mata ni ari dipadiri Debata ma alogo na mohop sian purba. Jadi didoit mata ni ari ma ulu ni si Jona, pola mandate ibana, jadi dipangido ma mate hosana, jala didok do: Dengganan ahu mate sian na mangolu!
4:9 Dung i didok Debata ma tu si Jona: Tung turut ma ho marronirimas ala ni hau dulang i? Gabe didok ibana ma: Turut do ahu marronirimas sahat ro di hamatean.
4:10 Jadi didok Jahowa ma: Gari ho marsak do roham ala ni hau dulang na so hinangaluthonmi manang pinagodanggodangmi, na tubu saborngin, jala mago saborngin.
4:11 Baliksa pala ahu, tung so marasi ni roha ahu mida Ninive, huta na bolon i, na marisi lobi saratus duapulu ribu jolma, angka na so umboto parsirangan ni siamunna dohot sihambirangna, tole pinahan na sai deak?

Leave a comment

Filed under 1 Padan Na Robi, 32 Jona