Category Archives: 01 I Musa

I Musa 1

1:1 Di mula ni mulana ditompa Debata langit dohot tano on.
1:2 Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek.
1:3 Dung i mangkuling ma Debata ninna: Jadi ma ho na tiur! Jadi tiur ma tutu.
1:4 Nunga denggan na tiur i diida Debata, jadi dibahen Debata ma parsirangan ni na tiur sian na holom.
1:5 Dung i digoar Debata ma na tiur i arian, goar ni na holom i borngin. Dung i bot ma ari, torang ma ari muse, i ma ari parjolo.
1:6 Dung i mangkuling muse ma Debata: Jadi ma ho hajangkajang di parsitongaan ni angka aek bahen parsirangan ni aek tu aek.
1:7 Jadi dipauli Debata ma hajangkajang i, asa disirang aek angka na di toru ni hajangkajang sian aek angka na di ginjang ni hajangkajang i, gabe manjadi ma songon i.
1:8 Dung i digoar Debata ma hajangkajang i langit. Dung i bot ma ari, torang ma ari muse, i ma ari paduahon.
1:9 Dung i ninna Debata ma: Marpungu ma hamu aek, angka na di toru ni langit i tu sada inganan, asa tarida na mahiang! Gabe manjadi ma songon i.
1:10 Dung i digoar Debata ma na mahiang i tano, ia parpunguan ni angka aek laut digoar. Jadi nunga denggan diida Debata.
1:11 Dung i ninna Debata ma: Dipantumburhon tano i ma duhutduhut dohot suansuanan, na marparbuehon boni, hau angka na marparbuehon bonina di bagasan tudos tu mansamna be di tano on, gabe manjadi ma songon i.
1:12 Jadi dipantubuhon tano i ma duhutduhut dohot suansuanan, na marparbuehon bonina tudos tu mansamna dohot hau na marparbuehon bonina di bagasan, tudos tu mansamna. Dung i nunga denggan diida Debata.
1:13 Jadi bot ma ari, torang ma ari muse, i ma ari patoluhon.
1:14 Dung i mangkuling muse ma Debata: Jadi ma hamu angka panondang di hajangkajang ni langit i, bahen parsirangan ni arian sian borngin, gabe tanda paboa titik ni padan dohot angka ari dohot angka taon.
1:15 Jala gabe panondang angka i di hajangkajang ni langit i, asa dipatiur tano on; dung i manjadi ma songon i.
1:16 Dung i dipauli Debata ma dua panondang angka na bolon; panondang na bolon, pangguruan ni arian, dohot panondang na metmet, pangguruan ni borngin, ro di angka bintang.
1:17 Dung i dibahen Debata ma nasida tu hajangkajang ni langit i, asa disondangi tano on.
1:18 Jala manggomgomi arian dohot borngin, jala bahen parsirangan ni na tiur sian na holom. Dung i nunga denggan diida Debata.
1:19 Jadi bot ma ari, torang ma ari muse, i ma ari paopathon.
1:20 Dung i mangkuling muse ma Debata: Dipantubuhon angka aek i ma gulokgulok na marhosa, angka na manjirir, jala marhabangan ma angka pidong di atas tano on martongatonga langit.
1:21 Dung i ditompa Debata ma angka dengke na balga dohot nasa na marhosa, angka na manjiriri di bagasan aek, masiboan mansamna ro di nasa pidong angka na masiboan mansamna. Jadi nunga denggan diida Debata.
1:22 Dung i dipasupasu Debata ma nasida, ninna ma: Marpinompari ma hamu, asa lam torop jala gohi hamu ma angka aek ni laut, lam torop ma dohot angka pidong di atas tano on.
1:23 Jadi bot ma ari, torang ma ari muse; i ma ari palimahon.
1:24 Dung i mangkuling muse ma Debata: Dipantubuhon tano i ma hosa angka na mangolu masiboan mansamna: Angka dorbia dohot gulokgulok dohot binatang masiboan mansamna, gabe manjadi ma songon i.
1:25 Dung i dipauli Debata ma angka binatang ni tano on masiboan mansamna, dohot angka dorbia masiboan mansamna, dohot gulokgulok ni tano on masiboan mansamna. Jadi nunga denggan diida Debata.
1:26 Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on.
1:27 Jadi ditompa Debata ma jolma i tumiru rupana, rupana ditiruanhon Debata laho manompa ibana, baoa dohot boruboru nasida ditompa.
1:28 Dung i dipasupasu Debata ma nasida, ninna Debata ma tu nasida: Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on.
1:29 Dung i ninna Debata ma: Boti ma i, nunga hulehon tu hamu nasa suansuanan na marparbuehon boni di sandok tano on, ro di sude hau angka na marparbue sisuanon, bahen panganonmuna ma i.
1:30 Alai anggo tu sude angka binatang ni tano on dohot tu angka pidong na martongatonga langit, ro di sude na manjirir di atas tano on, angka na marhosa di bagasan: Bulung ni angka suansuanan (hulehon) bahen panganonna, gabe manjadi ma songon i.
1:31 Dung i ditilik Debata ma sude na tinompana i, jadi nunga denggan situtu. Dung i bot ma ari, torang ma ari muse, i ma ari paonomhon.

Leave a comment

Filed under 01 I Musa, 1 Padan Na Robi

I Musa 2

2:1 Asa sun ma langit dohot tano on ro di isina sudena.
2:2 Jadi dung sun dibahen Debata jadijadianna i di ari papituhon, maradian ma Ibana di ari papituhon sian nasa ulaonna, na binahenna i.
2:3 Dung i dipasupasu Debata ma ari papituhon i, jala diparbadiai, ala na maradian Ibana disi sian nasa jadijadianna, na tinompa ni Debata laho pasunhon.
2:4 Songon i ma panjadijadi ni langit dohot tano, di na tartompa angka i, di ari panompaon ni Debata Jahowa di tano dohot langit.
2:5 Tagan so adong dope di tano on nasa ramba, jala tagan so martumbur dope nasa bulungbulung di ladang, ai ndang dope diparo Debata Jahowa udan tu tano on, jala ndang adong dope jolma na mangula tano i.
2:6 Alai martimpul ma uap sian tano on, gabe dibornohi sandok sisik ni tano on.
2:7 Dung i dijadihon Debata Jahowa ma jolma i sian orbuk ni tano on jala diullushon tu bagasan bungbung ni igungna hosa hangoluan i, gabe martondi na mangolu jolma i.
2:8 Dung i dipungka Debata Jahowa ma sada porlak di Eden tartungkan habinsaran, jadi tusi ma dibahen jolma na jinadihonna i.
2:9 Dung i dipantubuhon Debata Jahowa ma sian tano i nasa hau, angka na denggan idaon, jala tabo panganon, ro di hau hangoluan na di parsitongaan ni porlak i, nang hau parbinotoan ni na denggan dohot na roa.
2:10 Dung i ruar ma sada batang aek sian Eden i, asa dibornohi porlak i, manirpang ma sian i gabe opat batang aek bolon.
2:11 Goar ni parjolo: Pison, na mangaliati sandok tano Hevila, panombangan sere disi.
2:12 Jala meram situtu sere ni na saluat i. Jumpang do huhut disi landus dohot batu soham.
2:13 Ia goar ni batang aek paduahon: Gihon, na mangaliati sandok tano Kus.
2:14 Ia goar ni batang aek patoluhon: Hidekel (Tigris), na mamolus tungkan habinsaran sian Assur. Ia batang aek paopathon, i ma Euprat.
2:15 Dung i ditogihon Debata Jahowa ma jolma i paojakkon ibana tu porlak Eden i, asa dipaulaula jala diramoti.
2:16 Dung i dipatik Debata Jahowa ma jolma i, ninna ma: Jadi do panganonmu sian nasa hau di bagasan porlak on.
2:17 Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.
2:18 Dung i ninna Debata Jahowa ma: Ndang jadi punjung jolma i; hubahen ma di ibana sada pangurupina bahen donganna.
2:19 Ai dung sun dijadihon Debata Jahowa sian tano i nasa binatang di ladang ro di sude pidong angka na martongatonga langit, ditogihon ma i tu si Adam, asa diida manang beha goaranna; jala ia i dibahen si Adam goar ni nasa na marhosa laos i do goarna.
2:20 Jadi dibahen si Adam ma goar ni nasa pahanpahanan ro di pidong angka na martongatonga langit dohot nasa na manggulmit di tano on. Alai anggo di si Adam ndang adong jumpang pangurupi bahen donganna.
2:21 Dung i tarlalap modom ma si Adam dibahen Debata Jahowa, jadi dienet ma sada sian rusukna, jala dilangkophon sibuk tu pambuatanna i.
2:22 Dung i dipauli Debata Jahowa rusuk na binuatna i sian si Adam, bahen boruboru, jala ditogu ibana tu si Adam.
2:23 Dung i ninna si Adam ma: On do sahali holiholi sian angka holiholingku, jala sibuk sian sibukku; goaron ma ibana: Jolma ni baoa, ala sian baoa ibana binuat.
2:24 Dibahen i tadingkonon ni baoa do amana dohot inana mandongani jolmana, jadi sada sibuk nasida.
2:25 Marsaemara do nasida duansa, si Adam dohot jolmana i, jala ndang maila nasida.

Leave a comment

Filed under 01 I Musa, 1 Padan Na Robi

I Musa 3

3:1 Alai ulok do na umbisuk sian nasa na manggulmit di ladang, angka na jinadihon ni Debata Jahowa, jadi didok ma mandok boruboru i: Atehe tongon do didok Debata, na so jadi panganonmuna sian saluhut hau angka na di porlak on?
3:2 Dung i ninna boruboru i ma mandok ulok i: Jadi do panganonnami sian parbue ni hau angka na di porlak on.
3:3 Alai anggo sian parbue ni hau, na di parsitongaan ni porlak i didok Debata do: Unang pangan hamu sian i, jala unang jama hamu, asa unang mate hamu.
3:4 Dung i ninna ulok i ma mandok boruboru i: Ndang na tutu hamu mate.
3:5 Ai diboto Debata do, sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa.
3:6 Dung i sai dipanotnoti boruboru i ma parbue ni hau i dibahen dengganna panganon jala pia matana marnida, jala tau manunggul roha tu hapistaran hau i, jadi diputikkon sian parbuena i jala dipangan, dilehon ma dohot tu sinondukna sian i, gabe dipangan.
3:7 Dung i tonggor ma matanasida na dua, diboto ma na marsaemara nasida, gabe disomoti ma bulung ni hau ara bahen sabuknasida.
3:8 Dung i dibege nasida ma soara ni Debata Jahowa, na medangedang di porlak i di haroro ni alogo mareak bot ari, gabe martabuni ma si Adam dohot jolmana i di holangkolang ni hau angka na di porlak i maradophon bohi ni Debata Jahowa.
3:9 Dung i joujou ma Debata Jahowa di si Adam, ninna ma mandok ibana: Didia do ho?
3:10 Jadi ninna si Adam ma: Hubege nian suaram di porlak i, gabe mabiar ahu, ai marsaemara do ahu, umbahen na martabuni ahu.
3:11 Dung i ninna Debata ma: Ise na paboahon tu ho, na marsaemara i ho? Nda tung dipangan ho sian hau na hupatikkon i mangorai panganonmu?
3:12 Dung i ninna si Adam ma: Boruboru na nilehonmu bahen donganku, i do na mangalehon tu ahu sian hau i, gabe hupangan.
3:13 Dung i ninna Debata Jahowa ma tu boruboru i: Boasa songon i bahenonmu? Jadi ninna boruboru i ma: Ulok i do paotooto ahu, gabe hupangan.
3:14 Dung i ninna Debata Jahowa ma tu ulok i: Ala dibahen ho songon i gumodang ma torungku tu ho sian tu nasa pahanpahanan dohot sian tu nasa na manggulmit di ladang. Butuham na ma jururhononmu, jala orbuk panganonmu saleleng di ngolum.
3:15 Jala bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna.
3:16 Dung i ninna ma mandok boruboru i: Ganda situtu bahenonku parniahapanmu saleleng gabegabean ho; bernit taononmu laho manubuhon anakkonmu, sinondukmu na ma ihutanmu, jala ibana mangarajai ho.
3:17 Jala didok ma tu si Adam: Ala ditangihon ho soara ni jolmam, gabe dipangan ho sian hau na hupatikkon i, mandok: Unang pangan sian i, hona torungku ma tano on ala ho, porsuk ma ahaponmu manganhon gogona saleleng di ngolum.
3:18 Pantubuhononna ma huhut di ho angka duriduri dohot duhutduhut na marsuga, angka ingkau rata ni ladang i na ma panganonmu.
3:19 Ingkon hir hodokmu manganhon sipanganonmu, paima mulak ho gabe tano, pambuatanmu hian, ai tano do ho, jala tu tano do ho mulak sogot.
3:20 Dung i dibahen si Adam ma goar ni jolmana i: Hawa (hangoluan), ala ibana ina ni nasa na mangolu.
3:21 Dung i dipauli Debata Jahowa ma bobak bahen abit ni si Adam dohot jolmana i, jala dialithon tu nasida.
3:22 Dung i ninna Debata Jahowa ma: Ida ma, nunga doshon Sada sian Hami si Adam, umboto na denggan dohot na roa. On pe, asa unang didungdungkon tanganna mamutikkon huhut sian hau hangoluan jala dipangan gabe mangolu salelenglelengna.
3:23 Jadi dipabali Debata Jahowa ibana sian porlak Eden, asa diula tano pambuatanna i.
3:24 Jadi dilele ma si Adam i, jala dipaipahon angka kerubim tungkan habinsaran ni porlak Eden i marpodang sidua baba marjimburjimbur, asa dijaga dalan tu hau hangoluan.

Leave a comment

Filed under 01 I Musa, 1 Padan Na Robi

I Musa 4

4:1 Dung i sampur ma si Adam dohot si Hawa, jolmana i, jadi gabegabean ma ibana, ditubuhon ma si Kain, jala ninna ma: Nunga maruli ahu sada baoa sian Jahowa.
4:2 Dung i diulahi ma manubuhon si Abel anggina i; gabe parmahan birubiru ma si Abel, alai siula hauma anggo si Kain.
4:3 Dung i di laonlaon ni ari, diboan si Kain ma sian parbue ni haumana bahen pelean tu Jahowa.
4:4 Jadi dohot ma si Abel mamboan sian buhabaju ni birubiruna dohot sian tabotabona. Jadi lomo ma roha ni Jahowa mamereng si Abel dohot na pinelehonna i.
4:5 Alai anggo si Kain dohot na pinelehonna i, ndang dibereng. Jadi pusu ma roha ni si Kain jala rupi bohina.
4:6 Dung i ninna Jahowa ma mandok si Kain: Boasa tung pusu roham, jala boasa rupi bohim?
4:7 Nda songon on do? Molo na denggan diula ho i ma hadirgakon ni bohi; alai molo so diula ho na denggan, mangonggop dosa i di lambung pintu mangkalungunhon ho, alai ingkon ho mangarajaisa.
4:8 Dung i mangkatai ma si Kain dohot si Abel, anggina i. Alai dung ro di hauma nasida, hehe ma si Kain dompak si Abel anggina i, jala dibunu ibana.
4:9 Jadi ninna Jahowa ma tu si Kain: Didia do si Abel anggim i? Ndang huboto, ninna, tung ahu ma siparorot anggingki?
4:10 Alai ninna Jahowa ma: Aha do na binahenmi? Maungaung do sian tano i mudar ni anggim sahat tu Ahu.
4:11 Onpe gumodang ma torungku tu ho asa tu tano i, na pangangang babana jumalo mudar ni anggim sian tanganmi.
4:12 Molo diula ho tano i, ndang be lehononna gogona tu ho, mompasompas jala madoado na ma ho di tano on.
4:13 Dung i ninna si Kain ma mandok Jahowa: Ndang be tarsesa dosangki dibahen balgana.
4:14 Ndi, nunga dipabali Ho ahu sadari on sian tano on, jadi martabuni na ma ahu maradophon Bohim, gabe mompasompas jala madoado na ma ahu di tano on. Jadi manang ise na jumpangan ahu, bunuonna ma ahu.
4:15 Alai ninna Jahowa ma mandok ibana: Antong manang ise pe na mambunu si Kain, pitu lompit abulonna. Dung i dibahen Jahowa ma sada tanda tu si Kain, asa unang dibunu manang ise na jumpangan ibana.
4:16 Dung i manginsurut ma si Kain sian Bohi ni Jahowa laho maringan tu tano Nod, na tungkan habinsaran sian porlak Eden.
4:17 Dung i sampur ma si Kain dohot jolmana, jadi gabegabean ma ibana, jala ditubuhon si Hanok. Dung i dipungka ma sada sosor dibahen ma goar ni sosor i Hanok, mangihuthon goar ni anakna i.
4:18 Dung i ditubuhon si Hanok ma si Irad; si Irad manubuhon si Mehuyael; si Mehuyael manubuhon si Metusael; si Metusael manubuhon si Lamek.
4:19 Alai anggo si Lamek dua do jolmana dibuat, goar ni na sada si Ada, goar ni paduahon si Zilla.
4:20 Dung i ditubuhon si Ada ma si Jabal, ibana do ompu ni sude angka na mangingani undungundung dohot na marpinahan.
4:21 Ia goar ni anggina i si Jubal, ibana do ompu ni sude angka sipiltik hasapi dohot sordam.
4:22 Si Zilla pe ditubuhon do si Tubal Kain, pande ni sude angka sipauli tombaga dohot bosi; ia iboto ni si Tubal Kain si Naema do.
4:23 Dung i ninna si Lamek ma tu jolmana na dua i, si Ada dohot si Zilla: Bege hamu ma soarangku, hamu ale jolma ni si Lamek! Pinggol hamu ma torsangkon! Sai na bunuonku do sada baoa ala ni bugangki, jala sada dolidoli ala ni bosarhon.
4:24 Ai molo pitu hali abulon ia si Kain, ingkon pitupulu hali pitu abulon anggo si Lamek.
4:25 Dung i sampur ma si Adam muse dohot jolmana i, jadi ditubuhon ma anak sada, dibahen ma goarna si Set, ai nunga disolukkon Debata tu ahu sada tubu na asing, singkat ni si Abel, na binunu ni si Kain, ninna.
4:26 Tubu ma dohot anak ni si Set sada, dibahen ma goarna si Enos. Uju i ma dipungka halak pajoujou goar ni Jahowa.

Leave a comment

Filed under 01 I Musa, 1 Padan Na Robi

I Musa 5

5:1 On ma buku ni angka sundut ni si Adam, di ari panompaon ni Debata di si Adam, tudos tu rupa ni Debata ibana ditompa.
5:2 Baoa dohot boruboru nasida ditompa, jala dipasupasu nasida, jala dibahen goarnasida jolma, di ari panompaonnasida i.
5:3 Jadi dung saratus tolupulu taon mangolu si Adam, tubu ma anakna, tudos tu rupana, songon pangalahona, dibahen ma goarna si Set.
5:4 Ia umur ni si Adam, dungkonsa ditubuhon si Set ualu ratus taon do, jala ditubuhon anak dohot boru.
5:5 Jadi sia ratus tolupulu taon ma sandok umur ni si Adam mangolu, dung i mate ma ibana.
5:6 Dung saratus lima taon leleng ni si Set mangolu, ditubuhon ma si Enos.
5:7 Ia leleng ni si Set mangolu, dung ditubuhon si Enos, ualu ratus pitu taon do, jala ditubuhon anak dohot boru.
5:8 Jadi sia ratus sampulu dua taon ma sandok umur ni si Set, dung i mate ma ibana.
5:9 Dung siapulu taon leleng ni si Enos mangolu, ditubuhon ma si Kenan.
5:10 Ia leleng ni si Enos mangolu, dung ditubuhon si Kenan, ualu ratus sampulu lima taon do, jala ditubuhon anak dohot boru.
5:11 Jadi sia ratus lima taon sandok umur ni si Enos, dung i mate ma ibana.
5:12 Dung pitupulu taon leleng ni si Kenan mangolu, ditubuhon ma si Mahalaleel.
5:13 Ia leleng ni si Kenan mangolu dung ditubuhon si Mahalaleel ualu ratus opatpulu taon do, jala ditubuhon anak dohot boru.
5:14 Jadi sia ratus sampulu taon ma sandok umur ni si Kenan, dung i mate ma ibana.
5:15 Dung onompulu lima taon leleng ni si Mahalaleel mangolu, ditubuhon ma si Jared.
5:16 Ia leleng ni si Mahalaleel mangolu, dung ditubuhon si Jared, ualu ratus tolupulu taon, jala ditubuhon anak dohot boru.
5:17 Jadi ualu ratus siapulu lima taon sandok umur ni si Mahalaleel, dung i mate ma ibana.
5:18 Dung saratus onompulu dua taon leleng ni si Jared mangolu, ditubuhon ma si Henok.
5:19 Ia leleng ni si Jared mangolu, dung ditubuhon si Henok, ualu ratus taon, jala ditubuhon anak dohot boru.
5:20 Jadi sia ratus onompulu dua taon sandok umur ni si Jared, dung i mate ma ibana.
5:21 Dung onompulu lima taon leleng ni si Henok mangolu, ditubuhon ma si Metusalah.
5:22 Jadi dung ditubuhon si Metusalah i, sai marparange, mardonganhon Debata ma si Henok tolu ratus taon lelengna, jala ditubuhon anak dohot boru.
5:23 Jadi tolu ratus onompulu lima taon sandok umur ni si Henok.
5:24 Jala sai marparange, mardonganhon Debata ma si Henok, dung i ndang disi be ibana, ai dialap Debata do ibana.
5:25 Dung saratus ualupulu pitu taon leleng ni si Metusalah mangolu, ditubuhon ma si Lamek.
5:26 Ia leleng ni si Metusalah mangolu, dung ditubuhon si Lamek, pitu ratus ualupulu dua taon do, jala ditubuhon anak dohot boru.
5:27 Jadi sia ratus onompulu sia taon sandok umur ni si Metusalah, dung i mate ma ibana.
5:28 Dung saratus ualupulu dua taon leleng ni si Lamek mangolu, ditubuhon ma sada anak.
5:29 Dung i dibahen ma goarna si Noak, ninna ma: On ma mangapul hita di ulaonta dohot di haloloja ni tanganta di tano on, na hona toru ni Jahowa.
5:30 Ia leleng ni si Lamek mangolu, dung ditubuhon si Noak, lima ratus siapulu lima taon do, jala ditubuhon anak dohot boru.
5:31 Jadi pitu ratus pitupulu pitu taon sandok umur ni si Lamek, dung i mate ma ibana.
5:32 Dung lima ratus taon umur ni si Noak, ditubuhon ma si Sem, si Ham dohot si Japet.

Leave a comment

Filed under 01 I Musa, 1 Padan Na Robi

I Musa 6

6:1 Jadi dung mamungka lam torop jolma i di tano on, jala tubuan boru nasida.
6:2 Diririt angka anak ni Debata ma boru ni jolma, ala na uli do nasida, jala dibuat bahen jolmanasida guru pamillitnasida.
6:3 Jadi ninna Jahowa ma: Ndang be uhum on ni Tondingku jolma i di haliluonnasida, ai roha daging do ibana, jala saratus duapulu taon na ma umurna.
6:4 Adong ma uju i angka Nepilim (pandobo) di tano on. Ai dung ditopot angka anak ni Debata angka boru ni jolma, adong ma huhut tubunasida, i ma angka na begu, angka baoa na tarbarita sian na robi.
6:5 Alai dung diida Jahowa, nunga lam deak hajahaton ni jolma di tano on, jala sai na jat na ma sude tubutubu dohot pingkiran ni rohanasida gonop ari.
6:6 Jadi disolsoli Jahowa ma rohana, ala tinompana i jolma di tano on, jala lungun rohana.
6:7 Dung i ninna Jahowa ma: Ripashononku ma sian tano on jolma na hutompa i, ro di pinahan dohot na manjirir, ro di pidong angka na martongatonga langit, ai nunga husolsoli bagingku ala na hutompa i nasida.
6:8 Alai asi do roha ni Jahowa ianggo marnida si Noak.
6:9 On ma pinompar ni si Noak: Jolma na bonar jala na daulat roha do si Noak i maradophon donganna magodang, sai marparange mardonganhon Debata do si Noak i.
6:10 Dung i ditubuhon si Noak ma anak tolu, si Sem, si Ham dohot si Japet.
6:11 Alai nunga marjea ianggo tano i maradophon Debata, jala nunga gok hajahaton tano i.
6:12 Dung i ditingkir Debata ma tano i, jala ida ma, nunga marjea: Ai tung saluhut na mardaging paroa pangalahona di tano i.
6:13 Jadi ninna Debata ma tu si Noak: Nunga ro ajal ni nasa na mardaging maradophon Ahu, ai nunga gok hajahaton tano on dibahen nasida. Onpe ripashononku ma nasida rap dohot tano on.
6:14 Bahen ma di ho sada parau sian hau goper (marantibane), bahen ma marbilut parau i jala puli sian bagasan dohot sian balian.
6:15 Songon on ma singana bahenonmu: Tolu ratus elak unjur ni parau i, limapulu elak bohangna, jala tolupulu elak timbona.
6:16 Bahen tartungkan ginjang sada pandiloan ni parau i, saelak timbona: Alai anggo pintu ni parau i tu lambungna bahen, jala tolu lampis bilutna bahen, sada di toru, sada di tongatonga, jala sada di ginjang.
6:17 Ai ida, paroonku ma tu tano on aek na sumar laho mangaripashon nasa na mardaging, na marhosa hangoluan di bagasan, angka na di toru ni langit, asa tos hosa ni saluhut na di tano on.
6:18 Alai pajongjongonku ma padanhu dohot ho, bongotanmu ma parau i, ho dohot angka anakmu dohot jolmam dohot jolma ni angka anakmi rap dohot ho.
6:19 Jala pamasuk ma tu bagasan parau i sapasang be sian nasa na mangolu, sian nasa na mardaging, tunggal dohot boruboru, asa mangolu rap dohot ho.
6:20 Sian pidong masiboan mansamna, sian pinahan pe masiboan mansamna, sian nasa na manjirir di tano i, masiboan mansamna; sapasang be sian luhutna ro tu ho, asa mangolu.
6:21 Alai buat di ho sian nasa sipanganon, angka na tarpangan, jala papungu tu ho bahen bohalmu dohot bohalnasida.
6:22 Dung i dibahen si Noak ma sude, songon na tinonahon ni Debata tu ibana, songon i dibahen.

Leave a comment

Filed under 01 I Musa, 1 Padan Na Robi

I Musa 7

7:1 Dung i ninna Jahowa ma tu si Noak: Bongot i ma parau i, ho dohot sude isi ni bagasmu, ai ho do huida na bonar maradophon Ahu di na sansundut on.
7:2 Buat ma di ho pitu pasang be, tunggal dohot boruboruna sian nasa pinahan na ganjing; alai anggo sian pinahan na so ganjing sapasang be, tunggal dohot boruboruna.
7:3 Sian pidong pe, angka na martonga langit, pitu pasang be, tunggal dohot boruboruna, asa adong tinggal boni mangolu di sandok tano on.
7:4 Ai pitu ari nari paroonku ma udan tu tano on opatpulu ari opatpulu borngin lelengna, asa huripashon sian tano on nasa na mangolu, na hutompa i.
7:5 Jadi dibahen si Noak ma sude, songon na tinonahon ni Jahowa tu ibana.
7:6 Alai onom ratus taon ma umur ni si Noak di na ro i aek na sumar i tu tano on.
7:7 Dung i dibongoti si Noak ma parau i rap dohot anakna dohot jolmana, ro di jolma ni angka anakna i di jolo ni aek na sumar i.
7:8 Sian pinahan angka na ganjing dohot sian pinahan na so ganjing dohot sian pidong dohot sian nasa na manjirir di tano on.
7:9 Angka ro be marpasangpasang mandapothon si Noak, tu bagasan parau i, tunggal dohot boruboru, songon na tinonahon ni Debata tu si Noak i.
7:10 Jadi dung salpu na pitu ari i, ro ma aek na sumar tu tano on.
7:11 Paonomratus taonhon di ngolu ni si Noak i, di bulan sipahadua di ari sampulupitu, apala di na sadari i marbuhalbuhal ma sude angka mual ni lung godang, mungkap ma dohot angka pandiloan ni langit.
7:12 Jadi masa ma udan tipotipo tu tano on opatpulu ari opatpulu borngin lelengna.
7:13 Apala di na sadari i do bongot si Noak tu parau i rap dohot angka anakna, si Sem, si Ham dohot si Japet, dohot jolmana dohot na tolu jolma ni angka anakna i.
7:14 Nasida dohot binatang marragam masiboan mansamna, dohot angka pinahan masiboan mansamna dohot sude angka na manjirir di tano on masiboan mansamna, dohot sude angka pidong masiboan mansamna, sude pidong na marende dohot na marhabong.
7:15 Angka ro be marpasangpasang tu si Noak, tu bagasan parau i, sian nasa na mardaging, angka na marhosa hangoluan di bagasan.
7:16 Angka na bongot i, sai marpasang be do ro sian nasa na mardaging, songon na tinonahon ni Debata tu ibana. Dung i dihinsu Jahowa ma sian pudina.
7:17 Jadi ro ma aek na sumar tu tano on opatpulu ari, gabe lam binsat ma aek i, jala dihindathon parau i sian tano on tu ginjang.
7:18 Dung i lam mangalantap ma aek i jala sumar situtu di tano on, gabe meapeap parau i di atas aek i.
7:19 Jadi lam binsat situtu ma aek i di tano on gabe disalpui sude dolok, angka na timbo na di toru ni sandok langit i.
7:20 Sampululima elak aek i tumimbo sian dolok, angka na sinalpuanna.
7:21 Jadi tos ma hosa ni nasa na mardaging, na manjirir di tano on, ro di pidong dohot pinahan dohot binatang, ro di sude na manggulmit di tano on, ro di jolma sudena.
7:22 Mate ma sude na marhosa hangoluan di bagasan igungna, sian sude angka na di darat.
7:23 Jadi ripas ma nasa na adong di tano on, sian jolma ro di pinahan, ro di gulokgulok ro di pidong na martongatonga langit, ripas do saluhutna sian tano on; holan si Noak tading angkup ni na rap dohot ibana di bagasan parau i.
7:24 Dung i sai mangalantap ma aek i di tano on maningtingi saratus limapulu ari lelengna.

Leave a comment

Filed under 01 I Musa, 1 Padan Na Robi