III Musa 23

23:1 Dung i ro muse hata ni Jahowa tu si Musa songon on:
23:2 Paboa ma tu halak Israel, jala dohononmu ma tu nasida: On ma ari raya ni Jahowa, angka sitingtingkononmuna, gabe parluhutan na badia, i ma angka ari raya di Ahu.
23:3 Onom ari lelengna ingkon mangula ulaon ho, alai anggo ari papituhon i ari Sabbat paradianan, ari parluhutan na badia; nanggo sada ulaon ndang jadi ulahononmu disi, ai ari Sabbat di Jahowa do i di saluhut ingananmuna.
23:4 Alai angka on do ari raya di Jahowa, ari parluhutan na badia, angka sitingtingkononmuna di tingkina be binuhul hian:
23:5 Di bulan sipaha sada di ari sampulu opat mareak bodari, disi ma ari raya Paska ni Jahowa.
23:6 Tole di ari sampulu lima bulan i, disi ma ari raya sagusagu na so niasoman di Jahowa; ingkon pitu ari lelengna hamu manganhon sagusagu na so niasoman.
23:7 Di ari parjolo ingkon ari parluhutan na badia di hamu, nanggo sada ulaon ariari ndang jadi ulahononmuna disi.
23:8 Ingkon pitu ari padodot hamu mamelehon pelean situtungon di Jahowa; tole di ari papituhon i ingkon ari parluhutan na badia, nanggo sada ulaon ariari ndang jadi ulahononmuna disi.
23:9 Dung i ro muse hata ni Jahowa tu si Musa songon on:
23:10 Paboa ma tu halak Israel jala dohononmu ma tu nasida: Ia dung sahat hamu tu tano, silehononku tu hamu, jala sanga hamu manggotil gogona i, ingkon boanonmuna ma tibalan parjolo sian patumonaanmuna i tu malim.
23:11 Ingkon malim i muse manatingnating tibalan i di adopan ni Jahowa, asa dapotan asi ni roha hamu; alai marsogotna i pe dung ari Sabbat ingkon tatingan ni malim i.
23:12 Jala di ari panatingnatinganmuna di tibalan i, ingkon pelehononmuna sada anak ni birubiru na so martihas na marumur sataon bahen pelean situtungon di Jahowa.
23:13 Rap dohot peleanna sipanganon: Dua parpuluan itak na lamot na nidogil dohot miak bahen pelean situtungon, uap na hushus di Jahowa, tole dohot sada pelean siinumon sian anggur saparopat hin.
23:14 Jala ndang jadi panganonmuna sagusagu manang tipatipa manang dahanon na niitak sahat ro di ari pamboanmuna di pelean tu Debatamuna; i ma uhum na hot salelenglelengna di pinomparmuna di sandok ingananmuna i.
23:15 Dung i ingkon bilangonmuna ma olat ni ari dung Sabbat i, olat ni ari pamboanmuna tahe di tibalan tatingan pitu ari Sabbat boho.
23:16 Sahat ro di ari dung salpu ari Sabbat papituhon i, boho limapulu ari bilanganmuna, asa pelehononmuna sada pelean sipanganon na imbaru di Jahowa.
23:17 Ingkon boanonmuna tahe sian ingananmuna be dua sagusagu bahen pelean tatingan, sian dua parpuluan itak na lamot na niasoman, na minasak bahen patumonaan di Jahowa.
23:18 Jala ingkon pelehononmuna dongan ni sagusagu i pitu anak ni birubiru, angka na so martihas na marumur sataon dohot sada lombu na bajar dohot dua birubiru tunggal; luhutna i ingkon gabe pelean situtungon di Jahowa rap dohot peleanna sipanganon dohot siinumon, bahen pelean situtungon, uap na hushus di Jahowa.
23:19 Ingkon pelehononmuna huhut sada hambing tunggal bahen pelean pardosaan dohot dua anak ni birubiru na marumur sataon, bahen pelean hamauliateon.
23:20 Ingkon tatingon ni malim ma angka i rap dohot sagusagu patumonaan bahen pelean tatingan di adopan ni Jahowa rap dohot anak ni birubiru na dua i; ingkon badia di Jahowa ma i jala jambar ni malim.
23:21 Ingkon tingtingkononmuna do ari na sasada i, ingkon ari parluhutan na badia do i di hamu; nanggo sada ulaon ariari ndang jadi ulahononmuna disi; patik na hot salelenglelengna ma i di pinomparmuna di saluhut ingananmuna i.
23:22 Molo digotil hamu parbue ni tanomuna, ndang jadi suda gotilonmuna duru ni haumamu, jala ndang jadi suda jomputonmu na marpisikpisik di panabianmuna, ingkon tinggalhononmu do i di halak na pogos dohot di halak dagang; ai Ahu do Jahowa, Debatamuna i.
23:23 Dung i ro muse hata ni Jahowa tu si Musa songon on:
23:24 Paboa ma tu halak Israel songon on: Di bulan sipaha pitu di artia, ingkon marari raya paradianan hamu disi, ari parningotan di parsaruneon, ari parluhutan na badia.
23:25 Nanggo sada ulaon ariari ndang jadi ulahononmuna disi, ingkon pelehononmuna do sada pelean situtungon di Jahowa.
23:26 Dung i ro muse hata ni Jahowa tu si Musa songon on:
23:27 Tole di ari sampulu di bulan sipaha pitu i, i ma ari raya pardengganan, i ma ari parluhutan na badia di hamu, ingkon paunduhonmuna rohamuna disi dohot mamelehon sada pelean situtungon di Jahowa.
23:28 Nanggo sada ulaon ndang jadi ulahononmuna di ari na sasada i, ai ari raya pardengganan do i mambahen pardengganan di hamu di adopan ni Jahowa, Debatamuna i.
23:29 Ai manang ise na so paunduk rohana di ari na sasada i, ingkon siaphononhon do i sian tongatonga ni bangsona.
23:30 Jala manang ise na mangula nanggo sada ulaon di ari na sasada i, ingkon Ahu mangago halak sisongon i sian tongatonga ni bangsona.
23:31 Nanggo sada ulaon ndang jadi ulahononmuna disi; ingkon patik na hot salelenglelengna ma i di saluhut pinomparmuna di saluhut ingananmuna i.
23:32 Ingkon ari Sabbat paradianan ma i di hamu, jala ingkon paunduhonmuna rohamuna di ari sia di bulan na sasada i mareak bodari; ingkon sian bodari sahat tu bodari marsogotna i hamu maradian di ari Sabbatmu.
23:33 Dung i ro muse hata ni Jahowa tu si Musa songon on:
23:34 Paboa ma tu halak Israel songon on: Di ari sampulu lima di bulan sipaha pitu, disi ma ari raya parlapelapean di Jahowa, pitu ari lelengna.
23:35 Di ari parjolo do ari parluhutan na badia; nanggo sada ulaon ariari ndang jadi ulahononmuna disi.
23:36 Ingkon pitu ari padodot hamu mamelehon pelean situtungon di Jahowa; tole paualuarihon, ingkon ari parluhutan na badia di hamu, jala pelehononmuna pelean situtungon di Jahowa, i ma mata ni ari raya i, nanggo sada ulaon ariari ndang jadi ulahononmuna disi.
23:37 I ma angka ari raya di Jahowa, ingkon tingtingkononmuna do i bahen ari parluhutan na badia laho mamelehon tu Jahowa angka pelean api, pelean situtungon, pelean sipanganon, pelean sipotongon dohot pelean siinumon, ganup di arina be.
23:38 So padohot angka ari Sabbat di Jahowa jala so padohot angka silehonlehonmuna dohot bagabagamuna dohot sude silehonlehonmuna sian lomo ni rohamuna, angka na nilehonmuna tu Jahowa.
23:39 Dibahen i di ari sampulu lima di bulan sipaha pitu, ia dung dipapungu hamu gogo ni tano i, ingkon bahenonmuna ari raya i di Jahowa, pitu ari lelengna; di ari parjolo do ari paradianan, di ari paualuhon i pe ingkon ari paradianan do.
23:40 Jala ingkon buatonmuna di hamu di ari parjolo parbue ni hau angka na denggan, angka bulung ni harambir, angka dangka ni hau na rugun, angka ampolu, jala marlas ni roha hamu di adopan ni Jahowa, Debatamuna i, pitu ari lelengna.
23:41 Ingkon bahenonmuna ari raya i di Jahowa pitu ari lelengna di bagasan sataon; patik na hot salelenglelengna ma i di pinomparmuna; di bulan sipaha pitu ingkon marari raya hamu.
23:42 Ingkon pitu ari lelengna hamu maringan di bagasan angka parlapelapean; nasa na tubu di halak Israel, ingkon maringan di bagasan angka undungundung.
23:43 Asa tung diboto pinomparmuna, paboa Ahu mambahen halak Israel maringanan di bagasan angka undungundung, uju Ahu manogihon nasida ruar sian tano Misir; ai Ahu do Jahowa, Debatamuna i.
23:44 Dung i dipaboa si Musa ma tu halak Israel angka ari raya ni Jahowa.

Advertisements

Leave a comment

Filed under 03 III Musa, 1 Padan Na Robi

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s